Qazaqstan • 28 Shilde, 2020

"Ál-Farabı jáne qaıyrymdy qoǵam" taqyrybynda adaldyq saǵaty ótti

50 ret kórsetildi

Qazaqstannyń Sybaılas jemqorlyqqa qarsy is-qımyl agenttigi jastardyń arasynda parasattylyq ıdeologııasyn nasıhattaý jáne tereń bilimniń mańyzdylyǵyn túsindirý maqsatyndaǵy kezekti onlaın "Adaldyq saǵaty" respýblıkalyq aksııasy "Ál-Farabı jáne qaıyrymdy qoǵam" taqyrybynda ótti, - dep habarlaıdy Egemen.kz.

Bul taqyryp kezdeısoq tańdalǵan joq, óıtkeni bıyl búkil álem moıyndaǵan jáne 2020 jylǵa arnalǵan halyqaralyq estelik kúnder kúntizbesine engizilgen ál-Farabıdiń 1150 jyldyq mereıtoıy atap ótiledi.

Ál-Farabı óz shyǵarmalarynda, onyń ishinde "Qaıyrymdy qala turǵyndary" eńbeginde tárbıe, meıirimdilik, parasattylyq jáne ádildik jaıly oı qozǵaǵan. Onyń máńgilik adamı qundylyqtar týraly baıandaǵan týyndylary qazirgi álemniń injý-marjany bolyp qala bermek.

Ǵulama "tárbıesiz alynǵan bilim – adamzattyń qasjaýy" dep málimdegen.

Beıne-dáris kún saıyn 17-24 shilde aralyǵynda respýblıkalyq jáne óńirlik telearnalardyń efırinen taratylyp otyrdy.

Odan bólek, beıne-dárister agenttiktiń Youtubeparaqshasyna júktelip, aýmaqtyq departamentter men "Adaldyq alańy" jobalyq keńseleriniń áleýmettik jelilerinde tikeleı efırde kórsetildi. Onlaın formattaǵy "Adaldyq saǵaty" tek jastar arasynda ǵana emes, barlyq qazaqstandyqtar arasynda da úzdiksiz tárbıe jáne aǵartý jumystaryn júrgizýge yqpal etti.

Respýblıkalyq aksııanyń basty maqsaty – uly tulǵanyń eńbekteri arqyly óskeleń urpaqtyń boıyna ádildik, parasattylyq jáne senim qundylyqtaryn sińirý boldy.

Esterińizge sala ketsek, osy jyldyń mamyr aıynda "Adaldyq saǵaty" "Adaldyqty mura etken Uly Abaı" taqyrybynda uıymdastyrylǵan bolatyn.

Jańa oqý jylynyń basynda ótetin aksııa taǵy da bir uly tulǵa – Qoja Ahmet Iаssaýıge arnalmaq.

Sońǵy jańalyqtar

Uqsas jańalyqtar