Qazaqstan • 12 Shilde, 2020

Nur-Sultanǵa COVID-19 jáne pnevmonııamen aýyratyn naýqastardy emdeýge arnalǵan dári-dármekter jetkizildi

29 ret kórsetildi

Nur-Sultanǵa júk ushaǵymen COVID-19, pnevmonııa jáne basqa da aýrýlardy emdeýge qajetti dári-dármekter jetkizildi. Memleket basshysynyń tapsyrmasyna saıkes Úkimet dárihanalardy dári-dármektermen qamtamasyz etý boıynsha júıeli jumys júrgizýde. Bul jumysty elorda ákimdigi de júzege asyrýda, dep habarlaıdy Egemen.kz ákimdiktiń baspasóz qyzmetine silteme jasap.

Osylaısha, alǵashqy jóneltilim kezinde qalaǵa 600 myńnan astam dári-dármek qaptamasy júk ushaǵymen jetkizildi. Kelip túsken taýarlardyń tiziminde dári-dármektiń 350-ge jýyq túri bar. Mysaly, ksarelto, seftrıakson, kleksan, azıtromısın, deksametazon, metılprednızolon, ıbýprofen, nımesýlıd, kardıomagnıl, levofloksasın, metronıdazol, geparın, nımesýlıd, ıbýfen, parasetamol, ofloksasın jáne t.b.

Iri dárihana jelilerine jetkizý erteń bastalady. Sonymen qatar jaqynda júk kólikterimen taǵy dári-dármek jetkiziledi dep kútilýde. Osy aptada dári-dármekter dárihanalarǵa jetkizile bastady. Dárihanalardy qamtamasyz etý jumystary turaqty negizde júrgiziletin bolady.

Elorda ákimi Altaı Kólginov dárihana jelileriniń dıstrıbıýtorlarymen, farmasevtıkalyq kompanııalar men dárihanalardyń ókilderimen kelissózder ótkizdi. Densaýlyq saqtaý mınıstrligimen birlesip, ákimdik dári-dármekterdi satyp alý men ákelý rásimderin jeńildetý, logıstıka boıynsha qoldaý kórsetedi.

Ýaqytyly aqparat alý úshin elorda ákimdigi covid19.astana.kz paraqshasyn ashty, onda siz koronavırýs ınfeksııasy týraly resmı málimetterdi, onyń ishinde dárihanalarda dári-dármekterdiń bar-joǵyn bile alasyz.

Sonymen qatar jaqyn ýaqytta elordaǵa satyp alynǵan zattardan basqa, 200 ókpeni jasandy jeldetý qurylǵysy, 500 flýometr, 500 ottegi konsentratory jáne eki kompıýterlik tomograf jetkiziledi.

Sońǵy jańalyqtar

Atyraýda ury úsh jyldan keıin ustaldy

Aımaqtar • Búgin, 16:06

Almaty qalasynda jer silkindi

Ekologııa • Búgin, 11:00

Sora ekken turǵyn tergelýde

Aımaqtar • Keshe

Uqsas jańalyqtar