«Habar» agenttigi kórermenderge taǵy bir telehıkaıa usynǵaly otyr. Ony «Astana telefılm» kompanııasy «Jigitter oqıǵasy» ataýymen túsirgen bolatyn. Bul týraly «Habar» telearnasy habarlady.
Shyǵarmashylyq toptyń aıtýynsha, bul fılm budan burynǵy túsirilgen telehıkaıalardan ózgeshe bolmaq. Bala kezden birge ósken tórt jigittiń taǵdyry tórt tarapqa bólinip, jyldar óte qaıta bir arnaǵa toǵysady. Árıne, munda da mahabbat, satqyndyq, jazataıym jaǵdaılarǵa tap bolǵan oqıǵalar sýretteledi. Degenmen, eń bastysy dostyq degen uly uǵym fılm ózegine arqaý bolǵan.
«Qazirgi kezeńde kóptegen serıaldar túsirilip jatqany anyq. Al endi jańa serıaldyń bir ózgesheligi - jigitter jaıynda, jigitterdiń dostyǵy jaıynda .Biz áıelder týraly da osy kezge deıin biraz serıal túsirdik emes pe?! Endi árbir erkektiń basynan keshken jaǵdaı týraly kórinis kórermenderdi oılandyrady degen senimdemin»,-deıdi akter Azamat Sharǵynbaev.
Telehıkaıaǵa tájirıbeli akter jáne telejúrgizýshi Jan Baıjanbaev, Azamat Sharǵynbaev syndy azamattarmen qatar, Olımpıada chempıony, Vel Barker kýbogynyń ıegeri Serik Sápıev túsýde. Olımpıada chempıony jumys kestesiniń tyǵyz bolýyna qaramastan dostyq pen otbasylyq qundylyqtardy nasıhattaıtyn fılmge túsýge birden kelisimin berdi. «Fılm ssenarııi meni qyzyqtyrdy. Aldymen munda sport, sonyń ishinde boks jaqsy dáripteledi. Sonymen qatar men munda ózimdi oınaımyn. Bul meniń kınoǵa alǵash túsýim. Árıne, bastapqyda qatty qobaljydym. Biraq, ár dýbl saıyn kamera aldyndaǵy qorqynyshym seıilip keledi»,-deıdi London Olımpıadasynyń chempıony Serik Sápıev.
15 serııaly «Jigitter oqıǵasy» telehıkaıasy qazaq jáne orys tilderinde jaryq kóredi. Tamyz aıynda bastalǵan túsirilim, bul kúnderi sońyna taıap qaldy. Kórermender jańa týyndyny «Habar» arnasynan qarashada kóre alady.
Danııar Túımebaı.
