Keshe elordadaǵy Nazarbaev Ýnıversıtetinde «Derbes medısına jáne ǵalamdyq densaýlyq» degen taqyrypta halyqaralyq konferensııa jumysyn bastady.
Bıomedısınanyń derbes medısına salasy álemdik medısınanyń ozyq jetistikteriniń qatarynda atalady.
Keshe elordadaǵy Nazarbaev Ýnıversıtetinde «Derbes medısına jáne ǵalamdyq densaýlyq» degen taqyrypta halyqaralyq konferensııa jumysyn bastady.
Bıomedısınanyń derbes medısına salasy álemdik medısınanyń ozyq jetistikteriniń qatarynda atalady.Onyń negizgi ereksheligi – árbir naýqasqa jeke kútim jasaý, genetıkalyq ereksheligine qaraı em taǵaıyndaý. Derbes medısına sózi bizde sońǵy birer jylda ǵana aıtylyp júrgenimen, bul jıyrma birinshi ǵasyrdyń basynda negizi qalanǵan, naryqqa dendep engen irgeli sala. Nazarbaev Ýnıversıteti, О́mir týraly ǵylymdar ortalyǵynyń bastamashylyǵymen ótkizilip jatqan halyqaralyq jıynda osy salanyń sońǵy jańalyqtary pash etilmek. Iаǵnı, álemniń túrli memleketinen kelgen ǵalymdar naýqasty jeke emdeý boıynsha óz ádis-tásilderimen, oǵan qosa ǵalamdyq densaýlyq jáne bıoınformatıka máseleleri boıynsha tyń ıdeıalarymen bólispek.
Eki kúndik jıyn barysynda Fýmıhıko Matsýda (Japonııa), Iong Il Kım (Koreıa), Toshıhıro Tanaka (Japonııa), Martın Bobak (Ulybrıtanııa) syndy professorlar bastaǵan top paneldik sessııanyń nazaryn genomıka men derbestendirilgen medısınanyń múmkindikteri men máselesine baǵyttaıtyn bolady. Al, plenarlyq otyrystyń ekinshi bóliginde stend baıandamalary men ǵalymdardyń ǵylymı jumystarynyń kórmesi josparlanýda. Buǵan Garvard medısınalyq ýnıversıteti jáne Pıtsbýrg ýnıversıteti sııaqty álemge tanylǵan oqý ordalarynyń ǵalymdary qatysady. Jalpy, jıynǵa AQSh, Japonııa, Eýropa elderiniń, Koreıa Respýblıkasynyń jáne Reseı Federasııasynyń ǵalymdary kelgenin aıta ketý kerek.
Nazarbaev Ýnıversıtetindegi О́mir týraly ǵylymdar ortalyǵy osynyń aldynda da eki ret konferensııa ótkizgen bolatyn. Ol jıyndarda negizinen adam ómiriniń sapasyn jaqsartý máseleleri qarastyrylǵan bolsa, tuńǵysh ret ótkizilip otyrǵan osy konferensııanyń maqsaty – otandyq ǵalymdar men qoǵamnyń nazaryn derbes medısınaǵa burý. Bul jaıynda О́mir týraly ǵylymdar ortalyǵynyń dırektory Jaqsybaı Jumadilovtyń pikiri tómendegideı: «Derbes medısına – ásirese, AQSh pen Eýropa memleketterinde jaqsy damyǵan sala. Mysaly, AQSh-ta derbes medısınanyń bir jyldyq naryǵy 230 mıllıard dollardy quraıdy. Olar 2015 jyly bul qarjyny eki ese ósirmek. Al, bizde bul damymaǵan. Ony damytý úshin zııatkerlik áleýet pen ınfraqurylym kerek. Bizdiń ortalyq osy sala boıynsha shetelderde mamandardy oqytýda. Biraq, bilikti mamandardy daıarlap shyǵarý úshin keminde on jyldaı ýaqyt qajet. Infraqurylym máselesi de búgin-erteń sheshileıin dep turǵan joq. Sóıte tura biz qoǵamnyń nazaryn derbes medısınaǵa aýdarǵymyz keledi. Al, ǵalamdyq densaýlyqqa keler bolsaq, bul taqyryp boıynsha negizinen jyldam taralatyn vırýstyq ınfeksııalarǵa qatysty máseleler sóz bolady».
Aıta ketý kerek, konferensııa jumysy aǵylshyn tilinde ótýde. О́zge elderden kelgen professorlarmen qatar keshe birqatar otandyq jas medısına doktorlary aǵylshyn tilinde baıandamalar jasap, óz emdeý erekshelikterin ortaǵa saldy.
Aıgúl SEIILOVA,
«Egemen Qazaqstan».
