Aımaqtar • 08 Shilde, 2020

Dári-dármek baǵasyn negizsiz kótergender anyqtaldy

218 ret kórsetildi

Shara qabyldaý úshin materıaldar farmasevtıkalyq baqylaýǵa tapsyryldy, dep habarlaıdy Nur-Sultan qalasy ákimdiginiń resmı saıty.

"Astana – adaldyq alańy" jobasynyń menedjerleri sybaılas jemqorlyqqa qarsy qyzmet departamenti janyndaǵy arnaıy monıtorıngtik toppen jáne partııalyq baqylaý komıssııasy múshelerimen birlesip, qaladaǵy birneshe dárihanaǵa monıtorıng júrgizdi. Buǵan azamattardyń dári-dármekter men dárihanalarǵa qatysty shaǵymdary negiz boldy.

Atap aıtsaq, Nur-Sultan turǵyny "DDM PHARM"-dan (Respýblıka dańǵyly, 7) quny 3 705 teńge turatyn 10 mg "Amlodımed" preparatyn satyp alǵan. Dáriniń birligi 327 teńgeden asyp ketken. Al "Sanario" dárihanasynda (Almaty kóshesi, 13) quny 2 500 teńge turatyn SEF-3 preparatynyń baǵasyn kóterý faktisi anyqtaldy. 10 birlikke 2 950 teńge artyq tólengen.

"Astana – adaldyq alańy" jobasynyń jetekshisi Mıras Shekenov tártip buzýshylyq faktisin moıyndaǵan dárihana basshylarymen sóılesti.

"Búgin úsh dárihana tekserildi, olardyń ekeýinde baǵa kóterilgeni anyqtaldy. Shara qabyldaý úshin nátıjelerdi farmasevtıkalyq baqylaýǵa jiberemiz. Sondaı-aq erteńnen bastap qalada barlyq dárihanalardy tekseretin partııalyq arnaıy monıtorıngtik toptar jumys isteı bastaıtynyn atap ótkim keledi. Sonymen qatar barlyq azamattardy dári-dármek baǵasynyń kóterilýi boıynsha WhatsApp nómirine (+7 702 000 24 94) habarlama jiberýge shaqyramyn. Medısınalyq dári-dármekterdiń baǵasyn negizsiz kóterý densaýlyq saqtaý mınıstriniń buıryǵyn buzý bolyp esepteledi", - dep atap ótti M.Shekenov. Eger dári-dármek baǵasy týraly kúmán týyndasa, DARI.KZ qosymshasy arqyly, ndda.kz saıty nemese Qazaqstan Respýblıkasy Densaýlyq saqtaý mınıstriniń bekitilgen buıryǵy (adilet.zan.kz) arqyly teksere alasyz.

Buryn habarlanǵandaı, elordalyq polıseıler medısınalyq preparattardy zańsyz satý faktileri boıynsha reıd júrgizýde. Eki kún ishinde jalpy somasy 6 mln teńgege jýyq dári-dármek tárkilendi.

Sońǵy jańalyqtar

Uqsas jańalyqtar