«Nur Otan» HDP Aqtóbe oblystyq fılıalynda «Qazaqstan ardagerleri» Aýǵan soǵysy ardagerleri uıymdary assosıasııasynyń jáne «Aýǵan soǵysy ınternasıonalıst-jaýyngerleri Aqtóbe oblystyq qoǵamdyq birlestigi» oblystyq uıymynyń uıymdastyrýymen «Biz óz Otanymyzdyń bolashaǵyna jaýaptymyz» atty birinshi respýblıkalyq forýmy ótkizildi.
«Nur Otan» HDP Aqtóbe oblystyq fılıalynda «Qazaqstan ardagerleri» Aýǵan soǵysy ardagerleri uıymdary assosıasııasynyń jáne «Aýǵan soǵysy ınternasıonalıst-jaýyngerleri Aqtóbe oblystyq qoǵamdyq birlestigi» oblystyq uıymynyń uıymdastyrýymen «Biz óz Otanymyzdyń bolashaǵyna jaýaptymyz» atty birinshi respýblıkalyq forýmy ótkizildi.
Forýmǵa elimizdiń barlyq oblystarynan Aýǵan soǵysynyń ardagerleri qatysty. Aýǵan soǵysynyń ot-jalynyna shyńdalǵan azamattar jastarǵa patrıottyq tárbıe berý, jas urpaqty dinı ekstremızmnen qorǵaý, olardyń salt-dástúrimizge jat dinı aǵymdarǵa boı aldyrmaýyna uıytqy bolý jáne óz eliniń patrıoty etip tárbıeleý máselelerin talqylady.
Forýmdy kirispe sóz sóılep ashqan oblystyq ishki saıasat basqarmasynyń basshysy Zápen Jumabaeva Aýǵan soǵysy ardagerleri oblystyq uıymy júrgizip otyrǵan patrıottyq tárbıe jumystaryn, onyń jastardyń qoǵamdaǵy óz ornyn tabýdaǵy rólin atap ótti. Sondaı-aq, aýǵandyq jaýyngerlerdiń qoǵamdyq jumystarǵa belsene qatysatyny týraly da áńgimeledi. Oblysta aýǵan jaýyngerleriniń kommýnaldyq qyzmetter tólemderinen bosatylǵanyn tilge tıek etti. Mundaı ıgilik tek Aqtóbe oblysynda ǵana bar ekenin jetkizdi.
Parlament Májilisiniń depýtaty, «Qazaqstan ardagerleri» Aýǵan soǵysy ardagerleri uıymdary assosıasııasynyń tóraǵasy Baqytbek Smaǵul qarýlastaryn elimizdiń erteńi – jastardy óz Otanynyń patrıoty etip tárbıeleýge atsalysýǵa shaqyrdy. Jastardyń boıynda otansúıgishtik, patrıottyq sezimdi qalyptastyrý qajettigin sóz etti. Jastardy ultjandy jáne óz eliniń abzal azamaty bolýǵa shaqyrdy. Qazaqstannyń jarqyn bolashaǵy jastardyń qolynda degen oı aıtty.
Sharaǵa qatysýshylar atynan Qazaqstannyń barsha azamattaryna úndeý qabyldandy. Onda elimizde dinı ekstremızmdi jáne terrorızmdi boldyrmaý, jastarǵa áskerı-patrıottyq tárbıe berýge atsalysý árbir qazaqstandyqtyń paryzy ekeni baıandalǵan.
Shara aıasynda «Aýǵanstan. Jaýynger-ınternasıonalıst erligi» atty kitaptyń tusaýkeseri boldy. Kitapta Aýǵan soǵysynda óziniń qarýlas joldastarymen erliktiń eren úlgisin kórsetip qaza tapqan jerlesimiz, ınternasıonalıst-jaýynger Serikbaı Turlybaevtyń jaýyngerlik bıik tulǵasy derekti negizde sıpattalady. Kitaptyń tusaýkeserine Serikbaıdyń anasy Sápen apa qatysyp, aýǵandyq ardagerlerge ulynyń erlik isterin jastar arasynda nasıhattap, ónege etkenderi, onyń beınesin esterinde saqtaǵany úshin júrekjardy alǵys sezimin bildirdi.
Satybaldy SÁÝIRBAI,
«Egemen Qazaqstan».
Aqtóbe oblysy.
