Aımaqtar • 13 Shilde, 2020

Taraz qalasyna ystyq sý qashan beriledi?

196 ret kórsetildi

Jaz mezgili kele salysymen Taraz qalasynda ystyq sýdyń máselesi týyndaıdy. Iаǵnı, kóshelerdegi jerasty sý qubyrlarynyń jóndelýine baılanysty oblys ortalyǵyndaǵy ystyq sý da óshedi. Jyl saıyn ne ol jóndelip te bitpeıdi. Árbir jyl saıyn qaıtalanatyn jaǵdaı osy. О́tken jyly Asqar Myrzahmetov Jambyl oblysynyń ákimi qyzmetin atqaryp júrgende endi Tarazda ystyq sýdyń óshpeıtinin aıtqan bolatyn. Biraq óńirde jaǵdaı ózgerip, basshylyq aýysqan soń bul másele "baıaǵy jartas, sol jartas" kúıinde qaldy. Bıyl da Taraz qalasynda ystyq sý óshken soń áleýmettik jeliler arqyly turǵyndar jergilikti bılikke óz narazylyǵyn bildirgen edi.

Jambyl oblysynyń ákimi Berdibek Saparbaev tıisti basshylarǵa aldaǵy birneshe kún ishinde tarazdyqtardy ystyq sýmen qamtamasyz etýdi qalpyna keltirýdiń sheshimin tabýdy tapsyrdy. Ákim ystyq sýdyń óshýine baılanysty áleýmettik jelilerde turǵyndardyń narazylyq bildirip jatqanyn atap ótti. "Ystyq sý tóńiregindegi mundaı keleńsizdik jylda qaıtalanyp keledi, biraq soǵan qaramastan naqty sharalar qabyldanbaıdy. Alaıda, bıylǵy jaǵdaı máz emes. Qazir kóptegen adamdar úıde karantınge qamalyp otyrǵan kezde biz olardyń densaýlyǵyna beı-jaı qaraı almaımyz. Kún saıyn maǵan Taraz turǵyndarynan ondaǵan ótinish kelip túsedi. Búgingi tańda barlyq kúsh-qýat adamdardyń ómiri men densaýlyǵyn qorǵaýǵa baǵyttalyp jatqan kezde, eshqandaı bosańsý men kemshilik keshirilmeıdi", dedi ol. Oblystyq energetıka jáne turǵyn úı-kommýnaldyq sharýashylyq basqarmasynyń basshysy Qudaıbergen Qorǵanbaevtyń aıtýynsha, ystyq sý josparlanǵan jóndeý jumystaryna baılanysty óshirilipti. Taraz qalasyndaǵy 1312 turǵyn úıdiń 1253-i ortalyqtandyrylǵan jylý júıesine qosylǵan. Olarǵa "Tarazenergoortalyq" AQ, "Jambyl Jylý" JShS, "Sofııa" JShS, "Jambyl GRES" jáne "Taraztransenergo" memlekettik qazynalyq kásiporny qyzmet kórsetedi. Búginde jylý júıesin qaıta qurý jáne jóndeý boıynsha 17 joba júzege asyrylýda. Kelisimshart boıynsha merdigerler nysandardy qazan aıynda tapsyrýǵa mindetti eken. Alaıda, Berdibek Saparbaevtyń aıtýynsha, bul merzimdi tym uzaq. Degenmen, oblys ortalyǵyna jappaı ystyq sýdyń qashan beriletini de belgisiz.

Jambyl oblysy

Sońǵy jańalyqtar

Elektrondy qyzmet úlesi ósti

Tehnologııa • Keshe

Brazılııada vırýs basylmaı tur

Koronavırýs • Keshe

Uqsas jańalyqtar