О́kinishke qaraı – koronavırýsqa álemdegi medısınasy damyǵan memleketter de der kezinde tótep bere alǵan joq. Bir kúnde myńdaǵan adamnyń vırýs juqtyrýy medısına salasyna úlken salmaq túsirdi. Mundaı jaǵdaı bizdiń eldi de aınalyp ótpedi. Densaýlyq saqtaý salasy aýrýhanaǵa aǵylǵan naýqastar nópirinen qıyndyqqa tap keldi. Vırýspen kúresip júrgen dárigerlerimiz de juqtyryp, tipti qaza bolǵan oqıǵalary da kezdesti. Munyń bári, árıne, ońaı emes.
Qaýipti dert turǵyndar arasyna tarap ketti. Qazir elimizde túsiniksiz tumaýmen aýyryp, pnevmonııaǵa shaldyǵyp jatqandar sany da kúrt artypty. «Jyǵylǵanǵa judyryq» demekshi, osyndaı kezeńde dárihanalarda dári qymbattap, keıbiri sórelerden tabylmady. Dertine shıpa bolar dári tappaǵan jurt seńdeı soǵylysyp júr.
Memleket basshysy Qasym-Jomart Toqaev halyqqa úndeýinde buǵan erekshe nazar aýdardy. Prezıdent dári-dármek baǵasyn negizsiz kótergenderdi jaýapkershilikke tartýǵa tapsyrma bergenin málimdedi.
Endi alǵashqy medısınalyq kómek kórsetý jumysy odan ári jetildirilmek. Qazirge deıin Qazaqstanda ýnıversaldy 400 mobıldik emdeý brıgadasy bar. Osy aıdyń sońyna deıin onyń sany 3,5 myńǵa artady. Aýrýhanalardaǵy oryndar sany kóbeıtilip, dala gospıtaldaryn jasaqtaý qolǵa alynbaq.
Qoryta aıtqanda, juqpaly indet saldarynan jaqynynan aıyrylǵan jurtymyz úshin, dertke daýa tappaı eleń-alań kúı keshken elimiz úshin bul kóńilge medeý, janǵa jiger, úmitke qanat bitirgen úndeý boldy.
Jambyl Ahmetbekov,
májilis depýtaty
