Mysaly, Túrkistan oblysy Sozaq aýdanynyń turǵyndary jergilikti kásipkerlerge sheksiz alǵystaryn bildirýde. Onyń ózindik sebebi de bar. Oblystyq máslıhattyń depýtaty, kásipker Maǵaýııa Turysbekov Túrkııadan 5 jasandy tynys alý apparatyn aldyrtyp, aýdandyq ortalyq aýrýhanaǵa tabys etpek. «Indet beleń alyp turǵanda, mundaı ottegi konsentratorlarynyń naýqastar úshin paıdasy zor. Adam ókpesi zaqymdanǵanda ottegi jetpeı qınalady. Bul apparat kóptegen adamnyń ómirine arasha bolady. Osy ýaqytqa deıin kásipker Bazarbaı Nurlanov 2 ottegi konsentratyn syıǵa tartty. Jalpy, aýdannyń azamattaryna úlken alǵysymdy aıtamyn. Atyn atamaýdy ótingen taǵy bir kásipker aýrýdyń ortasynda júrgen dáriger, medbıke, sanıtar, naýqas jandarǵa qunarly tamaqqa dep 300 myń teńgeniń as-aýqatyn aýrýhanaǵa jetkizip berdi. Taýkent kentindegi provızorlyq ortalyqqa «Saýran» JShS-nyń bas dırektory Marat Ospan, jeke kásipker Nurjan Muhanov esimdi azamattar qoı soıdy. Gúlzada Tólenova óz qarjysynan medısına qyzmetkerlerine arnap 100 dana betperde tikti», deıdi aýdandyq ortalyq aýrýhananyń bas dárigeri Talǵat Qaldybekov.
Aýdannyń týmasy Maǵaýııa Turysbekov jomarttyǵymen jurtqa jaqsy tanylǵan jan. Ol óz qarjysyna aýdandyq ardagerler úıin, Nur Otan partııasynyń ǵımaratyn salyp bergen bolatyn. Sondaı-aq tótenshe jaǵdaı kezinde «Biz birgemiz!» aksııasy aıasynda jaǵdaıy tómen 200 otbasyna azyq-túlik taratqan azamat, endi naýqastarǵa qıyn sátte de kómek berýdi maqsat etip otyr.
Aýrýhanalarǵa qajetti qurylǵylar alý, dárigerlerdi qoldaý baǵytyndaǵy saýapty is jasap júrgen jomart jandar oblystyń barlyq aýdandarynda bar. Mysaly, Túlkibas aýdanynyń erikti turǵyndary aýdandyq aýrýhanaǵa qazirgi tańda tazalyq úshin asa qajetti 5 birdeı avtomattandyrylǵan kir jýý mashınasyn tartý etti. Al Abaıyl men Jaskeshý aýylynyń azamattary ortaǵa qarjy jınap, 30 muqtaj otbasyna qurbandyqqa shalynǵan 2 iri qara men 2 qoıdyń etin, birinshi qajettiliktegi azyq-túlik jınaǵymen birge taratty. Buǵan deıin túlkibastyq demeýshiler men eriktiler ortalyq aýrýhanaǵa 210 ottegi ballonyn tartý etken bolatyn.
Jalǵasyn tabar qaıyrymdylyq isterdiń birqataryn ǵana aıtyp óttik. Jomart jandardyń qoldaýynan jaqsy habardar óńir turǵyndaryna adam birinshi kezekte óziniń densaýlyǵyn saqtaý arqyly da aınalasyndaǵy jandarǵa paıdasyn tıgizetini jıi eskertilýde.
Túrkistan oblysy
