Uıymdastyrýshylardyń aıtýynsha, ár sebetke kúrish, un, makaron, jarma, jumyrtqa, ósimdik maıy, qant jáne jeke qorǵanysh quraldary salynǵan. Olardyń deni jergilikti kásiporyndarda shyǵarylǵan azyq-túlik ónimderi.
Qaıyrymdylyq sharasy áýelde el astanasy Nur-Sultanda bastalyp, keıin ózge aımaqtardaǵy kásipkerler ilip áketken. "Birazy aqshalaı kómek kórsetip jatyr. Al jergilikti kásiporyndar ózderi shyǵaratyn ónimderimen bólisýde. Bulardyń bári eń birinshi kezekte qajet áleýmettik mańyzy bar azyq-túlik ónimderi. Sondaı-aq, keıbir kásiporyndar lımonad, ıogýrt, túrli tátti taǵamdaryn ákelip tapsyrýda", - dedi oblystyq kásipkerler palatasy dırektorynyń orynbasary Gennadıı Kýkoba.
Sharaǵa jeńil ónerkásippen aınalysatyn iri kásiporyndar da atsalysýda. Máselen, jınalǵan azyq-túlik qory men qorǵanysh quraldary jurtqa taratylǵansha "Bolshevıchka" tigin fabrıkasynyń qoımasynda saqtalady. Atalmysh fabrıka aksııany uıymdastyrýshylarǵa arnaıy kólik bólip, 2 myńdaı medısınalyq maska bergen. "Pandemııa bizdiń kásiporynǵa da ońaı tıip jatqan joq. Vırýs juqtyrǵan jumysshylar bar. Soǵan qaramastan, óndiristi toqtatpaýǵa tyrysyp jatyrmyz. Qazir qorǵanysh quraldaryna tapsyrys berýshiler kóp. Al bizge mata jetkizip berýshiler keshigip qalyp jatyr. Matasyz tapsyrys oryndalmaıdy. Sondyqtan kezek kútkenderge jaǵdaıdy túsindirip, kúte turýyn suraımyz. Áıteýir tapsyrys berýshiler de jaǵdaıdy túsinip jatyr", - deıdi tigin fabrıkasynyń basshysy Ársen Jetpisbaev.
Qaıyrymdylyq marafonyna iri kásiporyndarmen qatar, shaǵyn bıznespen aınalysatyn jeke kásipkerler de shamasy kelgenshe óz úlesterin qosýda. Jınalǵan azyq-túlik sebetteriniń ár qaısysynyń salmaǵy 30 keliniń ar jaq-ber jaǵynda. Áleýmettik sebetterdi ár otbasyna eriktiler jetkizip beredi.́
Qostanaı oblysy
