Máskeý polısııasy 10 qazan kúni Batys Bırıýlovoda túnde 25 jasar Egor Sherbakovty súıgen qyzynyń kózinshe pyshaqtap óltirip ketken kúdikti jóninde barlyq kerekti málimetterdi jınap aldy. Bul týraly «Ýtro.Rý» habarlady.
«Kúdiktiniń aty-jóni Orhan Zahıt Ogly Zeınalov, 25 jasta», - dep málim etti qala ishki ister departamentinen.
Polısııa osyǵan baılanysty kúdiktimen kezdesken kezde abaı bolýdy surady. «Biz barlyq azamattardan ony kóshede kezdestire qalǵan jaǵdaıda abaı bolýdy suraımyz», - delingen habarlamada.
Tergeý komıtetiniń deregi boıynsha, Zeınalov turaqty jumys istemegen. Ol kóbine kólikpen adam tasyp kún kórgen. «Onyń óte qyzba ekeni, turaqty jumys istemeıtini, ishimdikke qumarlyǵy belgili boldy», - dep atap kórsetti ondaǵylar.
«Kúdiktini ustap alý – birneshe saǵattyń ǵana enshisindegi sharýa. Ol endi eshqaıda qashyp qutyla almaıdy», - dedi taǵy.
Aıtqandaı, Orhan Zeınalovtyń Ázerbaıjanda qylmysy úshin izdestirilip jatqany jalǵan bolyp shyqty. «Máskeýde kisi óltirdi degen kúdik taǵylǵan Orhan Zeınalov, Reseı BAQ-tarynda atap kórsetilgendeı, Ázerbaıjanda qylmystyq izdeýde júrgen joq. Ol qylmystyq jaýapqa tartylǵan emes», - dep málimdedi Ázerbaıjan Ishki ister mınıstrliginen.
Sonymen birge, Zeınalovtyń 10 jyldan beri Máskeýde týystarymen birge turyp kelgeni belgili boldy. Biraq ol keıingi kezderi páter jaldap turǵan. Jáne páterdi jıi aýystyratyn bolǵan.
Qazir Zeınalovtyń 8 adamnan quralǵan týystary túgel qamaýǵa alynǵan. Páterde tintý júrgizilgen.
Murat Aıtqoja.
