Aımaqtar • 09 Shilde, 2020

Elbasy Altaıǵa at basyn burǵan sát

713 ret kórsetildi

Kópshilikpen myna bir tarıhı sýretpen bólisýdi jón kórdim. Bul táýelsizdigimizdiń alǵashqy jyldarynda Elbasymyzdyń Katonqaraǵaı aýdanyna alǵash kelgen kezdegi Berel aýylynyń mańynda, sol kezdegi aýdan basshylary men Katonqaraǵaı maral keńsharynyń eńbekkerlerimen túsken sýreti, - dep jazady Egemen.kz

Árıne, Elbasymyz shyraıly shyǵysqa, onyń ishinde jer jannaty atalǵan Katonqaraǵaı jerine odan keıin de san márte at basyn burǵany belgili. Sonyń ishinde aýdanymyzǵa alǵash kelýi talaı jerlesterimizdiń jadynda qalyp, áli kúnge tamasha bir sezimdermen eske alyp otyrady. Sol jyly jaz erte shyqqanmen alǵashqy kúnderinen bastap jaýyndy boldy, sondaǵy jaýǵan jaýyn erekshe esimizde qalypty. Neshe kún kúndiz-túni jaýǵan jaýynnyń áserinen Buqtyrma ózeni at qulaǵyna shyǵa tasyp Katonqaraǵaı jurtshylyǵyn birtalaı ábigerge túsirgeni de esimizde. Aýa raıynyń qolaısyzdyǵyna baılanysty tikushaqtyń ushýy múmkin bolmaǵandyqtan N.Á.Nazarbaev bastaǵan delegasııa Rahman qaınarlaryna deıin avtomobıl joldarymen júrip ótetinin estip-bilip otyrdyq. Delegasııa mingen avtomobılder korteji Katonqaraǵaı – Aqqaınar (sol kezde Chernovaıa) – Jambyl – Rahman qaınarlary baǵytyndaǵy asfalti joq jolmen júrip ótken bolatyn.

Jol boıyndaǵy aýyldardyń turǵyndary prezıdent mingen kólikterdi alystan bolsyn kórip qalý úshin sorǵalaǵan jaýynnyń astynda saǵattap turǵan edi. Erteńgi kúni tańerteń kún shaıdaı ashylyp N.Á.Nazarbaev bastaǵan delegasııa tikushaqpen Berel aýylynyń maǵyndaǵy maral qystaǵynyń janyna kelip qonyp, Katonqaraǵaı maral keńsharynyń eńbekkerlerimen kezdesip ketken edi. Myna sýret sol kezden qalǵan estelik.

Bıylǵy jyly shilde aıynyń 6 juldyzy kúni Elbasymyz N.Á. Nazarbaev mereıli 80 jasqa tolǵaly otyr. N.Á. Nazarbaev Qazaqstan Respýblıkasynyń egemendigin jarııalap, táýelsizdik alǵannan bastap, táýelsizdikti alýdan góri ony qorǵap, saqtap qalý asa qymbat ekendigin basa aıta otyryp, ony durys damý jolyna túsire bildi. Nátıjesinde, Qazaqstan Respýblıkasy ózin búkil álemge pash etti, órkenıetti memleketter qataryna qosyldy. Basqa jetistikterimizdi aıtpaǵannyń ózinde, ishki turaqtylyqtyń arqasynda syrtqy saıasatymyz bekip, álem memleketteri arasynda bedeli arta tústi.
О́tken jyldar ishindegi Elbasynyń elimiz úshin jasaǵan tómendegideı eren eńbekterine el jadynda máńgi qalary sózsiz. Toqsanynshy jyldardaǵy toqyraý kezeńiniń aýyrtpalyǵy az bolmady, osy aýyrtpalyqtardy halyqpen birlese otyryp eńserip, aldymen memlekettik rámizderimiz aspan tústes kók Týymyzdy, ortaq shańyraq beınelengen Eltańbamyzdy, shyrqaǵanda júregińdi jigerlendiretin Gımndi bekitip, bar álemge pash etti. Ulttyq valıýtamyz – teńge aınalymǵa shyqty. Egemendik alǵan sonaý 1991 jyly burynǵy Keńes Odaǵy kezinde belgilengen shekaralarymyz túgeldeı ashyq-shashyq jatqan bolatyn. Sondyqtan da táýelsizdiktiń bastapqy jyldarynda Prezıdent Nazarbaev belgilegen syrtqy saıasattaǵy basymdyqtardyń ishinde, ásirese, shekaralardy mejeleý, olardy halyqaralyq turǵydan zańdastyryp alý eń kezek kúttirmeıtin másele edi. Shekaralardy rásimdeý úshin aýyzdaryn aıǵa balaǵan Reseı jáne Qytaı memleketterimen, sondaı-aq О́zbekstan, Túrikmenstan jáne Qyrǵyz respýblıkasymen kelissózderge belsene kirisip ketti ári bul jaýapty jumysty belgilengen merzim ishinde sátti aıaqtady. Iıa, bir qaraǵanda bul nátıjege de op-ońaı qol jetken sııaqty bolyp kórinýi múmkin. Al shyndyǵyna kelgende, bul - naǵyz jankeshti erlikke turatyn Elbasynyń suńǵyla da syndarly syrtqy saıasatynyń jemisi ekendiginde kúmán joq. Bulaısha aıtýǵa úlken negiz bar. Sebebin myna bir máseleden-aq ańǵarýǵa bolady, Qytaımen shekaralas 15 memlekettiń ishinde Qazaqstan Qytaı úkimetiniń kelisimimen júz paıyz shekara aýmaǵyn tııanaqtap alǵan jalǵyz memleket. Táýelsizdik jyldarynda sheteldik qandastarymyzdyń Otanymyzǵa oralýy 1991 jylǵy 18 qarashadaǵy Qazaq KSR Joǵarǵy Keńesiniń tıisti sheshiminen keıin bastaý aldy. Sodan bergi aralyqta elimizge turǵylyqty turýǵa kelgen qandastarymyzdyń sany 1 mıllıon adamnan asty. Qazaqstan –shetelderden atajurt ókilderin qabyldap otyrǵan álemdegi tórt memlekettiń biri. Ana tilimiz – memlekettik til mártebesin aldy...

Aıta bersek, mundaı mysaldar óte kóp. Ońdy ózgeristerdi ár oblys pen aýdan ómirinen kórýge bolady, óıtkeni, táýelsizdik shuǵylasy keń-baıtaq qazaq dalasyn qamtydy. Aıtýǵa ǵana ońaı osy jańarýlar men damýlardyń astarynda el birligi men tirliginiń, Elbasymyzdyń eseli eńbegi men mańdaı teriniń qanshama syry jatyr deseńizshi...

 

Dúısen BRALINOV,

ShQO, Qotanqaraǵaı aýdany

 

Sońǵy jańalyqtar

Uqsas jańalyqtar