Máselen, ótken aptada gýmanıtarlyq kómek retinde óńirge 48 myń dana qorǵanys kıimderi men qolǵap keldi. Odan keıin О́zbekstan memleketinen 100 mln teńgege 1,5 mln qutydan astam pandemııaǵa qajetti dáriler jetkizildi. Odan bólek Almaty qalasynan 2 tonna dári-dármek kelgen. Olar eń áýeli oblystaǵy aýrýhanalar men emhanalarǵa taratylyp berilýde.
О́ńirlik kommýnıkasııalar qyzmetinde ótken brıfıngte osyndaı derekterdi keltirgen oblystyq Qoǵamdyq densaýlyq basqarmasynyń basshysy Marat Pashımov qazirgi tańda naýqastar arnaıy protokol boıynsha em qabyldap jatqanyn málimdedi. Sondaı-aq dárilerdiń kelýin jáne tıisti mekemelerge durys taratylýyn, dárihanalarda belgilengen baǵada satylýyn qadaǵalaıtyn arnaıy shtab qurylǵanyn jetkizdi. Qazir kúndelikti qoımadan dárilerdiń aýrýhanalar men dárihanalarǵa úlestirý, sondaı-aq satylý baǵasyna monıtorıng jumystary júrgizilýde. Osy aptanyń sońyna deıin óńirde 22 túrli dári-dármektiń 128 myńnan astam danasy dárihana sórelerine satylymǵa shyǵady. Budan bólek, shilde aıynyń 20-nan keıin Túrkııa elinen oblysqa 41 túrli eýropalyq sapasy joǵary dárilik zattar jetkiziledi. Oblystaǵy dári-dármek jetispeýshiligin joıý maqsatynda ótken aptada Túrkistan qalasyna 136 túrli 2 tonna dári-dármek kelse, búgin 20 mln teńgege 140 túrli dárilik preparattar jetkizildi. Dárihanaǵa túsken dáriler shekti baǵamen satylady. Oblys ákiminiń orynbasary Sáken Qalqamanov bul prosesti arnaıy monıtorıngtik top baqylaıtynyn aıtty. Atalǵan dáriler jergilikti ákimdiktermen Memorandýmǵa otyrǵan 153 dárihanaǵa taratylady. Memorandýmda ákimdik pen dárihana mindettemeleri aıqyn kórsetilgen.
Búgingi kúnge deıin oblysta KVI ınfeksııasymen tirkelgen azamattar sany – 2341, onyń ishinde aýrýhanada jatqany – 196, jazylǵandar – 868. О́zgeleri ambýlatorlyq em alýda. Qaıtys bolǵandar sany – 22 adam. Pnevmonııamen aýyryp jatqan azamattar sany – 5400, jazylǵandar – 4200, al 1200 naýqas em qabyldaýda. Qaıtys bolǵandar sany – 56.
