Sýretti túsirgen Oqas AMANǴALI
Batys Qazaqstan oblysynyń bir top kásipkeri búgin oblystyq kópbeıindi aýrýhanaǵa 2 ottegi konsentratory men 400 pýlsoksımetr apparatyn syıǵa tartty.
"Bul jabdyqtar covid-19 indetimen kúreste dárigerlerge óte qajet kómekshi qural", deıdi aýrýhana dırektory Arman Baıdeýov.
Dúnıeni dúrliktirgen pandemııaǵa qarsy kúres elimizde jalpyhalyqtyq maıdanǵa aınaldy. Jurt bolyp jumylyp, dárigerlerge dem berýshi, aýrýhanalarǵa kómektesip jatqan aǵaıyn kóp.
"Koronavırýs pandemııasyna qarsy kúreske bizdiń kásipkerlerimiz taǵy da jumyldy. Búgin bizge ákelip otyrǵan 10 lıtrlik ottegi konsentratorlary – aýrýhanaǵa aýyr jaǵdaıda túsken naýqastar úshin óte qajetti qondyrǵylar. Pýlsoksımetr quraly bolsa naýqastyń qany quramyndaǵy ottegi mólsherin anyqtap, dál dıagnostıka qoıýǵa taptyrmas kómekshi. Dál qazir bizdiń oblystyq aýrýhanadaǵy provızorlyq stasıonarda 148 naýqas jatyr. Olardyń 80 paıyzy ottegi konsentratoryna qosylǵan. Al 10-15 paıyzy ókpeni jasandy jeldetetin apparattyń kómegine muqtaj. Aıta ketetin jáıt, naýqastardyń kóbi úıde emdelip, 10-12 kún ýaqyt ótkizip, aýrýdy asqyndyryp báribir bizge keledi. Osy jerde ǵana naqty dıagnozy anyqtalyp, kásibı medısınalyq járdem alady", deıdi oblystyq kópbeıindi aýrýhana dırektory.
Medısınalyq jabdyqtar Reseı Federasııasynan ákelingen. Kórshi memleketpen aradaǵy kelisimderge sáıkes, qajetti quraldar jeńildikpen, jedel jetkizilýde.
– Elde osyndaı qıyn jaǵdaı bolyp jatqanda biz, kásipkerler, qarap qara almadyq. Biz elmen birgemiz. "Bar bolsań, elge paıdań tısin" degen ataly sózdi eskerip, óz álimizshe azdy-kópti qarajat bólip, indetke qarsy kúreste kerekti qural-jabdyqtardy jetkizip jatyrmyz. Osy bastama ózge áriptesterimizge de úlgi bolsa deımiz. Indetti birge eńsereıik! – deıdi kásipkerler atynan sóz alǵan Dıdar Ásetov.
Batys Qazaqstan oblystyq ishki saıasat basqarmasy basshysynyń orynbasary Darhan Qanybekulynyń aıtýynsha, Batys Qazaqstan oblysy boıynsha "Aqjaıyq" qoryna osy kezge deıin oblys kásipkerlerinen 100 mln teńgeniń ústinde qarajat aýdarylǵan. Munyń bári ortalyqtandyrylǵan satyp alý júıesi boıynsha koronavırýs indetimen kúreske qajetti dári-dármek pen jabdyqtar alýǵa jumsalýda. Jaqynda ǵana 160 ottegi konsentratory Máskeý qalasynan Oralǵa jetkizilip, tıisti emdeý mekemelerine taratyldy.
Batys Qazaqstan oblysy
