«Men koronavırýs ınfeksııasymen kúresýge úlken eńbek sińirgen azamattar, volonterler týraly aıtyp bergim kelip tur. Elimizdiń aqjúrek azamattary eńbegine esh aqy suramastan, ýaqytyn, densaýlyǵyn táýekelge tigip, aldyńǵy shepten tabyldy. Tótenshe jaǵdaı jarııalanǵan boıda elimizdegi volonterlik toptardy biriktirip, ortaq jeli jasadyq. Ondaǵy negizgi maqsatymyz – halyqtyń jaǵdaıynan habar alyp, qajettilikterin anyqtaý edi», dedi Vera Kım.
V.Kımniń aqparatyna qaraǵanda, TJ rejimi kezinde volonterler azyq-túlik jıyntyǵyn túsirýmen, ólshep-oraýmen jáne tasymaldaýmen aınalysyp, bul rette barlyq jumys jeke qorǵanysh quraldaryn paıdalaný arqyly uıymdastyrylǵan. Sonymen qatar volonterler medısınalyq mekemelerdiń qyzmetkerlerine belsendi kómek kórsetip, olardyń balalaryna ystyq tamaq berip, alańsyz qyzmet etýine tolyq jaǵdaı jasady.
Turǵyndar tarapynan kómek týraly aıta kele, eriktiler birlestiginiń jetekshisi otandyq shaǵyn jáne orta bızneske, sonyń ishinde «MAGNUM» sýpermarketter jelisiniń ókilderine alǵys bildirdi. Sonymen qatar ol halyqqa kómek kórsetý úshin demeýshiler ǵana emes, volonterler júrgizip jatqan jumystarǵa qoldaý kórsetken túrli qaıyrymdylyq qorlaryna alǵys bildirdi. Pandemııadan zardap shekken eldi mekenderge kókónis pen jemis-jıdekter jibergen elimizdiń ońtústigindegi fermerlerdiń eńbegi erekshe ataldy. Oǵan qosa kóptegen kishigirim naýbaıhanalardyń nan pisirip, volonterler arqyly muqtajdarǵa tegin taratyp bergeni belgili boldy.
«Tótenshe jaǵdaı kezinde bar-lyq is-shara qajetti qaýipsizdik talaptaryn eskere otyryp júrgizildi. Bizdiń komandada jumys istegen volonterlerdiń eshqaısysy aýyrǵan joq. Biraq bizdiń dostarymyzdyń, seriktes uıymdardyń arasynda koronavırýs ınfeksııasyn juqtyrǵan volonterlerdiń bar ekenin bilemin. Bul óz kezeginde volonterlerdiń vırýs qaýpine qaramastan, elimizdiń indetti jeńý jolyndaǵy kúresine belsene atsalysqanyn kórsetedi», dedi Vera Kım.
Odan ári volonterler jelisiniń basshysy senim telefondaryna habarlasqandar jóninde áńgimelep berdi. Onyń aıtýynsha, tótenshe jaǵdaı kezinde 2 myńnan astam adam kómek surap, qońyraý shalypty. «Zeınet jasyndaǵy kisiler de habarlasty. Biz 851 otbasyna kómektestik. Arnaıy tizim jasaldy. Bir ret kómek alyp, endi basqalarǵa kómektesińizder degen adamdar da bolǵanyn atap ótý kerek», dedi ol.
Baspasóz máslıhatynda málim bolǵandaı, qazirgi ýaqytta jalǵyzbasty adamdarǵa kóbirek járdem berilip jatyr. «Qazir jalǵyz qalǵan jandar ómirdiń qıyndyǵymen betpe-bet kelgenin aıta ketý kerek. Ondaı sanattaǵy adamdardyń birazy – egde jastaǵylar. Olarǵa bir ret aparylǵan azyq-túlik 1-2 aptaǵa jetýi múmkin. Keıde bizge ekinshi ret habarlasatyn zeınetkerler de bolady. Ondaıda qarajatymyz bolsa, mindetti túrde azyq-túlik aparyp beremiz», dedi uıym basshysy.
Dál qazirgideı karantın kezinde zeınetker-dárigerlerdiń kópshiligi pasıentterge COVID-19-ǵa jatpaıtyn sozylmaly jáne basqa da aýrýlar boıynsha onlaın-rejimde keńes berip jatqany da habarlandy.
«Biz sondaı-aq jańa qurylǵan stasıonarlar men provızorlarda kereýetterdi, ottegi ballondaryn tasymaldaýǵa kómektesý, sý salynǵan fýralardy túsirý úshin sport federasııalarynyń ókilderin, áskerı, dene daıarlyǵy kúshti jandardy tartamyz», dedi V.Kım.
Al «Jas ulan» BJU tóraǵasy Dınara Sádýaqasova volonter bolý úshin nıet pen ynta jetkilikti ekenin aıta kele, ózi basqaryp otyrǵan qurylym janyndaǵy volonterler shtabynyń jumysyna toqtaldy. Dınara Sádýaqasovanyń aıtýynsha, onda respýblıka boıynsha 3000 jas tirkelgen. «Qazir respýblıkalyq volonterler shtaby qatarynda ártúrli jastaǵy úsh myńnan astam belsendi bar. Zańda kámeletke tolǵandar ǵana volonter bola alady dep jazylǵan. Biraq jaǵdaı qazir kúrdeli. Biz 14-15 jastaǵy bozbalalar men qyzdardy, 60-70 jastaǵy ájeler men atalardy kórip otyrmyz. Mysaly, tótenshe jaǵdaı kezinde psıholog bolyp qyzmet atqaratyn eki eresek belsendi psıhologııalyq kómek klýbyn júrgizdi. Konsýltasııa tegin uıymdastyryldy. Kóptegen adamǵa depressııamen kúresýge kómektesti. Al bizdiń jasóspirimderimiz ártúrli is-sharalar, chellendjder men konkýrstar ótkizip, balalardyń bos ýaqytyn tıimdi ótkizýlerine septigin tıgizdi», deıdi D.Sádýaqasova.
Sonymen birge baspasóz máslıhatynda volonterlerdiń Maqtaaral aýdanyndaǵy sý tasqynynan zardap shekken otbasylarǵa kómek kórsetkeni týraly da aıtyldy. Shymkent jáne Túrkistan oblysy belsendileri birigip, jergilikti aýrýhana úshin 12 ottegi konsentratyn satyp ápergen.
