Pıreneı túbegindegi femınızm qozǵalysynyń belsendi qyzdary Ispanııa parlamentine basyp kirip, zaldan kúshtep shyǵarylǵansha abort jasaý quqyǵyn saqtap qalý jóninde talap qoıdy. Bul týraly DigitalJournal.com portaly habarlady.
Aksııa bar-joǵy úsh mınýtqa sozyldy. Osy ýaqyttyń ishinde Femen tobynyń júgensiz boıjetkenderi ústerindegi syrt kıimderin sheship tastap, parlamenttiń tańerteńgi májilisin úzip jiberdi. Olar jalańash qalyptarynda aborttyń saqtalyp qalýy kerek ekenin aıǵaılap aıta bastady.
Portaldyń málimeti boıynsha, úsh qyz parlamenttiń joǵarǵy Ispanııanyń ádilet mınıstri Alberto Rýız-Gallardon sóılep jatqan kezde kirip kelgen. Qozǵalys belsendileri sol boıda: «Abort degen – qasıetti nárse, oǵan tıisýge bolmaıdy», - dep aıǵaılaǵan. Olar bul sózderdi denelerine de jazyp alypty. Sheshingende solardy kórsetpek bolǵan.
Parlament kúzet bóliminiń qyzmetkerleri femınıstkalardy múmkindiginshe alyp shyǵýǵa tyrysqandarymen, olardyń ekeýi buǵan aıryqsha qatty qarsylyq kórsetti. Aqyrynda bári jabylyp júrip, júgensizderdi syrtqy esikten shyǵaryp tastady.
Budan buryn Femen belsendileri Ispanııanyń BAQ-taryna osyndaı birneshe aksııa uıymdastyratyndaryn málimdegen eken. Olar «Eýropa elderindegi patrıarhattylyqpen kúresýge» bekem bel býypty. Sonyń bir kórinisi osylaı kórindi.
Murat Aıtqoja.
Bizdiń anyqtama.
Femını́zm (latynsha: femina, «áıel») — jynystyq, násildik, jynystyq qatynastaǵy baǵyttylyq, jas, etnostyq, áleýmettik mártebelilik jaǵynan qysymǵa ushyraǵan barlyq áıelderdi qorǵaý maqsatyn kózdeıtin qoǵamdyq-saıası qozǵalys.
Femınızm XVIII ǵasyrda paıda boldy. Onyń aıryqsha joǵary belsendilik alǵan kezi ótken ǵasyrdyń 60-shy jyldarynyń aıaǵyna týra keledi. Qozǵalystyń teorııa retinde qalyptasýy Batysta mynadaı ıntellektýaldyq aǵymdar boıynsha júrgizildi: lıberaldy fılosofııa jáne adam quqyǵynyń teorııasy (Lokk, Rýsso, Mıl jáne basqalar); adamnyń áleýmettik jáne saıası turǵydaǵy minez-qulqyndaǵy jynystyq áreketin qarastyrý (Zıgmýnd Freıd, Vılgelm Raıh, Margaret Mıd, Frankfýrt mektebiniń fılosoftary: Gerbert Markýze jáne Teodor Adorno). Qazir onyń amerıkalyq modeli de qalyptasa bastady.
