Rýhanııat • 29 Shilde, 2020

Shoǵyrda shoqtyǵy bıik

102 ret kórsetildi

Ol da otyzdy alqymdady. Alqynbady. Talpynǵany – toǵyshardyń týyn qulatyp, jemqordyń jelkenin qııý. Alaqandaı eliniń Alataýdaı armanyn oryndap, ultynyń bar bolsa baryn baǵamdaý, joq bolsa joǵyn túgendeý. Tartynǵany... Tartynǵany odan da kóp: adamgershilikten attamaý, aýyz jalasqan sybaılasty jaqtamaý. Alysqa barmaı-aq jaqynnan qaıtyp otyrmyz. Ańyzdaǵy Alpamysty emes, el basqarý isine erte aralasqan, búginde Sybaılas jemqorlyqqa qarsy is-qımyl agenttigi Strategııa jáne jedel basqarý departamentiniń basshysy Nurlan Ibragımuly Jaqsymbetovti aıtyp otyrmyz.

Kólgirsip qaıteıik. Onyń kózin kórip, qol alysyp amandasqan emespin. Qaısybir kezdesýlerde júzdessek júzdesken de shy­ǵarmyz. Ázir este joq. Dúnıe júzin dúrliktirgen pandemııa, júris-turysty jutańdatqan karantın bolmaǵanda emen-jarqyn áńgimeleser me edik? Kim bilsin... Telefon arqyly tildestik. Salmaqty daýys, sabyrly ún. Tutqanyń bergi jaǵynda turyp-aq azamatqa tán baıypty ańǵardyq. «Jylqy – kisineskenshe, adam – túsiniskenshe» eken ǵoı. Bizdiń «bir kórgen – bilisimiz» osylaı bastaldy. 

Qyzyldy-jasyldy dúnıege jurt qyzyqsa da, ol qyzyqqan joq. Baqaı esep pen qýlyq-sumdyqtan basyn aýlaq saldy. О́zekke túsken jegiqurttaı jemqorlyq jaılaǵan zamanda adaldyq pen ar-ujdannyń aq týyn kóterip turatyn jas­tar qajet-aq edi. Sol týdy Nurlan Ibra­gımulynyń qolynan kórgendeı boldyq. Azat kúnge qarap eljirep, erke jelge eltip jelbirep turdy sol baıraq. Soǵan jibigen júrekte de, ony ustap turǵan bilekte de qasıet bar. Búgingi býynǵa úlgi, erteńgi urpaqqa ósıet bar.

Mańǵystaý oblysyna qarasty Aqtaý qalasynda kindigi kesilip, túndigi túril­gen azamat M.Lomonosov atyndaǵy Más­keý memlekettik ýnıversıtetiniń «Mem­­lekettik basqarý» fakýltetin támam­dap, eńbek jolyn quqyq qorǵaý organ­darynyń sapynda bastady. Odan soń Ekonomıkalyq jáne sybaılas jemqorlyqqa qarsy kúres agenttiginiń (Qarjy polısııasy) aqparattyq-taldaý departamentinde eki jyl qyzmet etip, keıin «Samuryq-Qazyna Invest» JShS ınvestısııalyq-taldaý departamentiniń bas menedjeri bolyp ta jumys istep kórdi. Alǵan betinen qaıtqan joq. Sybaı­las jemqorlyqqa qarsy is-qımyl ulttyq bıýrosynda ter tógip, «Proekt-Konsalt» JShS-inde sarapshy boldy.

Aldyna naqty maqsat qoıa bilgen ar­man­shyl jastyń sony soqpaǵy osylaı qalyptasty. Memlekettik qyzmet isteri jáne sybaılas jemqorlyqqa qar­sy is-qımyl agenttigi tóraǵasynyń keńes­shisi, Sybaılas jemqorlyqqa qar­sy is-qımyl agenttigi Kadr jumysy depar­tamentiniń basshysy laýazymdaryn aby­roımen at­qar­dy. Búginde – atalǵan agent­tiktiń Stra­tegııa jáne jedel basqarý depar­tamen­tiniń basshysy. Sondaı-aq qazaq, orys, aǵylshyn tilderin jetik meńgergen talap­ty jas elge sińirgen eńbegi eskeri­lip, «Qurmet» ordenimen marapattaldy.

Otyzǵa jetpeı orda buzǵan azamatqa osymen shektelýge de bolar edi. Baǵy men babyn qatar synap, Memleket basshysy Qasym-Jomart Toqaevtyń bastamasymen júzege asqan Prezıdenttik jastar kadrlyq rezervi jobasyna qatysýǵa bel býdy. Baıqasa, beker emes eken. 13 myń azamattyń arasynan «júzden – júırik, myńnan – tulpar» kóri­nip, iriktelgen 300 jastyń qatarynan tabyldy.

– Bul jobanyń bir kúndik bastama emes, elimizdegi basqarý júıesin jań­ǵyrtýdyń uzaq merzimge baǵyttalǵan jańa tetigi ekeni aıqyn bolǵandyqtan já­ne onyń talaptaryna bilimim, jasym, jumys tájirıbem sáıkes kelgendikten qatys­tym. Sebebi munda basty mindet – bilikti basshylardyń jańa býynyn qalyptastyryp, jastardy halyqqa adal qyzmet etýge yntalandyrý, – deıdi Nur­lan Jaqsymbetov.

Jas kelse, iske! Jastar kadrlyq rezer­vi memlekettik qyzmet salasyn jańar­týǵa, jańǵyrtýǵa ozyq oıly, zamanaýı kóshbasshylardy tartýǵa múmkindik beredi. Al oǵan jańa formasııada basqa­rý­shy bolýǵa qabiletti, talantty jáne kreatıvti jas qazaqstandyqtar ǵana tań­dap alynatynyn eskersek, bul jobada Nurlan Ibragımulynyń baǵy janbaýy múmkin emes edi. Sebebi ol Prezıdenttik jastar kadrlyq rezervine ótpes buryn da Qazaqstannyń sybaılas jemqorlyqqa qarsy saıasatynyń damýyna, atap aıt­qanda 2015-2025 jyldarǵa arnalǵan sybaılas jemqorlyqqa qarsy strategııa­syn ázirleýge, sybaılas jemqorlyqqa qarsy qyzmette ashyqtyq pen aıqyndyq qaǵıdattaryn keshendi jyljytýǵa, son­daı-aq onyń azamattyq qoǵam ınstıtýttarymen ózara keń is-qımylyna belsendi aralas­qan bolatyn.

– Jobaǵa tek qatysýshy emes, memle­ket­tik qyzmetshi retinde ózimniń bilimim men tájirıbemniń, biliktiligimniń synalatyn jáne baǵalanatyn mańyzdy sáti dep qara­dym. Úlken synnan súrinbeı ótip, óz qabiletimdi dáleldegen 300 jastyń biri bolǵandyqtan halyq elimizdiń damýyna zor úles qosyp, qaltqysyz qyzmet etedi dep úmit kútedi. Sol sebepti bul bastama men úshin memlekettik ıdeıalardy, ózimniń tyń oılarymdy iske asyrýǵa berilgen mol múmkindik, – deıdi ol aǵynan jarylyp.

Aıtýynsha, álemniń damyǵan ozyq memleketteriniń qatarynan Qazaq­stan­dy kórgisi keledi. Bilimi men kúsh-jigerin, quzyretin elimizdiń Sybaılas jem­qorlyqqa qarsy saıasatyn sapaly iske asyrýǵa jumsaýdy oılaıdy. «Baldyrǵandarym jemqorlyq jaıla­maǵan Otanda ómir súrýi úshin tynbaı­ eńbek etemin», deıdi. Eń bastysy onyń maq­­sat-múddesi – halyqtyń arman-mura­ty­men úndesedi.

Prezı­denttik jastar kadrlyq rezer­vine Memleket basshysynan bastap, qara­paıym halyqqa deıin úkili úmit artyp otyr. Eli­mizdi bıikke jeteleıtin, jańasha da­mýǵa bastaıtyn bilikti jastardyń jańa shoǵyry qalyptasty degen senim bar. Alaı­da, shoǵyrda da shoqtyǵy bıik jan­dar bolady emes pe? Sol shoqtyq jeń ushy­­nan jalǵasqan jemqorlyqty jeńsem dep júrgen Nurlan Jaqsymbetovke tıe­si­li!

 

Sońǵy jańalyqtar

Sora ekken turǵyn tergelýde

Aımaqtar • Keshe

Uqsas jańalyqtar