Elbasy Úkimettiń keńeıtilgen otyrysynda sóılegen qorytyndy sózinde elimizdi áleýmettik-ekonomıkalyq damytýda qol jetken jetistiktermen qatar memlekettik organdar jumysynda kemshilikterdiń de bar ekendigin qadap-qadap kórsetip berdi. Bul kemshilikter enjarlyqtyń, nemquraılylyqtyń, boıkúıezdiktiń saldary ekendigi anyq.
Elbasy sózi jurtshylyqtyń kókeıindegini qozǵady. Redaksııa poshtasyna kelip jatqan pikirlerdiń bir legi, azamattardyń onda jazylǵan pikirleri men usynystary osyny kórsetip otyr.
Tekserýshiler de tekserilsin
Elbasy aldymyzǵa úlken mindet qoıdy. Ol – ekonomıkasy barynsha damyǵan 30 eldiń qataryna qosylý. Áne-mine degenshe onyń alǵashqy jyly da óte shyqty.
Mine, osy úlken maqsatqa elimizde kim qandaı úles qosyp otyr? Tańerteń jumysyna asyqqan árbir el azamatynyń oıynda «men búgin elimniń dárejesin bir mysqal bolsa da joǵary kóteretin qandaı paıdaly qyzmet isteımin?» degen saýal tura ma? Álde jumys kúnin áýpirimdep ótkizip, úıine qaıtýdy ǵana oılaı ma? Bálkim, bir ońtaıly tustan kózi shalǵan kóldeneń paıda kókeıin tesip bara jatqan shyǵar?..
Elbasy Úkimettiń keńeıtilgen otyrysynda sóılegen qorytyndy sózinde elimizdi áleýmettik-ekonomıkalyq damytýda qol jetken jetistiktermen qatar memlekettik organdar jumysynda kemshilikterdiń de bar ekendigin qadap-qadap kórsetip berdi. Bul kemshilikter enjarlyqtyń, nemquraılylyqtyń, boıkúıezdiktiń saldary ekendigi anyq.
Elbasy sózi jurtshylyqtyń kókeıindegini qozǵady. Redaksııa poshtasyna kelip jatqan pikirlerdiń bir legi, azamattardyń onda jazylǵan pikirleri men usynystary osyny kórsetip otyr.
Tekserýshiler de tekserilsin
Elbasy aldymyzǵa úlken mindet qoıdy. Ol – ekonomıkasy barynsha damyǵan 30 eldiń qataryna qosylý. Áne-mine degenshe onyń alǵashqy jyly da óte shyqty.
Mine, osy úlken maqsatqa elimizde kim qandaı úles qosyp otyr? Tańerteń jumysyna asyqqan árbir el azamatynyń oıynda «men búgin elimniń dárejesin bir mysqal bolsa da joǵary kóteretin qandaı paıdaly qyzmet isteımin?» degen saýal tura ma? Álde jumys kúnin áýpirimdep ótkizip, úıine qaıtýdy ǵana oılaı ma? Bálkim, bir ońtaıly tustan kózi shalǵan kóldeneń paıda kókeıin tesip bara jatqan shyǵar?..
Úkimettiń keńeıtilgen otyrysynda Elbasy Nursultan Nazarbaev ashyna aıtqan, ıaǵnı memleketimizdegi ıgerilmegen qyrýar qarjy, aýqymy birdeı qurylys nysandaryna bólingen aqshadaǵy aıtarlyqtaı aıyrmashylyqtar men tender ótkizýdegi sybaılas jemqorlyqtar bizdi osyndaı kúmándi oıǵa sharasyz jeteleıdi. Mysaly, Elbasynyń jobalyq-smetalyq qujattardy daıyndaý isindegi qıturqylardyń qalaı júzege asyrylatynyn ashyp kórsetip, osyndaı kúdikti fırmalardyń qyzmetinen bas tartyp, olarǵa aqsha aýdarýdy toqtatýdy talap etýi óte oryndy dep bilemiz.
Memleket qarjysynyń qoldy bolmaýyn qadaǵalaý tek qana tıisti organdardyń mindeti dep qarap otyrý durys emes. Qaterli aýrýdaı jyldan-jylǵa asqynyp, irili-usaqty birqatar sheneýnikterdiń ońaı olja tabatyn «kásibine» aınalyp bara jatqan bul qubylysqa ákimderden bastap búkil halyq bolyp qarsy turýymyz kerek. Áıtpese, Aqmola oblysyndaǵydaı 1200 oqýshy emes, bar bolǵany júzshaqty oqýshyny qamtıtyn mektepke eki qabatty óte úlken ǵımarat salyp, oǵan mıllıardqa jýyq qarjy bólingeni týraly kezinde el gazeti – «Egemen Qazaqstan» janǵa batyra jazǵan bolatyn. Sondaı-aq, toqsanynshy jyldary jekeshelenip ketken túrli áleýmettik nysandardy búgingi qojaıyndarynan memleket qarjysyn aıamastan úsh-tórt ese qymbat baǵasyna satyp alyp, osy qomaqty qarjynyń ishindegi ózine tıesili «paıyz» arqyly op-ońaı baıýdy ádetke aınaldyrǵan ákimqaralar da joq emes.
Elbasymyz elimizdegi shaǵyn jáne orta bıznesti damytý týraly únemi aıtyp keledi. Olardy jón-josyqsyz teksermeý úshin moratorıı jarııalaǵanyn da bilemiz. Osy qamqorlyqtyń nátıjesinde el kásipkerleriniń tasy órge domalap, olardyń ekonomıkalyq áleýetteri az jyldyń ishinde ájeptáýir arta tústi. Degenmen, pıǵyly teris tekserýshiler yńǵaıyn taýyp kásibin endi bastaǵan azamattardy bopsalaýyn toqtatpaı otyrǵany belgili. Sondyqtan Elbasynyń el prokýratýrasyna tekserý sharalaryn qysqartý boıynsha usynys ázirlep, zańsyz tekserý bastamashylaryn jazalaýdy tapsyrýy óte oryndy dep bilemin.
Baǵlan TELEÝOV,
Taraz qalasynyń prokýrory.
Taraz.
Energııany nege únemdemeımiz?
Memleket basshysy Nursultan Nazarbaevtyń tóraǵalyǵymen ótken Úkimettiń keńeıtilgen otyrysy 9 aıdyń qorytyndylaryn shyǵarýmen ǵana emes, alda turǵan asqaraly asýlardy jan-jaqty saralaýmen de erekshelendi. Onda qozǵalǵan máselelerdiń qaı-qaısysy bolsyn óte aýqymdy. El ómiriniń jaqsarýyna, qarqyndy damýyna tikeleı qatysy bar máseleler ishinde Elbasy Úkimet pen jurtshylyq nazaryn energııa únemdeý men energııa esepteýge aýdaryp, bul salaǵa jetkiliksiz kóńil bólinetinin, pármendi nasıhattyń, túsindirý jumystarynyń álsizdigin atap kórsetti.
Búginde qýat jáne resýrs kózderin únemdeý, orynsyz ysyrapqa jol bermeý, aldyn alý sharalaryn qarastyrý – ǵalamdyq dárejedegi túıtkilderdiń biri ekeni jasyryn emes. Onyń shyǵyndaryn barynsha azaıtýdyń joldary Qazaqstanda memlekettik saıasattyń quramdas bóligi retinde qarastyrylyp, kún tártibine aıryqsha qoıylýy sondyqtan. Prezıdent ındýstrııalyq-ınnovasııalyq údemeli damý sheńberinde ishki jalpy ónimniń qýat jumsaýyn 2015 jylǵa qaraı keminde 10 paıyz, al 2020 jylǵa taman 25 paıyz azaıtý talabyn qoıdy. Osyndaı pármendi ári júıeli sharalar arqyly ǵana ekonomıkanyń básekege qabiletin arttyrýǵa, elimizdiń energetıkalyq qaýipsizdigin qamtamasyz etýge, «jasyl ekonomıka» tujyrymdamasyn sátti júzege asyrýymyzǵa múmkindik týary sózsiz.
Oblysta elektr jelileri boıynsha qýat berý men taratý qyzmeti jyl ótken saıyn qarqyn alyp, jańǵyrtý jáne qaıta jabdyqtaý jumystaryna qomaqty qarjy bólinýde. Máselen, «Petropavl jylý jelileri» JShS-niń ıeliginde 230 shaqyrym jylý trassasy men 50 qubyr stansasy bolsa, aǵymdyq jáne kúrdeli jóndeý jumystaryna ınvestısııalyq qarajat tıimdi paıdalanylýda. Desek te, monıtorıngtik taldaý kórsetkendeı, oblys ortalyǵyndaǵy jylý jelileriniń 60-70 paıyzy qaıta qalpyna keltirýdi talap etse, júzden astamynyń paıdalaný merzimi ótip ketken. Buǵan bir myńǵa tarta kópqabatty úılerdiń 115-inde basqarý nysany joqtyǵyn eskersek, jaǵdaıdyń áli kúrdeli ekenine kóz jetkizemiz. Memleket tarapynan berilip jatqan mıllıardtaǵan qarajatqa qaramastan elektr jáne jylý qýattaryn barynsha berekelikpen paıdalanbaýymyz árkimdi oılandyrsa kerek.
Meniń qala turǵyny retinde bir baıqaǵanym, áleýmettik sala mekemeleri qysqy jylytý maýsymyna tyńǵylyqty ázirlengenimen, jeke turǵyn úı nysandarynyń daıyndyǵy kóńil kónshite bermeıdi. Máselen, energetıkalyq keshenniń, turǵyn úı nysandarynyń, áleýmettik sala mekemeleriniń 2013-2014 jyldardaǵy jylytý maýsymyna daıyndyǵy talqylanǵanda jekelegen páter ıelerine kóp syn aıtyldy. Elektr, jylý qýat kózderin taratýshy kompanııalardyń normatıvtik-tehnıkalyq shyǵyndar kólemin 2000 jyly 17 paıyzdan 2012 jyly 13 paıyzǵa deıin azaıtýy quptarlyq bolǵanymen, kópqabatty turǵyn úılerge jalpyǵa ortaq jylý eseptegish quraldaryn ornatýdyń ýaqtyly qanaǵattandyrylmaýy oılandyrmaı qoımaıdy. Búginge deıin Petropavl qalasy boıynsha tutynýshylardyń 22 paıyzy ǵana osyndaı quraldarmen qamtylǵan. 1 shildeden «Energııa únemdeý jáne energııa tıimdiligin arttyrý týraly» Zań qoldanysqa enip, aldaǵy jyldan bastap tutynýshylar jylý qýatyn paıdalanǵan qyzmet aqysyn saralanǵan tarıf aıasynda tóleıtin bolady. Osy kezde eseptegish quraldy paıdalanýshylar onyń tıimdiligin aıqyn sezinip, mindetti tólemaqylardy ájeptáýir qysqarta alary anyq. Mundaı qýat únemdeý sharasynyń mańyzdylyǵyna Elbasy erekshe toqtalyp ótti.
Sońǵy kezderi páter ıeleri jylý berý júıesine eseptegish quraldardyń tıimdiligin túsinip, «Turǵyn úı-kommýnaldyq sharýashylyqty jańǵyrtý-2020» baǵdarlamasy arqyly ornatýǵa nıettenip jatqanymen, keı kezderi olardyń ótinishterin qanaǵattandyrý tym uzaqqa sozylyp ketedi. О́ıtkeni, tehnıkalyq sharttar men jobalyq-smetalyq qujattamalardy ázirleýdiń mashaqaty kóp. Menińshe, qaǵazbastylyqtan arylyp, jeńildetilgen joldaryn qarastyrǵan durys bolar edi. Sol sııaqty, tok kózin urlaıtyn adamdardyń zańsyz is-áreketterine de tosqaýyl qoıatyn mezgil jetti.
Sergeı HÝDIаKOV,
páter ıeleri kooperatıvteri
assosıasııasynyń tóraǵasy.
Soltústik Qazaqstan oblysy.
Igere almasa, ıgeretinderge bersin
«Bul elde qarajatty menen basqa baqylaıtyn eshkim joq pa?». Úkimettiń keńeıtilgen otyrysynda Elbasy Nursultan Nazarbaev osylaı dedi. Teledıdar aldynda otyrǵan biz de úlken oıǵa qaldyq. Shynynda memlekettiń qarjysy qashanǵa deıin jeke adamdardyń ıgiligine aınala beredi? Iri kólemde qarjy qymqyryp, shetel asyp jatqan adamdar týraly aqparat quraldarynan kúndelikti aıtylyp jatyr. Sonda olardy baqylaıtyn, jumystarynyń aq-qarasyn anyqtaıtyn, bıýdjet aqshasynyń nysanaly túrde jaratylýyn qadaǵalaıtyn tıisti organdar qaıda qarap otyr? Álde memleket qazynasyna Prezıdentten basqa eshkimniń jany ashymaǵany ma?
Osy jıynda taǵy bir másele kóterildi. Ol bólingen qarajattyń ıgerilmeı qalýy. Álemdik deńgeıde qaraıtyn bolsaq, talaı eldiń qarjy qyspaǵyna túsip, bıýdjetteriniń túbin qaǵyp, halqyna aılyǵy men zeınetaqysyn tóleı almaı qınalyp jatqanyn kóremiz. Jańadan qala turǵyzbaq túgili, bir ǵımarat sala almaı otyrǵan memleketter bar. Azýly Eýropanyń ózinde kúnde ereýil. О́ıtkeni, aqsha joq. Halqy ulardaı shýlap kóshede júr. Osynyń saldarynan talaı memleket belsheden qaryzǵa batyp, defolttyń aldynda tur. Al Qazaqstanda she? Aldyn ala esepteýler boıynsha bıýdjetten bólingen 150 mıllıard teńge shamasyndaǵy qarjy ıgerilmeı qalǵaly tur eken. Bul ne sonda? Bardy uqsata almaý ma? Qoldaǵy altynnyń qadirin bilmeý me? Álde memlekettik basqarý oryndarynda otyrǵan adamdardyń óz jumysyn tıisti dárejede atqara almaı otyrǵanynda ma? Suraq kóp. Jaýap mardymsyz.
Jyl basynda bıýdjet belgilenedi. Ár sala boıynsha qajettiligine qaraı qarjy bólinedi. Osy jerde birshama olqylyqtar ketetin sııaqty. Sondyqtan bólinetin qarjyny bireýdiń kózi, ekinshiniń sózi jaqsy demeı qany jerge tambaı turǵan, elge eleýli paıda ákeletin, halyqtyń muń-muqtajyn oryndaıtyn salalarǵa berý kerek. Al dabyrasy kóp, biraq halyqqa kók tıyndyq paıdasy joq iske qarjy bólmeý shart. Qanttaı ǵyp qujat daıyndap, qaǵaz túrinde bárin tastaı etetinderge qarjy bergenshe, ony ıgere alatyn, el múddesine jaratatyn adamdarǵa bersin. Áıtpese, bizdiń ıgerilmegen qarjynyń ózi keıbir memleketterdiń jyldyq bıýdjetine jetetin kún de alys emes tárizdi. Memlekettiń qarjysy jurttyń paıdasyna jumsalýy qajet. Onyń ıgerilmeı jatqanynan eshkimge paıda kelmeıdi.
Gúlshat DÚZELBAEVA,
ekonomıka ǵylymdarynyń kandıdaty.
Qyzylorda oblysy.
Et satatyn el bolamyz ba desek...
Men jasymnan mal baǵyp ósken sharýanyń balasymyn. Onyń kútimin, jaǵdaıyn jaqsy bilemin. О́tken jyly mal sharýashylyǵymen aınalysatyn aýyl adamdaryna arnalǵan «Sybaǵa» nesıesin aldym. Kóp emes, bir mıllıon teńge. Oǵan iri qara alyp, ósirip etke ótkizgim kelgen. Biraq osydan tapqan paıdamnan zııanym asyp turǵan sekildi. Sebebin aıtaıyn.
Aldymen aıtarym, memleketke qoıar eshqandaı kinám joq. Eńbek etemin degenge qarjylaı kómek berip-aq otyr. Alaıda, osy nesıe qolyma tıgenshe shashym aǵaryp ketti. Sáýir aıynda nesıege ótinish bergen edim, ol qolyma tamyz aıynda zorǵa tıdi. Qostanaı qalasyna kúnde júgirýmen sharshadym. Jolǵa ketetin aqshany aıtpaǵanda, naýqandyq jumys kezinde aýyldaǵy sharýanyń ár mınýt ýaqyty altynnan qymbat. Bir mıllıon teńge nesıe aýyl adamy úshin ájeptáýir qarjy bolyp tabylady. Alaıda, aýylda mal ósirip, et molshylyǵyn jasaǵysy keletinderge beriletin nesıeniń sharty sharýany tyǵyryqqa tireıdi. О́ıtkeni, nesıeni bergen «Aýyl sharýashylyǵyn qarjylaı qoldaý qory» aksıonerlik qoǵamy maldan túsetin paıdanyń merzimimen sanaspaıtyn syńaıly. Olar bir jylǵa jetpeı nesıeniń jartysyna jýyǵyn qaıtarýdy talap etti. Al meniń nesıe qarjyǵa satyp alǵan malym áli ósip, ónim berip úlgergen de joq qoı. Bir buzaýdyń paıdasyn kórý úshin keminde úsh jyl ýaqyt kerek. Men nesıeniń 450 myń teńgesin qaıtarý úshin basqa bankten joǵary ústeme ósimmen amalsyz taǵy da nesıe aldym. Sonda meniń tapqan paıdam qaısy? Bul bir.
Jer máselesi. Shabyndyq pen jaıylymdy oılasań, tipti mal ustaǵyń kelmeıdi. Meniń qazir satyp alǵanym bar, ózimniń burynnan qoradaǵy malym bar, barlyǵyn eseptegende 20 sıyr, 30 qoı, bes jylqy baǵyp otyrmyn. Al jaıylymdyq, shabyndyq jerim 30 gektar ǵana. Oǵan mal toıa ma? Aýyl aınalasynyń barlyǵy aıqush-uıqysh jyrtylǵan, úıden shyǵa jaıqalǵan egin.
Sharýanyń alty aı jaz mańdaı terin sypyryp júrip, baǵyp-qaqqan malyn etke satyp alýdy memleket uıymdastyrsa jaqsy bolar edi. Bazarda et qymbat, al ony alypsatarlar sharýalardan 2-3 ese arzan alady, onyń bir kılogramynyń baǵasyn 500 teńgeden asyrmaıdy. Meniń bir sıyrymnyń tirideı salmaǵy 150 kılogramm bolyp qalady. Ony álgi baǵamen bersem, barlyǵy 75 myń teńge ǵana shyǵarady eken. Etti laboratorııaǵa tekserýge bergenim, kólikpen tasyǵanym úshin shyǵarǵan qarjylarymdy eseptesem, sıyrym munan da arzandaı túsedi. Mundaı baǵa sharýanyń eńbegine obal emes pe? Eger aýyl adamdarynyń mal sharýashylyǵymen aınalysýyna jaǵdaı durys jasalsa, etti úıip tastar edi. Búgingideı sapasy beımálim et syrttan kelmes edi. Qazir ózge óńirdi qaıdam, men turǵan Altyn dala aýyly turǵyndarynyń 70 paıyzy mal ustamaıdy. О́ıtkeni, jaıylym tar, jemshóp qymbat. Jurttyń barlyǵy da saýatty, esepteı kelgende baqqan maly eńbegine arzymaıdy dep biledi. Aýylda otyryp, et úshin qaladaǵy bazarǵa júgiredi. О́zimizge jetpeı jatqan etti Reseıge qaıdan shyǵaramyz sonda?..
Ádilhan OTAShEV,
«Otashev» sharýa qojalyǵynyń jetekshisi.
Qostanaı oblysy,
Qostanaı aýdany,
Altyn dala aýyly.
Jobalardy jaqsylap zertteıtin bank qyzmetkerleri joq
Elbasymyz shaǵyn kásipkerlikke únemi qoldaý kórsetip keledi. Úkimettiń keńeıtilgen otyrysynda da aıtqandary naǵyz shyndyq. Osydan-aq Prezıdenttiń saladaǵy shynaıy jaǵdaıdy naqty kórip-bilip otyrǵanyn sezýge bolady. Qazir ekinshi dárejeli bankterdiń talaptary óte qatal. Mysaly, men basqaratyn JShS-i «Qazınvestbankinen» 400 mıllıon teńge nesıe alýǵa nıettenip, barlyq qujattardy tapsyrdy. Bank biz qalaǵan somada nesıe berdi, biraq, anany-mynany syltaý qylyp, aqyrynda 400 mıllıonnyń 150 mıllıonyn ǵana qolymyzǵa ustatty. Endi búginde ne bıznesimizdi damytý úshin jany ashyp, qarjylaı kómektespeıdi, ne basqa bankterden nesıe alýǵa múmkindik bermeıdi. Dál osyndaı jaǵdaıdan kóptegen kásipkerler japa shegýde. Qazir báriniń bankke qaryzy kóp. Tórt jyl boıy Qazaqstan ulttyq ekonomıkalyq palatasy «Atameken odaǵy» oblystyq fılıalynyń tóraǵasy qyzmetin atqardym. Iаǵnı, bul salany bes saýsaǵymdaı bilemin. Meni osylaı áýre-sarsańǵa salyp jatqanda kásipkerlikti jańadan bastaǵandarǵa ne joryq?!
Taǵy bir másele, «Bıznestiń jol kartasy-2020» baǵdarlamasy boıynsha kásipker bankten jyldyq ústemeaqysy 14 paıyzdy quraıtyn nesıe alýyna bolady. Onyń 7 paıyzyn memleket «Damý» qory arqyly ózi japsa, qalǵanyn kásipker tóleıdi. Biraq qaǵaz júzinde bári keremet bolǵanymen is júzinde bank aqshany ońaılyqpen bermeıdi. Sebebi, basyn aýyrtyp bıznes-jobalardy tyńǵylyqty zerttegisi kelmeıdi. Tipti, ondaı mamandar bankterde joqtyń qasy. Men osy ýaqytqa deıin jobalardy zerttep júrgen bank qyzmetkerlerin kórmedim.
Qalı SARMAN,
«Qaınar maı» JShS-niń dırektory.
Ońtústik Qazaqstan oblysy.
Keleli máseleler kóterilgen keńes
Keshe Qazaqstan Respýblıkasynyń Memlekettik hatshysy M.Tájın Úkimettiń 2013 jylǵy 11 qazanda ótken keńeıtilgen otyrysynda Memleket basshysy bergen tapsyrmalardyń oryndalý barysyn aqparattyq turǵyda jarııalap-kórsetý máselesi boıynsha respýblıkalyq BAQ basshylarymen keńes ótkizdi, dep habarlady Prezıdenttiń baspasóz qyzmeti.
BAQ basshylarymen birlesip, aqparattyq jumysty uıymdastyrýdyń jáne júrgizýdiń qadamdary talqylandy.
Keńes barysynda Memlekettik hatshy otandyq BAQ ókilderine memlekettiń ekonomıkalyq saıasatynyń strategııalyq baǵyttaryn, jedel sheshýdi qajet etetin ózekti jáne ótkir áleýmettik-ekonomıkalyq máselelerdi jarııalap-kórsetýge nazar aýdarýdy usyndy.
Sondaı-aq, mádenıet, aqparat jáne ıdeologııa salalaryndaǵy memlekettik organdar qyzmeti qaraldy. Memleket basshysy aıtqan syn-eskertpeler men alǵa qoıǵan mindetter aıasynda bul jumysqa ózgerister engizý qajettigi atap ótildi. Is-sharada áleýmettik-ekonomıkalyq taqyryp boıynsha jýrnalısterdiń arnaýly pýldaryn qurý týraly sheshim qabyldandy. Buǵan qosa, arnaýly reportajdar jasaý arqyly Qazaqstan Prezıdentiniń tapsyrmalaryn oryndaý taqyrybynda memlekettik organdar basshylarynyń brıfıngterin ótkizý júıesi jónindegi aqparattyq materıaldar men jańalyqtardy ázirleý jáne jetkizý formattary jańartyldy.
«Memleket basshysy syn tezine aldy, aıqyn mindetter qoıdy jáne naqty merzimderdi belgilep berdi. Buqaralyq aqparat quraldary ortalyq jáne jergilikti memleket organdarynyń jumysyn aqparattyq turǵyda baqylaýǵa alyp, osy baǵytta ne istelip jatqany týraly jurtshylyqty jedel habardar etip otyrýǵa tıis», dep atap ótti Memlekettik hatshy M.Tájın.
Keńes qorytyndysynda memlekettik aqparattyq saıasatqa jaýapty memlekettik organdarǵa Qazaqstan Prezıdentiniń synı eskertpeleri men tapsyrmalaryn iske asyrý aıasynda tıimdi úılestirý jáne BAQ-pen ózara is-qımyldy qamtamasyz etý jóninde naqty mindetter júkteldi.
Saıt sózi
www.egemen.kz
Prezıdent aıtýdaı aıtty. Oblystarda shyn máninde ne bolyp jatqanyn jaqsy biletinin bildirdi.
Qasıet.
* * *
Elbasy talaptar men mindetterdi óte jaqsy qoıǵan eken. Kópten beri dál mundaı qatqyl tonmen, qatań talappen aıtylǵan tapsyrmalar bolmaı ketip edi, bul endi mınıstrlerimiz ben ákimderimizdi serpiltse durys bolar edi.
Ospan.
* * *
Memleket basshysy tarıh týraly jaqsy aıtty. Rasynda da halyqtyń tarıhy asarmen jazylatyn sharýa emes. Onymen naǵyz kásibı mamandar aınalysýlary kerek. Jáne bul tarıhshy ataýlynyń báriniń taqyryby bola almaıdy, ony tek Qazaqstan tarıhyn burynnan túbegeıli zerttep kele jatqandardyń qoldaryna berý kerek.
Saǵat.
