О́ner • 29 Shilde, 2020

О́ner dep soqqan júregi

53 ret kórsetildi

Ertede qylqalam sheberleri talantty adamdardy jasyl túspen árlese kerek. Oıly oqyrman kartınanyń boıaýyna qarap tamsanyp, sýretshiniń shyǵarmasyn baǵalaǵan. Al qazir she? Biz jasyl túspen tumsa tabıǵatty ǵana baılanystyratyn boldyq. Al tabıǵatynan talantty, ashyq-jarqyn jandardyń bet-beınesi tumshalanyp qaldy. Áıtkenmen osy bir túıindi «Qazaqstannyń 100 jańa esimi» jobasy tarqatyp kele jatqandaı. Osyǵan deıin eńbegine el súıingen qanshama esimder tanyldy. Búgin biz solardyń biri, Nur-Sultan qalasy ákimdigi Jastar teatrynyń akteri Nurbek Álibek jaıynda aıtpaqpyz.

Tamyry myqty aǵash jemisti de óristi bolatyny sekildi kez kelgen tirshilik ıesiniń boıyndaǵy qabilet kindik qany tamǵan topyraǵynan darıdy. Bul – baba dástúriniń bir ózegi. Kermedegi júı­rikti turysyna qarap synaǵan qazaqtyń bolar balany besiginen tanıtyny sodan. Búgingi bizdiń keıipkerimiz de keshegi Asan qaıǵy babamyz «Jer jánnaty» dep aıdar taǵyp, at qoıǵan alyp mekenniń perzenti. Qarapaıym otbasynda qanat jaıǵan jastyń ákesi qurylysshy bolsa, anasy ulaǵatty ustaz. Osyndaı máýeli shańyraqta tárbıelengen ol jasynan qaǵilez, ónerge birtaban jaqyn boldy. Ártúrli maman ıeleriniń dastarqan basynda aıtatyn qyzyqty áńgimelerin, quıma qulaq ul jadynda toqyp, jaq­sylyqqa bastaýhat qylǵan. Ony ózi de jasyrmaıdy.

– Bizdiń otbasyndaǵy árbir kezdesýimiz uzaq áńgimege jalǵasatynynyń birden bir sebebi, árqaısysymyzdyń ártúrli mamandyq ıesi bolǵandyǵymyzdan bolar. Bul ózińe beımálim álemniń esigin ashqanmen birdeı sezim. О́zimniń týǵan jerim Panfılov aýdanyna qarasty Na­dek aýylyndaǵy orta mektepte bilim al­dym. Keıin belgili aıtysker aqyn Aıta­qyn Bulǵaqovtyń basshylyǵymen bolǵan arnaıy irikteýden ótip, Taldy­qorǵan qalasyndaǵy О́ner mektebine qabyldandym. Osy tusta ákem men anam­nyń eńbegi ólsheýsiz. Olar astyma kólik mingizip, úı alyp, ústime qymbat kıim ápergen joq. Biraq eń bastysy armandaryma kedergi keltirmeı, maǵan tańdaý quqyǵyn berdi. Sol úshin men olarǵa qatty rızamyn jáne alǵys aıtamyn, – deıdi N.Álibek.

Taldyqorǵan qalalyq daryndy bala­larǵa arnalǵan О́ner mektebin «Dástúrli án-terme» synyby boıynsha jáne Dánesh Raqyshev atyndaǵy oblystyq daryndy balalarǵa arnalǵan mektep-ınternatyn úzdik bitirgen soń, bala armanyn jetektep alyp shahar Almatyǵa keledi. Baq pen baby qatar shaýyp, ózi maqsat etken T.Júrgenov atyndaǵy  Qazaq ulttyq óner akademııasynyń  «Estrada ártisi (mıýzıkl)» mamandyǵy boıynsha professor Nurqanat Jaqypbaı sheberhanasyna oqýǵa qabyldanady. Bul onyń ómirindegi eń bıik baspaldaqtyń biri edi. Sebebi teatr maıtalmany N.Jaqypbaıǵa shákirt bolý kez kelgen jas ártistiń qoly jete bermeıtin shyń. Ustazy jaqsynyń ustamy jaqsy degendeı, jas maman búginde Saryarqa tórindegi Jastar teatrynyń beldi ártisi. Jetken jetistigi de kól-kósir. Atap aıtsaq,            2016 jyly táýelsizdigimizdiń 25 jyldyǵyna arnalǵan XXIV teatr­lar festıvalinde «Mosart» mıýzıkli Gran-prı júldesiniń ıegeri atandy. 2018 jyly Ońtústik Koreıa «DIMF XII» Halyqaralyq mıýzıkl festıvaliniń Arnaıy dıplomyn qanjyǵasyna baılap qaıtty. R.Seıtmetovtiń 80 jyldyǵyna arnalǵan Qazaqstan drama teatrlarynyń  XXVI Respýblıkalyq festıvali «Úzdik spektakl» – Gran-prıine ıe boldy. Túrkııanyń Konıa qalasynda ótken «Myń tynys – bir daýys» halyqaralyq teatrlar festıvaliniń Alǵys hatymen marapattaldy.

Kıeli sahna qarapaıym aýyl balasy úshin jarqyn bolashaqqa Jeti­qaraqshydaı jol kórsetti deýimizge negiz bar. «Úlken sahnaǵa alǵash tabanym tıgen sátten bastap meniń bir túsingenim, tek qana eńbektený kerek eken. Meıli sen qateles, meıli durys jasama, eń bastysy, bir orynda turyp qalmaý. «Kóringen taýdyń alystyǵy joq» degendeı, aldyńdaǵy kez kelgen shyńǵa bet alyp júre berý erlikpen para-par» deıdi keıipkerimiz. О́ner akademııasynda júrgende de ereksheligimen kózge túsip, óz tobyn Ońtústik Koreıa eline eki ret barýǵa múmkindik jasaǵanyn da aıtpaı ketýge bolmas. Qazir de kóptegen qoıylymdarda basty rólderde joǵary dárejede oınap, kórermenniń kózaıymyna aınalyp úlgerdi. Kıno áleminde de ózindik qoltańbasyn qaldyryp keledi.

«Bos ýaqytymdy kitap oqýǵa arna­ǵand­y jaqsy kóremin. Ne bolmasa ońa­sha qalyp, azdap óleń jazatyn ádetim bar. О́zimdi aqyn dep sanamaımyn, tek kóńil tolqyǵan sátte oılarymdy qaǵaz betterine túsirgendi unatamyn. О́zime úlken shabyt alatyn kezim tún jáne tynyshtyq. Al meniń ómirlik energııam – kishkentaı baldyrǵandar. Sábı kórsem álemniń bar qıyndyǵyn umytamyn. Olar ózderiniń beıqam ómirine jeteleı jóneletindeı bolyp turady. Bolashaqta «kóp balaly áke» degen atqa ıe bolǵym keledi. Urpaǵym bilimdi bolý úshin áıelim ekeýimiz bilimdi bolýymyz kerek degen pikirdemin». Sertke bekem seri jigit oıyndaǵy arýdy áli izdep keledi.

Sahna syrtyndaǵy Nurbektiń ómi­­­ri júrek eljiretedi. Ol «Altyn jebe» volonterlik uıymynyń negizin qalaýshylardyń biri. Volonterlik toptyń basty mindeti – onkologııamen aýyratyn balalardy shetelde jasalatyn operasııamen qamtamasyz etý. Ashyǵyn aıtqanda, qarjy jınaý. Árıne osy ýaqytqa deıin kishigirim toppen qurylǵan topta qazir 50 erikti turaqty jumys isteıdi. Qarttar úıine, balalar úıine, jaǵdaıy tómen otbasylarǵa járdemdesip, jumyssyz qalǵan jan­darǵa qolushyn beredi. Mektepke bal­dyrǵandardy daıarlaý jumystaryn túgeldeı derlik osy volonterlik uıym óz moınyna alyp, bir kisideı eńbek etip keledi. Janyna shıpa izdegen jandarǵa qarlyǵashtyń qanatymen sý seýip júrgen eriktilerge alǵystan basqa aıtarymyz joq.

Keıipkerimizdiń erekshe qyry, dıp­lomatııalyq qarym-qatynas ornata bilýinde. Qazirgi tańda Jastar teatrynda akterlikten bólek, «Jarnama» bóliminiń janynan qurylǵan «Halyqaralyq qatynastar» bóliminde qyzmet atqarady. Bul degenińiz – teatrdyń bir jyldyq shetelge jasalynatyn gastroldik saparlary men festıvaldary túgeldeı derlik Nurbektiń jetekshiligimen júzege asyrylady degen sóz. «Men istemesem kim, búgin istemesem qashan?» degen ustanymdy qazyq etken jalyndy jas áli talaı bıikterdi eńseretinine esh kúmánimiz joq. Janyna shýaq shashqan Nurbek sııaqty jandardyń qasymyzda júrgenin umytpaıyq.

Sońǵy jańalyqtar

Prezıdent Ahmetjan Esimovti qabyldady

Prezıdent • Búgin, 18:21

Qyzylordada eki kúnde 36 adam ustaldy

Aımaqtar • Búgin, 17:51

Sora ekken turǵyn tergelýde

Aımaqtar • Búgin, 16:33

Alaqandaı Artem: 980 gramm ómir

Qoǵam • Búgin, 16:00

Arzan ton alamyn dep aldanyp qaldy

Aımaqtar • Búgin, 14:30

Uqsas jańalyqtar