Bilim • 09 Shilde, 2020

Gaýhar Aldambergenova: Basty mindet – karantın erejelerin qatań saqtaý

31 ret kórsetildi

Memleket basshysy Qasym-Jomart Toqaev respýblıkalyq telearnalar arqyly pandemııaǵa oraı elimizde qalyptasqan ahýalǵa baılanysty televızııalyq úndeý jasap, otandastarymyzdy mazalaǵan túıitkildi máselelerdi atap ótip, azamattardy jalǵan aqparatqa senbeýge shaqyrdy.

«Koronavırýstyń taralýy báseńdemeı otyr. Keıbir elderde bul indet qaıtadan ýshyǵyp bara jatyr. Álem boıynsha osy vırýsty juqtyrǵandardyń sany shamamen 12 mıllıonǵa jetti, sonyń saldarynan 500 myńnan astam adam qaıtys boldy. Sol sebepti, birqatar elderde  karantın tártibi qaıta kúsheıtilip, áýe, kólik qatynasy qaıtadan shekteldi. О́kinishke qaraı, bizdiń eldegi jaǵdaı da ońaı bolyp turǵan joq», – dedi Qasym-Jomart Toqaev.

Rasynda da, Qazaqstanda aýyrǵandar sany aıtarlyqtaı kóp, qaıtys bolǵandar da az emes. Osyǵan oraı Memleket basshysy 13 shilde – Ulttyq aza tutý kúni bolyp belgilengenin atap ótti. Bul – aty jaman indetten o dúnıelik bolǵan otandastarymyzdyń, asyl azamattarymyzdyń aldyndaǵy paryz dep uǵynǵan abzal.

Sonymen qatar Prezıdent qazaqstandyqtardy eki aptaǵa belgilengen karantın sharalaryn qatań saqtap, sanaly túrde áreket etýge shaqyrdy. Onyń aıtýynsha, erejelerdi eskergende ǵana nátıje bolmaq. Bul oraıda ol koronavırýstyń taralýyna baılanysty densaýlyq saqtaý júıesine kóp aýyrtpalyq túskendigin atap ótti. Degenmen, qalyptasqan jaǵdaıǵa qaramaı, memleket tarapynan barlyq qajetti sharalar qabyldanyp jatqandyǵyn da eskergen lázim.

Qasym-Jomart Toqaev óz sózinde dári-dármektiń jetkiliksizdigi jaıyna da toqtaldy. Shyndyǵyn aıtqan jón, búginde medısınalyq preparattardyń dárihanalarda bolmaýy jurtshylyqtyń ashý-yzasyn týdyryp jatqany ras. Bar bolǵan kúnniń ózinde baǵasynyń birneshe ese kóterilgendigi týrasynda áleýmettik jelidegi áleýmet jazyp ta, aıtyp ta jatyr. Prezıdent qajetti dári-dármekter qorynyń kóbeıetindigin, onyń baǵasyn negizsiz ósirip, qıyn-qystaý kúnderde paıda tabýdy kózdegender zań sheńberinde jazalanatyndyǵyn jetkizdi. Bul tarapta naqty tapsyrmalar berilip, jumystar kúsheıetindigin málimdedi.

Memleket basshysy telearnalar arqyly dárigerlerdiń keńesi kóptep berilýi qajettigin de atap ótti.

Osy oraıda aıta keteıin, «Qazaqstan» Ulttyq telearnasy 9 shildeden bastap tikeleı efırde «Teledáriger» jobasyn bastaıdy. Elimizdiń bilikti dárigerleri bes kún boıy tikeleı efır arqyly kórermendermen baılanysqa shyǵyp, álemdi jaýlaǵan koronavırýspen kúresýdiń joldaryn túsindiredi.   Baǵdarlama suraq-jaýap formatynda uıymdastyrylyp, stýdııaǵa kelgen mamandar tek kórermen tarapynan kelip túsken saýaldarǵa jaýap beredi. Negizgi maqsat – el turǵyndaryna, ásirese shalǵaı aýyl-aımaqtaǵy kórermenge qazirgi kúrdeli ahýalǵa baılanysty kúndelikti medısınalyq keńes berý. Dárigerler tikeleı efır barysynda COVID-19 vırýsy men ózge de aýrýlardan saqtaný men aldyn alý sharalary, emdeý tásilderi týraly nusqaýlyq beredi.

Qolǵa alynyp jatqan is-sharalardyń kózdegen maqsaty bir: aty jaman indetti aýyzdyqtaý, ult saýlyǵyn qalyptastyrý, azamattardy aýrýdan arashalaý.

Sózimdi Memleket basshysynyń paıymdy oıymen túıindesem: «Biz – talaı zobalań men synaqty bastan ótkergen, tarıhtyń talaı daýylyna boı bermegen halyqpyz. Batyr babalardyń jolyn jalǵaǵan búgingi urpaq ta qazirgi qıyndyqqa tótep beredi dep senemin. Bálkim, bul bizdiń birligimizdi baıqaý úshin berilgen synaq shyǵar. Bir jeńnen qol, bir jaǵadan bas shyǵaryp, uıymdasa bilsek, bul synnan da ótermiz.  «Densaýlyq – zor baılyq» degen halqymyzdyń dana sóziniń qadirin bileıik. Ár azamattyń amandyǵy úshin kúreseıik!».

 

Gaýhar Aldambergenova,

Qazaq ulttyq qyzdar pedagogıkalyq ýnıversıtetiniń rektory

Sońǵy jańalyqtar

Tumandy Albıondaǵy COVID-19

Koronavırýs • Keshe

Afrıkany kezgen COVID-19

Koronavırýs • Keshe

Uqsas jańalyqtar