Bul qaterli indettiń Qazaqstandaǵy jaǵdaıyna baılanysty Memleket basshysy Q.Toqaev eline janashyr, halqyna qamqor basshy ekenin kórsetip-aq keledi. О́ziniń aqyl-kúshin osy indettiń beti qaıtýyna jumsap, úkimetke, ákimderge, basqa deńgeıdegi basshylarǵa tapsyrma berip, oń nátıjesine múddeli bolyp otyrǵan jaǵdaıy bar.
Qaı halyq, qaı ult ókili bolsa da Qudaıdan qorqyp, patshadan yǵyp, eldiń zańyna baǵyna bilgeni abzal. Bul kezeń enjarlyqty, bos kóńildilikti, áreketsizdikti kótermeıdi. Qazir halyqtyń tastúıin birligi men yntymaǵy kerek. Qaıtkende de qaırat taýyp, koronavırýsqa tosqaýyl qoıý kerek. Kún saıyn estip otyrǵanymyzdaı, qaterli indettiń órship turǵany – tym qaýipti. Ulanǵaıyr dalamyzdaǵy 19 mıllıon halyqtyń sany jaǵynan budan ári azaıyp ketýi – naǵyz apat. Qudireti kúshti, meıirimi sheksiz Alladan eldiń amandyǵyn, qazaqtyń qaýipsizdigin suraıyq.
Patsha – bireý, qalǵany oǵan tireý. Kún saıynǵy aıtylyp jatqan nusqaýlardy múltiksiz oryndaý – kópshilik qaýymnyń mindeti. Qamyǵý, toryǵý, úreı týǵyzý paıda bermeıdi.
Árbir adamnyń ishki kúreskerlik rýhy myqty bolý kerek. Qaıtsek ózimizge, otbasymyzǵa, jaqynymyzǵa, aýyl aımaqqa, elge, ultqa, urpaqqa «zııanymyzdy tıgizbeımiz?» degen suraq – bul kúnniń basty saýaly da, talaby da.
Dertti juqtyrǵan otandastarymyzdyń dári-dárimekke, dárigerlik kómekke zárý bolýy – alabóten áńgime. Kóp jaıtqa bárimiz de kinálimiz.
Biz adamgershilik, ımandylyq, meıirim, jańaǵy aıtqan tártip pen sana, t.b. adamı qundylyqtardyń quldyrap bara jatýynan da osyndaı keselge kezigip otyrǵan joqpyz ba?! Oılanatyn ýaqyt jetti, aǵaıyn. Jerdi, sýdy, muhıtty búldirippiz. Aspandy ys tútinge toltyryppyz, tabıǵatty aıalaı bilmeppiz. Otbasynyń berekesin, shańyraqtyń shattyǵyn, bala tárbıesin aldyńǵy orynǵa qoıatyn ǵasyrlardan kele jatqan qasterli saltymyzdy úkilep ustaı almappyz. Jaratylys zańdylyqtaryna laıyqty kóńil bólmeppiz. Endigi jerde el bolyp, jurt bolyp qatemizdi túzep, qasiretten qutylýdyń jolyn izdeıik.
Kemeńger Tóle bı atamyz aıtpaqshy, «Bir úıdiń balasyndaı, bir qoldyń salasyndaı» bolaıyq. Birlik pen tártip, senim men jiger álsiremesin. Prezıdenttiń izgi nıet-peıiline, ardy oılaǵan áreketine qoldaý kórseteıik.
Dúnıege jańa sana, parasatty paıymmen qaraıyq.
Kúlásh AHMETOVA,
aqyn, Memlekettik syılyqtyń laýreaty
