Rýhanııat • 14 Shilde, 2020

Shertershiler qurǵan onlaın-ansambl

35 ret kórsetildi

Karantın ýaqyty óner adamdarynyń ózgeshe izdenisine, tyńdarmandarmen jańa baılanys ornatýyna múmkindik ashýda. Oǵan dálel elimizde alǵash ret onlaın joba negizinde qurylǵan shertershiler ansambli. Bul ansambl ár oblystan mýzykanttardyń basyn biriktirip, qazaqtyń kóneden kele jatqan ulttyq aspabyn nasıhattaýda.  

Sherter dombyraǵa uqsas shaǵyn ǵana aspap. Onymen kúı, án oryndaýshylar az bolǵandyqtan da kópshilik bul aspapty bile bermeıdi. Sondyqtan da ony nasıhattaýdy árbir shertershi ózine úlken mindet sanaıdy. Al ansambldi qurý ıdeıasyn usynǵan Soltústik Qazaqstan oblystyq fılarmonııasynyń "Álqıssa" folklorly ansambliniń jáne Segiz seri atyndaǵy qazaq ulttyq ınstrýmentaldy orkestriniń solısi Tatıana Býkırova. Bul oı oǵan 2018 jyly Petropavl qalasynda ótken, shertershilerdiń basy qosylǵan respýblıkalyq "Gaýhar tas" festıvalinde týyndaǵan edi. Ony júzege asyrý dál osy pandemııa kezinde múmkin bolǵan.

Onlaın-ansambldiń qalaı qurylǵandyǵy jóninde Tatıananyń ózi bylaısha áńgimelep berdi.

- Kóktemnen bastap qashyqtan jumys isteýge kóshtik. Osy kezde bekerge qarap jatamyn ba degen oımen elimizdiń túkpir-túkpirindegi shertershilerge habarlasyp, ansambl qurý týraly oıymdy aıttym. Bastapqy kezde jeti shertershi bolyp, Aıbol Qudaıbergenovtiń "Jeldirme" kúıin oryndap, kópshilikke tarattyq. Birte-birte qatarymyz qosylyp, qazir on adamǵa jetti,  – deıdi ol.

Ansamblge shyǵarmasy arqaý bolǵan Almaty oblystyq fılarmonııasynyń "Sazgen" folklorly-etnografııalyq ansambliniń aspapshysy, sazger Aıbol Qudaıbergenov:

- Maǵan habarlasyp, ansambldiń oryndaýyna shyǵarmamnyń usynylyp otyrǵanyn aıtqanda tańdanǵanymdy jasyra almaımyn. Shyǵarmamnyń el kólemine keń taralǵanyn bilmeppin. Ony 2003 jyly jazǵan edim. Keńesip bári biraýyzdan osy kúıdi tańdaǵan soń, notasyn alyp daıyndalyp, árkim óz úıinen oryndap beınejazbasyn Tatıanaǵa jiberdi. Ár jazbany biriktirip, óńdep, ansambl quraý ońaı bolǵan joq. Biraq, bul Tatıananyń qolynan keldi, – deıdi sazger.

Búginde ansambldiń quramynda Tatıana men Aıboldan basqa Pavlodardan Amanjol Jumalın, qyzylordalyq Baǵdat Qudaıbergenov, Nur-Sultan qalasynan Erbol Muhamedıev, kókshetaýlyq Ánýarbek Faızýllın, О́skemennen Alýa Táshenova, qostanaılyq Berik Orazalın, Aqtaýdan Baýyrjan Kóbenǵalıev, shymkenttik Erlan Dáýrenbekov bar.

Jýyrda ótken Ulttyq dombyra kúninde Abaıdyń "Tory jorǵa" kúıin kópshilik nazaryna usynǵan ansambl kezekti shyǵarmasyn jaryqqa shyǵarý úshin daıyndyq ústinde.

Sońǵy jańalyqtar

Tumandy Albıondaǵy COVID-19

Koronavırýs • Keshe

Afrıkany kezgen COVID-19

Koronavırýs • Keshe

Uqsas jańalyqtar