Degenmen el Prezıdenti Q.Toqaevtyń qoǵamdaǵy jaǵdaıǵa shynaıy, resmı baǵa berip, densaýlyq saqtaý júıesinde jiberilgen qatelerdi túzeýge baılanysty júzege asyrylatyn is-sharalardy ashyq túrde jarııalaǵany anyqtaýshy faktor boldy.
13 shildenini Ulttyq aza tutý kúni dep belgileý, osy indetten qaıtys bolǵan azamattarymyzdy eske alý – adamdyq boryshymyz. Jaqynynan aırylǵan árbir otbasyna qaıǵyryp kóńil aıtamyn. «Adam balasyna adam balasynyń bári – dos», dep uly Abaı aıtqandaı, álemdi kesel jaılaǵan dúrbeleń kezinde halqymyzǵa eń bastysy sabyrlylyq, dostyq, baýyrmaldyq qajet. Aýyr synaqtan bereke-birlikpen, yntymaqpen ótýimiz abzal.
Bul indetpen kúres barysynda kez kelgen nársege nemquraıdy, ústirt qaraýǵa bolmaıtyndyǵyn ýaqyt anyq kórsetti. Árıne, «tas túsken jerine aýyr», eń aýyr salmaq Densaýlyq saqtaý mınıstrligine túsetini ras. Degenmen medısına, dári-dármek salasyndaǵy is-sharalardy ýshyqtyrmaı, aqylmen uıymdastyra otyryp qıyndyqtan shyǵý – bárimizge mindet. Prezıdent dári-dármektiń baǵasyn paıdakúnemdik maqsatta ósirip, onsyz da qıyn jaǵdaıdy belgili bir maqsattarǵa paıdalanýǵa tyrysqandardyń tıisti organdar tarapynan qatań jazalanatynyn aıtty. Jahandyq indetpen kúresýde áreketsizdik, sharasyzdyq, enjarlyq tanytqan jaýapty tulǵalardyń zań turǵysynan jaýapkershiligi jeke qarastyrylatynyn málimdedi. Syndarly sátte ishki birligimizdi saqtaı otyryp, kez kelgen kedergiden, qıyndyqtan sanaly sabyrmen, paıymdy parasattylyqpen ótýge bolatyndyǵyn uqtyrdy.
Halqymyzǵa amandyq tilep, karantın sharalaryn qatań saqtaýǵa, al tıisti memlekettik organdardy óz qyzmetine qyraǵy jaýapkershilikpen qarap, halyqtyń jaǵdaıyn jasaýǵa shaqyramyz, sebebi bizdiń memleketimizdiń eń qymbat qazynasy – halqymyz!
Muhtar TО́LEGEN,
Sársen Amanjolov atyndaǵy Shyǵys Qazaqstan memlekettik ýnıversıtetiniń rektory, professor
