Ári sazger, ári uıymdastyrýshy jarqyn tulǵa Keńes Dúısekeev sońyna shoqtyǵy bıik týyndylar qaldyrdy. Onyń kameralyq orkestrge, fortepıanoǵa arnalyp jazylǵan «Jalańtós batyr» sımfonııalyq poemasy, «Tolǵaý», «Astana» sımfonııalary, «Jyl mezgilderi» romanstar sıkly, «Jaılaý tańy», «Jaılaýdaǵy kósh» sonatalary, basqa da kóptegen romanstary talǵampaz zertteýshilerden laıyqty baǵasyn alǵan, tyńdarmandardyń qulaq quryshyn qandyrǵan biregeı týyndylar. Kásibı ánshilerdiń oryndaýyndaǵy «Sálem saǵan, týǵan el», «Dombyra týraly ballada», «Tolǵaý», «Erkelediń sen», «Ǵashyqtar áni», «О́kinbe sen», «Qaraǵym-aı», «Arman, arman», «Oılan, balam», «Aınakól» sııaqty tanymal ánderdiń de áýeninen Keńes aǵanyń qoltańbasy anyq kórinip tur. Sondaı-aq «Mádı», «Aqqý» «Jibek» syndy mıýzıkldary, «Aldar kóse» operettasy onyń san qyrly daryn ıesi ekenin aıǵaqtaıdy.
Ol shyǵarmashylyǵyn shyńdaı júrip «Gúlder» ansambliniń bas dırıjeri jáne mýzykalyq jetekshisi bop eńbek etti. «Qazaqkonsert» birlestiginiń mýzyka jetekshisi, Qazaq teledıdary mýzyka redaksııasynyń bas redaktory sııaqty jaýapty jumystardy da mýzyka álemine adal qyzmet ete júrip atqardy. Biz aıaýly sazgerdiń aldy jaryq, arty kenish bolýyn tileımiz. Otbasyna, týystary men dostaryna, rýhanı jaqyn jandarǵa qaıǵyra kóńil aıtamyz.
Egemenqazaqstandyqtar
