Koronavırýs indetin juqtyryp, aýrýmen arpalysyp jatqan naýqastarǵa jasandy tynys alý apparattaryn alyp berip jatqan demeýshi azamattar da az emes. "Qazfosfat" jaýapkershiligi shekteýli seriktestiginiń bas dırektory, Qazaqstannyń Eńbek Eri Muqash Eskendirov qıyn-qystaý kezeńde jambyldyqtarǵa kómek kórsetti. Ol óziniń jeke qarajatynyń esebinen árqaısysynyń quny 580 myń teńge turatyn jasandy tynys alý apparattaryn satyp alyp, Jambyl oblystyq aýrýhanasyna tapsyrdy.
"Biz aýyryp em izdep emes, aýyrmaıtyn jol izdeýimiz kerek. Aýyrmaıtyn negizgi jol – barynsha saqtyq sharalaryn saqtaý bolyp otyr. Áli de keıbir adamdardyń tártipke baǵynbaı, túrli jıyndar jasap jatqanyn estip kelemiz. Biz eger búgingi kúnimizdi ǵana oılaıtyn bolsaq, onda onyń sońy qaıǵyly jaǵdaımen aıaqtalýy múmkin. Men oblystyń, qalanyń turǵyndarynan úıde otyryp, qaýipsizdik máselesin barynsha saqtaýdy suraımyn", deıdi Eńbek Eri.
Jambyl oblysy
