KVI men vırýstyq pandemııa adamdardy qos ókpeden qysyp alyp uryp jatqany belgili. Al ókpeniń basty qoregi maı, sonyń ishinde mal ónimderi ekenin sheteldik dáriger-ǵalymdar da joqqa shyǵarmaıdy.
Osy oraıda "Nur Otan" partııasy "Jas Otan" jastar qanaty Aqtóbe oblystyq fılıalynyń eriktileri "Dárigerlerge myń alǵys!" aksııasy aıasynda oblystyq klınıkalyq aýrýhananyń qyzmetkerlerine óz esebinen jetkilikti túrde ulttyq sýsynnyń tóresi – sertıfıkattalǵan sapasy joǵary qymyz jetkizip berdi. Sondaı-aq buǵan deıin olar mundaǵy aq halatty abzal jandarǵa qýaty kúshti, qunary mol ystyq taǵamdar ákelip bergen edi.
"Bizdiń qatarymyzda qur jalań entýzıazymmen emes, belgili bir kásippen aınalysýǵa da ýaqyt taýyp, materıaldyq ıgilikti óz qoldarymen óndirip júrgender de bar. "Dárigerlerge myń alǵys!" sheńberindegi qaıyrymdylyq sharalaryna jumsalǵan qarajat negizinen sol volonterlerdiń shynaıy nıet bildirýi arqyly jınaqtaldy. Áıtse de olar bizge óz aty-jónderiniń atalmaýy jóninde talap-tilekterin jetkizdi. Ony nazarǵa almaýǵa moraldyq quqymyz joq", dedi gazet tilshisine JQ Aqtóbe oblystyq fılıalynyń keńesshisi Murat Mustafın.
Eshqandaı qaltarysy joq shynaıy aq adal kóńilden bildirilgen iltıpat kim kimniń de rızashylyq sezimin týǵyzbaı qoımaıdy. Bul rette ótken qasıetti juma kúni Aqtóbe medısına ortalyǵyna óz qoldaýlaryn kórsetýge kelgen jasotandyqtarǵa degen alǵys sezimin osy ujymnyń ınfeksıonıst-dárigeri Gúlmıra Qurmanbaı tómendegishe jetkizdi.
Másele syı men qurmettiń úlken-kishisinde emes, onyń taza júrekpen jasalýynda. Pandemııamen kúres bastalǵan kóktem kezden beri biz osyndaı kóńil tolqytarlyq jaǵdaılarǵa birneshe ret kýá boldyq. Sóıtip qandaı qıyn kezde de bizge qoldaý kórsetip janashyrlyq tanyta alatyn halqymyz bar ekenin tereńdeı sezine tústik. Munyń ózi bizge moraldyq jáne materıaldyq turǵydan úlken dem berdi. Mine, búgin aýrýhanaǵa jetekshi partııamyzdyń jas qyrandary kelip, óz yqylas-nıetterin bildirip otyr. Rahmet, aınalaıyndar, aldaryńnan aq kún týsyn.
Sondaı-aq ótken juma kúni atalǵan aksııa aıasynda "Nur Otan" partııasy Aqtóbe oblystyq fılıalynyń ókilderi Aqtóbe qalasyndaǵy "Darý" medısınalyq saýyqtyrý ortalyǵynyń janynan ashylǵan provızorlyq bólimshede bolyp, pnevmanııa derti boıynsha emdelip jatyrǵan naýqastarǵa jarty mıllıon teńgeniń azyq-túlik taýarlaryn jetkizip berdi.
AQTО́BE
