Máskeýdiń batys qaptalyndaǵy Bırıýlev aýdanyndaǵy jurtty birneshe kún boıy kóshege shyǵarǵan oqıǵanyń sebebi – 25 jasar Egor Sherbakovty osyndaǵy kókónis qoımasy mańynda óltirgen adamnyń kim ekeni anyqtaldy. Ol Orhan Zeınalov esimdi ázerbaıjan jigiti bolyp shyqty. Bul týraly ITAR-TASS habarlady.
«Anyqtalǵan málimetter boıynsha, Vostrıakov tuıyǵyndaǵy jas jigitti óltirýge qatysty oqıǵanyń basty qaharmany belgili boldy. Ol Ázerbaıjannyń týmasy Orhan Zeınalov esimdi jigit. Qazir kúdiktini ustaýdyń barlyq sharalary qarastyrylyp jatyr», - delingen polısııa habarlamasynda.
Egor Sherbakov 10 qazan kúni túnde óltirildi. Belgisiz bireý ony qyzynyń kózinshe denesiniń birneshe jerine pyshaq salyp óltirgen.
Osy oqıǵadan keıin Batys Bırıýlovoda turǵyndardyń jıyny ótip, olar jas jigitti óltirýshini taýyp berýdi talap etti. Olar sondaı-aq osy aýdanda turatyn barlyq mıgranttardy tekserýdi talap eti. Osydan keıin ulttyq urandar kótergen top «Bırıýza» saýda ortalyǵyn talqandady. Jurt kisi óltirýshi tap osy jerde tyǵylyp jatyr dep eseptedi.
Tobyr OMON-men ustasty. Osyǵan baılanysty 400 adam qamaýǵa alyndy. Olardyń 70-ine ákimshilik sharalar qoldanyldy.
Qazir Tergeý komıteti bazanyń jumysyn bes kúnge toqatyp qoıyp, jumys jasap jatyr. Al Bırıýlev aýdanynyń ishki ister bóliminiń bastyǵy ornynan alyndy.
Murat Aıtqoja.
