Parlament • 09 Shilde, 2020

Jurttyń jigerin janyǵan úndeý

68 ret kórsetildi

Jahandy jaılaǵan pandemııa indetine qarsy kúsh - memleket pen halyqtyń arasynda ózara qoldaý, túsinistik, senim bolǵan kezde qalyptasatyny sózsiz. Qazirgi jaǵdaı qansha qıyn bolǵanyna qaramastan, memleketimiz indetti jeńýge jumylýda. Dárigerlerimiz janqııarlyq erlik kórsetýde. Osy rette halqymyzdyń sanaly áreketi men jaýapkershiligi asa mańyzdy. Prezıdent osyny basa aıtty, elge demeý bolatyn sózin jetkizdi.

Memleket basshysy "Bireýge jan qaıǵy..." bolyp jatqan tusta dári-dármektiń baǵasyn kóterip, alaıaqtyqpen paıda kóksegenderdiń jolyn kesý sharalaryn, ashy da bolsa, densaýlyq saqtaý júıesindegi kemshin tustarǵa jol berilgendigin búkpesiz sóz etti. Endi osy eskertpeden nátıje shyǵarý asa mańyzdy. 

Memleket basshysynyń ár otandasynyń dertten qaza bolýyna qabyrǵasy qaıysyp, Ulttyq aza tutý kúnin belgileýi de el basyna túsken aýyr synaqta kópshilikti sabyrǵa shaqyrady. "Bul – óte qaýipti, batpandap kirip, mysqaldap shyǵatyn dert" ekenin eskertip, birlik pen bilimge júginýdi usynady.

Qazirgi tańda aýrýǵa qatysty jalǵan aqparattar pen qaýesetter kóbeıip ketti. Prezıdenttiń osy jaǵdaıdan saqtandyryp, karantın erejelerin qatań saqtaýǵa úndeýi qazirgi tańdaǵy birden-bir tıimdi áreket bolyp sanalady. Halqymyz "Saqtyqta – qorlyq joq" degen danalyqty osyndaı qıyn kezeńderge baılanysty aıtsa kerek.

Hakim Abaı "...aýrýdy jaratqan qudaı, aýyrtqan qudaı emes,- dep nanyp, uqsań bolar", deıdi jıyrma segizinshi qara sózinde. Sondyqtan, “aýyryp em izdegenshe, aýyrmaýdyń jolyn izdeıik" degim keledi.

Der kezinde halqynyń jigerin janyǵan úndeýdiń taǵy bir kóńilden shyǵar tusy – Memleket basshysynyń jaǵdaıdyń sózsiz turaqtalatynyna senim bildirýi. Eńsemizdi túsirmeı, "Birinshi baılyǵymyz – densaýlyǵymyz" jolynda jáne ár azamattyń amandyǵy úshin aıanbaı kúresýge mindettimiz. Úndeýdiń basty maqsaty, dittegen oıy – osy.

 

Edil MAMYTBEKOV,

Parlament Senatynyń depýtaty

Sońǵy jańalyqtar

Ury alysqa uzamady

Aımaqtar • Keshe

Uqsas jańalyqtar