Byltyr el azamattary shetelge 8,2 mln márte shyǵypty. El ishindegi kýrorttarǵa barǵandardyń sany birshama azdaý – 5 mln shamasynda. Sonyń ózinde 5 mln-dyq meje burnaǵy jyldarmen salystyrǵanda aıtarlyqtaı joǵary kórsetkish eken. Koronavırýs pandemııasy saldaryna baılanysty bıylǵy jaǵdaı basqasha. Shekaranyń jabylýyna, el ishindegi qatynastardyń toqtaýyna baılanysty alǵashqy jartyjyldyqta saıahattaıtyndardyń qatary kúrt azaıdy. Kóptegen jerlesterimiz kóktemge josparlanǵan otandyq jáne sheteldik týrlardan bas tartty.
Shekara ashylǵannan keıin de bılet satyp alýǵa umtylǵandar shamaly. Kópshiligi qaýipsizdik maqsatynda saıahattan bas tartty, al keıbir adamdar múlde tabyssyz qaldy. Bul jaǵdaıda, qazaqstandyqtardyń kópshiligi ishki týrızmdi jón sanaıdy.
– Álbette, kóptegen týrıstik fırmalar jol júrý, tamaqtaný jáne kúneltý qunyn kóterýdi ázirshe toqtata turýdy jón sanap otyr. Sonyń arqasynda týrısterge jaǵymdy jaǵdaı týǵyzýdy kózdeıdi. Alaıda keıbir jerlerde baǵa shamamen 10 paıyzdaı kóterildi, – dep habarlady Freedom Finance Life.
Sonymen, elimizdegi eń áıgili týrıstik baǵyttarda demalý orta eseppen 14 myń teńge. Mysaly, Alakólde demalý úshin táýligine 9-10 myń teńge tóleý kerek. Zerendi men Býrabaıdaǵy baǵalar da soǵan uqsas. Al saýyqtyrý keshenderindegi baǵa odan joǵarylaý. Aıtalyq, Shyǵys Qazaqstandaǵy maral sharýashylyǵyndaǵy baǵa táýligine 22-32 myń teńge aralyǵynda.
2018-2019 jyldary sheteldik baǵyttardyń ishinde eń tanymaly Túrkııa, Mysyr, Birikken Arab Ámirlikteri, Taıland, Grekııa, Bolgarııa, Chehııa jáne Qytaı boldy. Byltyrdan beri halyqtyń talǵamy ózgerip kete qoımaǵany taǵy ras. Shetelde demalýdy qalaıtyn týrısterdiń 85 paıyzy osy elderdi tańdaǵany osyny kórsetedi. Sondaı-aq Grýzııa, Maldıv araldary men Shrı-Lanka da jerlesterimiz kóp tańdaǵan baǵyttardyń qataryna qosylypty.
Freedom Finance Life-tyń habarlaýynsha, Túrkııanyń kýrorttyq aımaqtarynda 1 apta demalý quny orta eseppen 350 myń teńgege tússe, Mysyrǵa barý úshin 260 myń teńge kerek. Taılandta 8 kún demalý – 290 myń teńge, Birikken Arab Ámirlikterinde – 350 myń teńge, Grýzııada 250 myń teńge turady. Maldıv araldaryna 6 kúnge barýdyń quny 400 myń teńge bolsa, Shrı-Lankaǵa barý úshin keminde 350 myń teńge kerek. Bul somaǵa ushaq bıleti men ortasha qonaqúıde turý kiretinin aıta keteıik.
Byltyr Qazaqstanda sheteldegi týrısterdi mindetti medısınalyq saqtandyrý tártibi engizildi. Atap aıtqanda, týroperatorlar ár týrısti saqtandyratyn bolǵan. Oǵan qosa, saqtandyrý kompanııalary da qosymsha saqtandyrý qyzmetin usynady. О́kinishke qaraı, saqtandyrý kompanııalarynyń kóbisi týrısterge COVID-19 pandemııasyna qatysty keleńsizdikterden saqtandyrý qyzmetin kórsetpeıdi.
