Máskeýdiń Batys Bırıýlevo aýdanynda 10 qazan kúni túnde 25 jasar Egor Sherbakovty túnde qyzynyń kóz aldynda pyshaqtap óltirdi degen kúdikpen izdeý jarııalanǵan ázerbaıjan jigiti quqyq qorǵaý qyzmetkerleriniń qolyna tústi. Bul týraly «Ýtro.Rý» habarlady.
Túnnen beri Internetke osy qylmysty jasady degen aıyp tańylyp otyrǵan 1982 jyly týǵan Ázerbaıjan azamaty Orhan Zeınalovtyń ustalý sátiniń sıýjeti túsip úlgerdi. Onda er kisiniń tártip saqshylaryna qalaı qarsylyq kórsetip jatqany anyq kórinip tur. Jerge etpetinen jatqyzylǵan ol túsindirme berý suralǵanda: «Meniń qazir álim joq. Kameraǵa baraıyq, bárin sol jerde aıtamyn», dep jaýap qaıtardy.
Orhan Zeınalovtyń qaıda tyǵylyp jatqanyn kórsetip bergen adam týraly ázirge derek joq. «Moskva 24» telearnasynyń málimeti boıynsha, kisi óltirýshini tabýǵa ol jaldap turǵan páterdiń ıesi 1 mln. teńge syıaqy ýáde berilgennen keıin járdemdesken. Al Iýrıı dep atalatyn bul jigit osydan eki kún ǵana buryn páter jaldaýshysynyń qaıda júrgenin bilmeıtinin, onyń on jyldan beri týystarymen Máskeýde turyp kele jatqanyn, sol kezden beri kórshi turǵandaryn aıtyp berip edi. Al «Komsomolskaıa pravda» gazedi Zeınalovty Kolomnanyń Ortalyq saıabaǵynda kezdesýge shaqyrǵan týystary ustap berdi degendi shyǵaryp otyr.
Qalaı degende de, Orhan Zeınalov keshe, seısenbi, 15 qazan kúni keshke Kolomna qalasynda SOBR sarbazdarynyń áreketi arqyly qolǵa tústi. Ol qazir ýaqytsha oqshaýlaǵysh kameraǵa otyrǵyzyldy. Resmı emes áńgime barysynda Egor Sherbakovty óltirgenin moıyndaǵan. Búgin, sársenbi kúni alǵashqy tergeýge shaqyrylady. Budan basqa, kúdiktiniń ózge de qylmystarǵa qatysy tekseriledi.
Sáken Maılybaı.
