Bileýli kerýen saraıy – XIV ǵasyrdan beri saqtalǵan sáýlet óneriniń eskertkishi. Jibek jolynyń bir tarmaǵy, Noǵaıly jolynyń boıynda, Ústirttiń Qaraqalpaq bóliginde ornalasqan. Soltústik pen ońtústikti jalǵastyratyn kerýen joly bolǵandyqtan, onyń boıyna árbir 25 km saıyn kerýen saraılar salǵyzǵan. Qulaǵan ǵımarattyń 8 metrge jýyq eki baǵanasy men qaqpasy saqtalǵan. Bileýli kerýen saraıynyń eki qabaty batys pen shyǵys qabyrǵalarynyń ón boıynda jeti-jetiden 14 bólme bar. Kerýen saraıdyń ishki aýlasynda tereń shyńyraý qudyq bolǵan. Eskertkishtiń ón boıynda Mańǵystaý óńirine tán aıshyqtar beınelengen. Jańa sáýlet nysanynyń boı kóterýine aýdan kásipkerleri Tájmaǵambet Jubanov, Suńǵat Bóribaıuly men Gúlmıra Tájmaǵambetqyzy yqpal etti.
Sonymen qatar Mańǵystaýdyń tól perzenti, sáýletshi Bolatbek Salaev Beıneý aýdanyna «Anaǵa taǵzym» eskertkishin syıǵa tartty. Jańa týyndyda ananyń balaǵa degen meıirimi erekshe kórsetilgen. Áıel beınesi arqyly qazaq qyzynyń ınabattylyǵyn, bııazylyǵyn, qazaqqa tán minezin sıpattaǵan. Ananyń oń qolyna sábıin ustap, alǵa qaraı bir qadam jasap turǵanynyń máni – tún uıqysyn tórt bólip, bir qolymen besik, ekinshi qolymen álemdi terbetken, sábıin qundy qasıetterge tárbıelegen, aq sútimen adamgershilik darytqan analarǵa taǵzym retinde beınelengen. Al kıim-keshektegi ár oıý-órnek salt-dástúrimizdiń bolmysyn sıpattaıdy.
– Jas músinshi retinde osyndaı aýqymdy taqyrypta úlken músin jasaý meniń maqsattarymnyń biri boldy. Jumys barysynda analarymyzdyń meıirimge toly beınesin, ultymyzdyń baı dástúrin jetkizgim keldi, – deıdi Bolatbek Erkebaıuly.
Elbasynyń «Bolashaqqa baǵdar: rýhanı jańǵyrý» maqalasynda árbir azamat týǵan jerin kórkeıtýge at salysý kerektigi aıtylǵan bolatyn. Beıneý aýdanynda alǵash ret ashylǵan bul stellany qoǵamdaǵy, otbasyndaǵy ana mártebesin kóterýdiń úlken úlgisi deýge bolady.
Qos joba indetten qınalǵan turǵyndardyń kóńiline qýanysh syılaǵan jańalyq boldy.
Mańǵystaý oblysy,
Beıneý aýdany
