Eń bastysy, Memleket basshysy eldegi jaǵdaıǵa jete mán berip, halyqtyń qaıǵysyna ortaqtasa bildi. Salmaqty saraptama jasap, otandastarymyzdyń rýhyn kóterip, jigerin janydy. Adam balasy bolǵan soń kóńilge medeý bolar izgi peıil kútetinimiz jasyryn emes. Sondyqtan osynaý syn saǵatta el Prezıdenti jurttyń aryz-shaǵymyna túsinistikpen qarap, onyń máselesin sheshýge daıar ekenin tanytty. Halyqtyń kútkeni de osy bolatyn. Eńsesi túsken eldiń aldaǵy kúnge degen úmiti jalǵandy, úni bılik basyna jetti.
Prezıdent: «Ár qazaq – meniń jalǵyzym» degendeı, ár azamatymyzdyń qazasy meniń júregime qatty batady. Mynaý alapat indet aramyzdan talaı asyldarymyzdy julyp áketýde. Búginde qara jamylyp otyrǵan azamattardyń qaıǵylaryna ortaqtasyp kóńil aıtamyn. Sol úshin 13 shildeni – Ulttyq aza tutý kúni dep jarııalaımyn», dedi. Qarapaıym halyqtyń qaıǵysyna ortaqtasý – kemeldik pen tereńdiktiń belgisi emes pe? Úndeýge qulaq túre otyryp, Memleket basshysynyń boıynan osy qasıetterdi ańǵardym.
Elimizde keshendi medısınalyq qyzmet kórsetetin ámbebap brıgadalardyń sany aı sońynda 3,5 myńǵa jetpek. Osylaısha, medısınalyq qyzmet kórsetý isi de tolyǵymen qamtamasyz etiletin bolmaq.
«Sabyr túbi – sary altyn» deıdi dana halqymyz. Memleket basshysy da «Sabyrly bolaıyq» dep otandastarymyzdy yntymaq pen birlikke shaqyrdy. Aqıqatynda bul indetpen kúreste dári-dármek qanshalyqty qajet bolsa, sabyr da sonshalyqty kerek-aq. Basymyz aman, baýyrymyz bútin bolǵaı.
Aıgúl SOLOVEVA,
Ekologııalyq uıymdar qaýymdastyǵynyń tóraǵasy
