AQSh-tan Almaty qalasyna kelgen aǵaıyndy týrıster Aleks pen Marko Eılınder Qazaqstannyń dańqyn álem elderine shyǵarýdy maqsat tutyp otyr. Bul týraly «Kazahstanskaıa pravda» gazeti jazdy.
Aǵaıyndy jigitterdiń elimizge taban tireýine My Destination ınternet-resýrsy ótkizgen saıystyń yqpaly bolǵan eken. Saıys qorytyndysy boıynsha olar jeńimpaz atanǵan. Endi eki jigitke Qazaqstandaǵy jetistikterdi keńinen taspaǵa túsirýdiń sáti túsip tur. Al olar osy ýaqyt aralyǵyna deıin 45 memlekettiń tarıhymen tanysýǵa múmkindik alypty. «Biz Qazaqstanǵa alǵash ret keldik. Buryn bul el týraly málimetti ınternetten ǵana biletin edik. Osy kelgende qonaqjaı halyqtyń ulttyq salt-dástúrlerine tánti bolǵanymyzdy jasyra almaımyz. Al sizderdiń elderińizde bolǵanǵa deıin Islandııa, London, Stambýl sekildi birneshe elderdi aralap shyqtyq»-deıdi aǵaıyndy týrıster.
AQSh týrısteri Almatynyń Shymbulaǵyn kórip, birqatar áleýmettik-mádenı oryndardy aralaǵan. Qazaqtyń kıiz úıinde jergilikti azamattarmen bas qosyp, el tarıhy týraly derekterge qanyqty. Endi olar AQSh-tyń belgili arnasyna jáne My Destination ınternet-resýrsyna bizdiń el týraly jınaǵan málimetterin bergeli otyr. Bul tusta eskere ketetin jaıt, My Destination ınternet-resýrsynyń oqyrmandar sany búginde 10 mln.-ǵa jetken. Sondyqtan elimiz tarıhyn keńinen bilýge osynshama oqyrman múmkindik alǵaly otyr.
Ámirhan Almaǵanbetov.
