Atap aıtqanda, Nur Otan partııasy janyndaǵy Jas Otan jastar qanatynyń Mańǵystaý oblystyq fılıaly "Jańaózen sút zaýytynyń" qoldaýymen dárigerlerge shubat, shalap, aıran men qaımaq sııaqty sút ónimderin taratyp berdi. Munda kúni-túni eńbek etip júrgen dárigerler Aqtaý qalasyndaǵy 4 qonaqúıge ornalastyrylǵan. Osy dárigerlerge jemis, sút ónimderin jetkizip berý Mańǵystaý oblysyndaǵy Nur Otan partııasy fılıalynyń baqylaýynda.
Sonymen qatar Mańǵystaýda Nur Otan partııasynyń baqylaýymen Birikken Arab Ámirliginen jetken medısınalyq qural-jabdyqtar qala men aýdandarǵa taratyldy.
BAÁ-den kelgen gýmanıtarlyq kómekte medısınalyq betperde, qolǵap, qorǵanys kıimi, test synamasy, IVL apparaty jáne t.b. bar. Oblys ákimdiginiń janynan depýtattar, qoǵam belsendileri jáne jýrnalısterden quralǵan arnaıy baqylaýshy jumys toby óz qyzmetin atqardy. Maqsat – kelgen barlyq zatty qala, aýdandardyń qajettiligine qaraı bólinýine jurtshylyq atynan atsalysyp, óz úlesterin qosý.
Al Jas Otan jastar qanaty Batys Qazaqstan oblysy fılıalynyń eriktileri "Aq halatty abzal jandar aýyrmasyn" atty arnaıy aksııa bastady. Jasotandyqtar indettiń ortasynda júrgen dárigerlerge qoldaý kórsetip, ımmýnıtetin kóterý úshin olarǵa saýmal jetkizip jatyr.
Nur Otan partııasy Batys Qazaqstan oblysy fılıaly tóraǵasynyń birinshi orynbasary Murat Muqaev bastaryn qaterge tigip, koronavırýs juqtyrǵan naýqastardy emdep júrgen aq halattylarǵa barshamyz shamamyz kelgenshe qoldaý kórsetýimiz kerek deıdi. Sondyqtan "Jaılaý" sharýa qojalyǵymen kelisimge kelip, endi 1 aı boıy medısına mamandaryn tegin saýmalmen qamtamasyz etedi.
"Jaılaýdan" alynǵan 1 tonna saýmaldy jasotandyq eriktiler bir aı boıy BQO juqpaly aýrýlar aýrýhanasyna jetkizip otyrady. Olar atalǵan aksııany aýyldarda da júzege asyrýǵa shaqyrdy.
"Dárigerlerge myń alǵys!" – almatylyq jasotandyqtar bastaǵan aksııa osylaı atalady. Aksııanyń maqsaty – 4 aıǵa jýyq ýaqyt boıy óz ómirlerin qaterge tigip, búgingi qoǵamnyń batyrlaryna aınalǵan aq halatty abzal jandarǵa jastar atynan alǵys bildirý, qoldaý kórsetý.
Eriktiler 800-den astam densaýlyq sebetin daıyndady. Jıyntyqqa ımmýnıtetti nyǵaıtýǵa arnalǵan ónimder salynǵan. Atalǵan aksııaǵa Almaty qalasy boıynsha koronavırýstyn aldyn alý jáne boldyrmaý vedomstvoaralyq komıssııa qoldaý kórsetti.
Jasotandyq volonterler barlyq saqtyq sharalaryn eskere otyryp, aksııanyń alǵashqy kúninde Ortalyq qalalyq klınıkalyq aýrýhanaǵa, Qalalyq klınıkalyq juqpaly aýrýlar aýrýhanasyna jáne Qalalyq juqpaly aýrýlardyń klınıkalyq balalar aýrýhanasyna barady.
