«Qyzyljar» ortalyq meshitiniń bas ımamy Kenjetaı qajy Baıkemeluly jáne jergilikti kásipkerler Naǵashybaı Barlybaev pen Sermaǵanbet Oraluly respýblıkalyq «Zeket» qorynyń oblystyq fılıalyna isker azamattar men qalyń kópshilikten aqsha jınap, oblys aýrýhanalarynda jaman indettiń kesirinen aýa jetpeı qınalyp jatqan azamattarǵa qoldaý kórsetý týraly ortaq sheshimge kelgen eken. Bastamashyl topqa oblystyq kásipkerler odaǵy palatasynyń tóraǵasy Arman Sarybaev ta qosylady. Jınalǵan qarjynyń qozǵalysyn baqylaýdy Dıas esimdi azamat óz moınyna alady. «Alystan arbalaǵansha, jaqynnan dorbalaýdy» uıǵarǵan olar apparattardy jedel jetkizý úshin Reseı qalalarynan izdeıdi. Bul jany qınalyp jatqan syrqattarǵa da sep.
Ázirge óńirdegi aýrýhanalarda 30 naýqasqa bir kondensatordan keledi eken. Aýrýhanaǵa alǵash túsken adamǵa aldymen osy apparat kerek. Al О́JJ apparaty jan saqtaý bóliminde jaǵdaıy óte aýyr naýqastarǵa ǵana qoldanylady.
Azamattardyń alǵash ret otyryp, aqyldasqandaryna áli tolyq apta aınalmasa da, qazirdiń ózinde 36 dana 5 lıtrlik apparatty Ekaterınbýrgten aldyryp, oblys aýrýhanalaryna taratyp úlgerdi. Árıne shekaralas óńirler bolsa da ony jetkizý ońaı emes. Osy jerde Reseıde turatyn qazaq azamattarynyń kómek qolyn sozyp, qoımalardan alyp bergenin aıta ketý kerek. Alǵashqy partııamen kelgen 36 apparattyń 20 danasy oblystyq aýrýhanaǵa, 10 danasy Beskól aýdandyq aýrýhanasyna, sondaı-aq Ýálıhanov, Aqjar, Esil, M.Jumabaev, Mamlıýt aýdandaryna taratyldy. Sóıtip qorǵa túsken 23 mln teńgeniń 15 mln teńgesi jumsaldy.
Jigitter qalǵan qarjyny qalaı tıimdi paıdalaný qajettigin bilmek nıetpen oblystyq densaýlyq saqtaý basqarmasynyń basshysy Qabdyrahman Saqtaǵanovpen sóılesti. Basqarma basshylyǵyna taǵaıyndalǵanyna bir apta ótpese de Q.Saqtaǵanov bastamashyl azamattarǵa taǵy da ókpeni jasandy jeldetýge arnalǵan 24 apparattyń alynǵany durys dep sanaıtynyn jetkizdi. О́ıtkeni qazir dári-dármek jetkilikti, tek osy apparatqa muqtajdyq bar. Sermaǵanbet Oraluly Reseıdegi taýar jiberýshige habarlasyp, aqshany búgin aýdaratyndaryn aıtyp, erteń apparattardy jiberýge kelisti. Qazirgi indet kezinde osy ispetti jedeldik, ábjildik qajet. Bul ýaqytta oblysqa belgili azamat Naǵashybaı Barlybaev áriptesterine, aýdan ákimderine «Zeket» qoryna aqsha aýdarý keregin úzdiksiz túsindirip jatty. «Túsken qarajat kóbeıse, osyndaı apparattardyń taǵy birnesheýin áperetin bolamyz. Halyqty qutqarýǵa kómektespesek azamattyǵymyz qane?», deıdi ol.
Búginge deıin halyqqa kómek qolyn sozǵandardyń arasynan 1 mln teńgeden qorǵa aqsha aýdarǵan azamattardy ataı ketetin bolsaq, «Peterfeld AGRO» basshysy Asqar Mádıev, «Mámbetov ı K» basshysy Erkebulan Mámbetov, «IP Levın» basshysy Vladımır Levın, «Joldasbaı AGRO» basshysy Súıindik Joldasbaev, «Agrofırma «Mamlıýtskaıa» basshysy Qaırat Qadyralın, «EtalonRegıon» basshysy Máden Jumaǵulov, «GARD Servıs» JShS, «Kazmıasomolprodýkt» JShS, IP Ahmýdınov jáne t.b. kásiporyndardan barlyǵy 43 kásipker bar. Qazirgi kezde taǵy 25 ottegi konsetratory men 73 dana pýlsoksımetrge tapsyrys berildi.
Soltústik Qazaqstan oblysy
