M.Áýezov atyndaǵy akademııalyq drama teatrynyń 88-maýsymy «Beıbarys sultan» spektaklimen ashyldy. Teatrdyń jańa dırektory Erkin Jýasbektiń basshylyǵymen kórermendi kóbeıtip, jańa zamanǵa beıimdelýge bel sheshe kirisken ujymǵa bul kúnderi jas akterlar, rejısserlar, qoıylymdardyń sapaly shyǵýyna atsalysatyndar, basqa da mamandar tartylýda. Úlken zaldaǵy 800 kisilik oryndyq jańalanyp, teatr aldyna úlken LED ekran qoıylypty. Ol arqyly táýlik boıy spektaklder jarnamalanyp, akterlar týraly aqparattar beriletin bolady.
M.Áýezov atyndaǵy akademııalyq drama teatrynyń 88-maýsymy «Beıbarys sultan» spektaklimen ashyldy. Teatrdyń jańa dırektory Erkin Jýasbektiń basshylyǵymen kórermendi kóbeıtip, jańa zamanǵa beıimdelýge bel sheshe kirisken ujymǵa bul kúnderi jas akterlar, rejısserlar, qoıylymdardyń sapaly shyǵýyna atsalysatyndar, basqa da mamandar tartylýda. Úlken zaldaǵy 800 kisilik oryndyq jańalanyp, teatr aldyna úlken LED ekran qoıylypty. Ol arqyly táýlik boıy spektaklder jarnamalanyp, akterlar týraly aqparattar beriletin bolady.
Sol sııaqty, óner adamdarynyń qalyń kórermenimen baılanysyn nyǵaıtý maqsatynda «Baspasóz qyzmeti» bólimi jumysqa kiristi. Teatrdyń úzdik qoıylymdarynyń beınetaspaǵa kásiptik deńgeıde sapaly jazylýyn qamtamasyz etetin «Dybys jáne beınejazý» stýdııasy ashylyp, oǵan da kásibı mamandar tartylyp jatqan kórinedi. Teatrdyń 45 jyldyq tarıhy bar mýzeıi keńeıtilip, jańadan jabdyqtalǵan. Ekinshi qabatqa qara shańyraqtyń 90 jylǵa jýyq tarıhyn qamtıtyn eksponattar ornalastyrylypty.
Bir sózben aıtqanda, munan bylaı teatrǵa kelgen kórermen ony tek spektakl ǵana tamashalaıtyn oryn emes, kıeli óner ordasy, jaqsy demalys syılaıtyn rýhanı mekeme retinde tanýy úshin túrli tetikter qarastyrylýda.
Áýezov teatrynyń kórki, teatr ǵımaraty aldyndaǵy sýburqaǵy bolatyn. Osy jazda Almaty qalasy ákimdiginiń qoldaýymen teatr ǵımaraty aldyndaǵy sýburqaq qaıta kókke shapshydy.
Eń bastysy, búgingi zamannyń kórermeni úıde otyryp-aq qalaǵan spektakline qalaǵan kúni unaǵan qatarynan elektrondyq júıemen bılet satyp ala alatyn boldy.
Sonymen, jańa maýsymda qalyń kórermenimen qaıta qaýyshqan teatr basshylary men akterlary BAQ ókilderiniń san alýan suraqtaryna jaýap berip, jańa premeralardyń qarasha aıyna josparlanyp otyrǵandyǵyn málimdedi. Olardyń biri M.Maǵaýın povesiniń jelisi boıynsha rejısser M.Qapalbaev sahnalap jatqan «Shaqan sheri» bolsa, kelesisi – jas rejısser E.Nursultan qoıatyn «Jetim taǵdyr» (avtory J.Erǵalıev) spektaklderi.
Sońǵy jyldary Áýezov teatry jańa qoıylymdarǵa kende emes. Onyń kópshiligi kórermender kóptep jınalatyn súıikti spektaklderge aınalyp úlgerdi. Alaıda, úzdiksiz bir-birine ilesip jatqan jańa pesalardyń barlyǵy dramatýrgııa talaptaryna saı kele bermeıdi. Oǵan qosa, sátti qoıylym bolsa da óz mindetin atqaryp, jurtty jalyqtyra bastaǵan spektaklder de bar. Qysqasy, jyl saıyn 5-6 spektakldiń premerasy júredi. Repertýar baıyǵan saıyn qoıylymdardyń sahnaǵa shyǵý kezegi de alshaqtaı túsetini aıan. Osy máselege oraı teatr dırektory Erkin Jýasbek kórermeni az spektaklder kelesi maýsymǵa joldama almaıdy dedi.
Talǵamy sheksiz búgingi kórermen úshin teatrdyń 88-maýsymy múlde jańa úrdispen bastaldy. Áýezov teatrynyń maqtanyshy bolǵan ári shyǵarmashylyq baılyǵy sanalatyn óner tarlandary jańa maýsymdy Qyzyl kilem ústinde sherýletti. Teatr foıesindegi saltanatty sátke qalyń kórermen qoshemet bildirip, Sábıt Orazbaev, Quman Tastanbekov, Merýert О́tekeshova, Ǵazıza Ábdinábıeva, Torǵyn Tasybekova bastaǵan sahna maıtalmandaryn tórge ozdyrdy.
Aınash ESALI,
«Egemen Qazaqstan».
ALMATY.
Sýretterdi túsirgen: avtor.
