8 shildedegi málimetke qaraǵanda qazir óńirde 1 446 oqıǵa tirkeldi. Sonyń ishinde 480 adam aýrýdyń sımptomdy túrimen, al 67 paıyzy sımptomsyz túrimen naýqastanǵan. О́tken táýlikte naýqastanǵandar sany – 1,9 paıyzǵa ósti nemese bul – 28 adam, onyń 19-y sımptomdy, 9-y sımptomsyz.
Infeksııalyq stasıonarlarda qazir 136 adam emdelip jatyr. 545 adam emdelip shyqty.
Medısınalyq qyzmetkerlerge eńbekaqy qalaı tólenýde degen suraqqa ákim olardyń eńbekterin joǵary baǵalaıtynyn jáne olarǵa óziniń rızashylyǵyn jetkizdi. Búgingi tańda Prezıdenttiń atynan 15 dárigerge joǵary memlekettik nagradalar tapsyryldy. Al eńbekaqy jóninde aıtar bolsaq, barlyq ınfeksııalyq, provızorlyq stasıonarlar, sondaı-aq jedel járdem, qabyldaý bólmelerindegi fıltr qyzmetkerlerine aı saıynǵy ústemeaqy Densaýlyq saqtaý mınıstriniń 2020 jyldyń 4 sáýirindegi buıryǵyna sáıkes tólenedi. Barlyq medısına qyzmetkerleri táýekeldiligi boıynsha 3 topqa bólingen, sonyń ishindegi birinshi topta 184 adam bar. Osyndaǵy ár dárigerdiń negizgi eńbekaqysyna 120 myńnan bastap 825 myń teńgege deıin jumys istegen ýaqytyna sáıkes tólenedi. Ekinshi toptaǵy táýekeldegilerge 425 myń teńgege deıin tólenedi. Bul sanattaǵylar oblysta – 258 adam. Al úshinshi toptaǵylardyń sany – 744 adam, olardyń árqaısyna qosymsha 225 myń teńgege deıin tólenedi. Osylaısha naýryz aıynda 48,6, sáýirde 161,2 mln, mamyrda 150,3 jáne maýsymda 209,8 mln teńge qosymsha aqy tólendi.
Medısına qyzmetkerlerine arnalǵan jeke qorǵanysh quraldary jetkilikti, aldaǵy 2 aptaǵa da jetedi. Iаǵnı bir rettik betperde – 338 myń dana, qorǵanysh kástómi – 4 myń, qolǵap – 596 myń, antıseptıkten 9 tonna bar. Bólshek saýda jasaıtyn dárihanalar jelisinde betperde men antıseptık tapshylyǵy joq. Qazir suranystyń artýyna baılanysty №1 qalalyq aýrýhana, oblystyq ftızıopýlmonologııa ortalyǵy jáne M.Jumabaev, Ǵ.Músirepov aýdandarynda pasıentterge arnalǵan tósektik oryn sanyn 65-ten 435-ke deıin kóbeıttik. Provızorlyq stasıonarlardaǵy oryndar 100-den 905-ke deıin artty, sonyń ishinde oblystyq aýrýhanada 200, qalalyq aýrýhanada 110, Qyzyljar aýdandyq aýrýhanasynda 120-ǵa deıin qosymsha oryndar ashyldy. Basqa aýdandarda oryndy kóbeıtý qolǵa alynǵan.
Karantın saldarynan ýaqytsha jumyssyz qalǵandardy jumysqa ornalastyrý boıynsha 3 shilde kúni bos qyzmet oryndarynyń jármeńkesi ótip, oǵan 29 kásiporyn men 280 adam qatysty. 103 adam jumysqa turý úshin qujattar jınap jatyr. Keshe Pogodın atyndaǵy teatrda ekinshi ret jármeńke ótkizildi.
Q.Aqsaqalov óńirde jaman indettiń taralýy tolyq baqylaýda ekenine sendire kelip, «saqtyqta qorlyq joq» ekenin atap ótti.
Soltústik Qazaqstan oblysy
