Jobaǵa qatysýǵa nıet bildirgen úmitkerler, eń aldymen, halqyna adal qyzmet etýge daıar azamattar. Muny Prezıdent Qasym-Jomart Toqaev baıqaý jarııalanǵanda jáne rezervke ótken jastarmen kezdesýde de atap kórsetti. «Kadrlyq rezervke ótý degenimiz joǵary laýazymdy qyzmetke ornalasý ǵana emes. Bul – ult úshin, el úshin, halyq úshin aıanbaı ter tógý degen sóz. Sizderge úlken jaýapkershilik júkteledi», dedi Memleket basshysy. О́zderine artylǵan jaýapkershiliktiń júgi aýyr ekenin jaqsy túsinetin keıipkerimiz de el ıgiligine jumys isteý basty maqsaty ekenin jetkizdi.
Jobany qolǵa alýdaǵy basty maqsat – kásibı biliktiligi joǵary menedjerlerdiń jańa býynyn qalyptastyryp, olardyń kúshin túrli salada synap kórýdi kózdedi. Áýel basta aıtylǵandaı, jeńiske jetken qatysýshylar basshylyq qyzmetke taǵaıyndalyp, olarǵa oıynda júrgen bastamalaryn júzege asyrýǵa múmkindik berdi.
«Injınırıng jáne tehnologııalar transferti ortalyǵynyń» prezıdenti qyzmetine taǵaıyndalǵan I.Ospanov osy kúnge deıin jınaǵan mol tájirıbesi jańa orynda tıimdi jumys istep, utymdy jobalardy júzege asyrýǵa sep bolatynyna senimdi.
– Eńbek jolymdy memlekettik qyzmetten bastadym. Mınıstrlikte jumys istep júrgende óńirde qyzmet etip kórýim kerek degen oı boldy. Bıznes salasyna da qyzyqtym. Mınıstrlikte tórt jyl ishinde departament sarapshysynan dırektordyń orynbasary laýazymyna deıin kóterildim. Basshylyq talpynysymdy baǵalap, árdaıym qoldaý bildirip otyrdy. Keıin óńirge – sol kezdegi Ońtústik Qazaqstan oblysyna bardym. Ortalyqta jumys istep júrgende óńirlerde ne bolyp jatqanyn tolyq bilmeıtinime kózim jetti. Al óńirge barǵanymda kóp máselege qatysty oıym ózgerip, tájirıbe jınadym. Aýyl sharýashylyǵynda da baǵymdy synap, fermerlermen tikeleı jumys istedim. Ortalyqta júrgen qyzmetkerler keıde jergilikti oryndardyń suranysyn dál bilmeı jatady. Munda jasalyp jatqan nebir jaqsy baǵdarlamalar óńirlerge qajet bolmaıtyn kezderi de bolady. Olar sátti bolǵanymen, belgili bir óńirdiń naqty máselesin sheshýge baǵyttalmaýy múmkin. Jalpy, kásipkerler men memlekettik qyzmetkerlerdiń óńirlerde tájirıbe jınaǵanyn durys dep esepteımin, – deıdi I.Ospanov.
Aımaqtan keıin birden halyqaralyq uıymnyń jumysyna aralasýǵa múmkindik alǵan ol qyzmette ózin jan-jaqty synap kórdi. Rezervke ótkenge deıin Dúnıejúzilik bank pen Qazaqstan Úkimetiniń «О́nimdi ınnovasııalardy yntalandyrý» jobasyn basqarý toby dırektorynyń orynbasary bolyp qyzmet etti.
– Prezıdenttiń jastar kadrlyq rezervine qabyldaý júrip jatqanyn estidim, biraq oǵan qujat tapsyrý týraly sheshimge birden kelmedim. Halyqaralyq uıymdaǵy jumysymdy jalǵastyra berdim. Alaıda jınaǵan tájirıbemdi halyq ıgiligine jumsaýym kerek degen oı keldi. Men qatysqan jobalardyń ishindegi eń ashyq irikteý osynda boldy. Birneshe kezeńnen turǵan prosess onlaın júrdi. Jobada jeńiske jetken árbir maman ózin kóshbasshy retinde synap kórip jatyr, burynnan oıynda júrgen bastamalaryn iske asyratyn kez týdy. Bızneste júrgen daryndy jastarymyz memlekettik qyzmette sol salany damytýǵa tyrysyp júr. Joba Qazaqstandaǵy bilikti jastardyń basyn qosyp, olarǵa ózara baılanys ornatýǵa, ortaq ıgi dúnıeler jasaýǵa taptyrmas múmkindik berip otyr, – deıdi I.Ospanov.
