Qazaqstan • 08 Shilde, 2020

Áblıazovtyń taǵy bir sybaılasy sottaldy

800 ret kórsetildi

Halyqaralyq izdeýden óz erkimen kelgen M.K. Áblıazovtyń uıymdasqan qylmystyq toptaǵy taǵy bir sybaılasy Marat Áýesqanovqa qatysty Almaty qalasynyń №2 Medeý aýdandyq sotynyń aıyptaý úkimi shyqty, dep habarlaıdy Qazaqstan Respýblıkasynyń sybaılas jemqorlyqqa qarsy qyzmeti.

Áýesqanov zańsyz nesıelendirý arqyly banktiń qarajatyn jymqyrýda qylmystyq qaýymdastyq qoldanǵan "KBG Agro" JShS-niń nomınaldy quryltaıshysy jáne dırektory bolǵan.

Sot Áýesqanovtyń erikti túrde kelýin, kinásin tolyq moıyndaýyn, tergeýmen belsendi yntymaqtastyǵyn jáne eleýsiz ról atqarǵanyn eskere otyryp, oǵan 6 jylǵa shartty túrde bas bostandyǵynan aıyrý jazasyn taǵaıyndady.

Negizgi aıyptalýshynyń tapsyrmasy boıynsha Otanǵa oralǵan jaǵdaıda qamaýǵa alý jáne uzaq merzimge túrmege otyrǵyzý jeleýimen Áýesqanovqa, sonymen qosa jasyrynyp júrgen ózge tulǵalarǵa qatysty qorqytý men qoqan-loqqy kórsetý túrinde kedergiler uıymdastyrýyna baılanysty, Áýesqanov uzaq ýaqyt boıy jalǵan qujattardy qoldanyp, kúnkóris qarajatynsyz jáne jaqyn týystarynan alshaqta shetelde jasyrynyp júrgen.

Sonymen qatar, tergeýdiń barlyq kezeńinde Áýesqanov eshqaıda ketpeý týraly qolhat negizinde tıisti minez-qulyqpen bostandyqta júrdi. Joǵaryda aıtylǵandaı, sot oǵan shartty túrdegi jaza taǵaıyndady.

Áýesqanov izdeýden óz erkimen oralýǵa sheshim qabyldaǵan alǵashqy adam emes ekenin eske salamyz.

Sońǵy ýaqytta izdeýde júrgen 11 tulǵa oraldy. Olardyń ishinde BTA top-menedjerleri, Áblıazovtyń eń belsendi sybaılastarynyń biri – Jaqsylyq Jarymbetov, Sádýaqas Mámesh (Nesıe komıtetiniń tóraǵalary), Qaırat Sadyqov (Nesıe departamentiniń dırektory) jáne Artýr Trofımov (Áblıazovtiń baqylaýyndaǵy "IPG Eurasia", "Evrazııa Sıtı" jáne "Slavınvsetbank" kompanııalarynyń dırektorlar keńesiniń tóraǵasy) bar.

Olardan alynǵan túsinikter, óz erkimen berilgen málimetter men qujattar BTA Bankiniń ǵana emes, sonymen qosa basqa da sheteldik qarjy mekemeleriniń qarajatyn jymqyrý boıynsha jańa qylmystardy anyqtaýǵa kómektesti.

Sot kinálaryn tolyq moıyndaýyn jáne kómek kórsetkenderin eskere otyryp, olarǵa da shartty jaza taǵaıyndady.

Is boıynsha tergeý kezeńinde 800 mlrd teńgeden astam somaǵa zalal óteldi.

Áblıazovty qosqanda, halyqaralyq izdeýde júrgen 16 kúdiktige qatysty sotqa deıingi tergeý jalǵasýda.

Olardyń keıbiri 10 jyldan astam ýaqyt izdeýde júr. Onyń ishinde taǵy 3 kúdikti Qazaqstanǵa óz erkimen oralýdy josparlaýda. Olardyń oralýyna kómek kórsetýge qajetti barlyq sharalar qabyldanýda.

Sonymen qosa, is boıynsha halyqaralyq tergeý tapsyrmalaryn shyǵarý arqyly 50-den astam eldiń quzyretti organdarymen tyǵyz ózara árekettestik júzege asyrylýda, onyń ishinde 12 eldiń quqyq qorǵaý organdary Áblıazovtyń qylmystyq qaýymdastyǵyna qarsy jeke tergeýlerin bastady.

Sońǵy jańalyqtar

Uqsas jańalyqtar