Aýdandy aýyz sýmen qamtý boıynsha búginde Atameken eldi mekenindegi aýyz sý júıeleriniń qurylysy júrýde. Merdiger mekeme: "TVIK" JShS-i. Qurylys jumystary aıaqtalǵan ýaqytta 210 abonent, ıaǵnı 2122 turǵyn taza aýyz sýmen qamtylatyn bolady.
Aımaqty kógilder otynmen qamtý jumystaryna kelsek, Atameken eldi mekeninde "Tobolıno" AGTS gaz qýattylyǵyn arttyratyn stansııanyń qurylysy bastalǵan. AGTS-tiń ótkizgishtik qýaty - 20000 nm3/saǵ. Gaz qubyry júıesiniń uzyndyǵy - 4,73 shaqyrym. Bıyl qurylys jumystary aıaqtalyp, birneshe eldi meken gazben qamtylatyn bolady.
Aýdanda qurylys jumystary qarqyndy. Saryaǵash qalasynyń Samal shaǵyn aýdanynda 900 orynǵa arnalǵan mektep qurylysy bastalǵan. Merdiger mekeme: "Jańa arna 2002" JShS-i. 2020 jyly qurylysy bastalǵan mektep 2021 jyly tamyz aıynda paıdalanýǵa berilmek. Ǵımarattyń jalpy aýmaǵy – 8324,2 sharshy metr. Jospar boıynsha mekteptiń oqý blogy, sportzaly, ashanasy jáne sheberhanasy boı kóteredi.
Saryaǵash – shıpaıjaıly, emdik týrızmi damyǵan aımaq. Suranysqa baılanysty jyl saıyn jańa keshen boı kóteredi. Máselen, 2020 jyldyń maýsym aıynda qurylys aıaqtalyp, paıdalanýǵa berilgen "Darhan" shıpajaıy búginde 100 adamdy qabyldaýǵa qaýqarly. Emdik-saýyqtyrý kesheninde 20 adam turaqty jumyspen qamtylǵan. Em-domnyń 24 túri bar. Odan bólek, aqyly birneshe qyzmet kórsetiledi. Shıpajaı jylyna 1300-ge jýyq demalýshy qabyldaýdy josparlaýda. Keshende emdelýdiń ortasha quny 12500 teńgeni quraıdy.
