Úkimet • 29 Shilde, 2020

Epıd-ahýaldy turaqtandyrýǵa qol jetkizildi

18 ret kórsetildi

Premer-Mınıstr Asqar Mamınniń tóraǵalyǵymen ótken Úkimettiń selektorlyq otyrysynda eldegi epıdemııalyq ahýal jáne koronavırýs ınfeksııasymen kúres sharalary qaraldy. Taqyryp boıynsha Densaýlyq saqtaý mınıstri Alekseı Soıdyń baıandamasy, Nur-Sultan, Almaty, Shymkent qalalary, Mańǵystaý, Qostanaı oblystary ákimderiniń esepteri tyńdaldy.

A.Soıdyń aıtýynsha, 5 shildede qa­tań karantındik shekteý sharalary engi­zil­gennen bergi 3 apta ishinde vırýs juq­tyrǵan 35 951 naýqas tirkeldi. Jalpy, vırýs juqtyrý kórsetkishi 29%-ǵa tó­mendedi.

«COVID-19-ben aýyrý jaǵdaıy orta eseppen táýligine 1600 adam deń­ge­ıinde. Saýyǵyp ketkenderdiń úlesi 63%-ǵa deıin ósti. Osylaısha, densaý­lyq saqtaý júıe­sine júktemeniń negiz­gi kór­setkishteri tó­mendeýine qol jetki­zildi», dedi mınıstr.

Infeksııanyń reprodýktıvtik kór­setkishi 1,2%-dan 0,99%-ǵa deıin, tósektik oryndardyń qamtylý paıyzy 90%-dan 47%-ǵa deıin tómendedi. Iаǵnı densaýlyq saqtaý júıesine túsetin júktemeniń negizgi kórsetkishteriniń joǵaryda kórsetilgen oń serpini karantındik sharalardy kezeń-kezeńmen azaıtý múmkindigi bar ekenin kórsetip otyr.

«COVID-19-dan syrqattaný men ólim-jitim jaǵdaıyn odan ári turaqtandyrý ekonomıkanyń barlyq sektorlarynyń úılesimdi jumysyna baılanysty ekenin erekshe atap ótkim keledi. Qabyldanatyn turaqtandyrý sharalarynyń tıimdiligi tek 30%-ǵa medısınalyq kómek pen epıdemııalyq is-sharalardyń sapa­syna baılanysty», degen vedomstvo basshysy qalǵan 70%-y maska rejimi men jeke gıgıenany saqtaýǵa (30%), áleýmettik qashyqtyq normalaryn saqtaýǵa (40%) baılanysty ekenin jetkizdi.

Mınıstr aıtqandaı, barlyq qazaq­stan­dyq qoǵamǵa koronavırýs emes, qaýip­sizdik pen salaýatty ádetter «juq­paly» bolýy úshin barlyq sharalardy qabyldaýy qajet. «Úıden tys jerlerde maska kııý ınfeksııanyń taralýyn 30%-ǵa azaıtady. Infeksııanyń taralýynda qol gıgıenasy erekshe ról atqarady», dedi A.Soı.

Osyǵan baılanysty memlekettik mekemeler men jumys berýshilerdi, basqa da uıymdardy tarta otyryp, maska rejimin saqtaý jaýapkershiligin kúsheıtý, barlyq qoǵamdyq oryndarda sanıtaızerler ornatýdy qamtamasyz etý, barlyq aqparattyq arnalar arqyly halyqqa aqparattyq-túsindirý jumystaryn júrgizý kerek.

 

Tyıym tártibi saqtalady

Kúsheıtilgen sanıtarlyq-dezın­fek­sııalyq rejimdi saqtaý, maska taǵý jáne áleýmettik ara qashyqtyqty saq­taý arqyly bir apta ishinde tósektik oryn­dar­dyń qamtylý kórsetkishi 70%-dan azaıyp, ólim-jitim deńgeıi tómendegen kezde ýaqyty men kúnderi boıynsha shek­teýler saqtala otyryp mynadaı ınfra­­qurylymdyq obektilerdiń qyz­metine ruqsat etiledi: saýda-oıyn-saýyq ortalyqtary, saýda úıleri, saýda jelileri, jabyq azyq-túlik, azyq-túliktik emes bazarlar, balalarǵa arnalǵan túzetý kabınetteri, bilim berý ortalyqtary, balalardy damytý ortalyqtary, ár topta 5 adamnan aspaıtyn úıirmeler, kezekshi toptar rejimindegi mektepke deıingi balalar mekemeleri, sulýlyq salondary, shashtarazdar, kosmetıkalyq jáne kosmetologııalyq qyzmet kórsetetin orta­lyq­tar men salondar. Sonymen qatar qa­shyq­tan jumys isteý formasy mem­lekettik organdardyń (uıym­dar­dyń) qyz­metkerleri men keńse qyzmet­ker­leriniń keminde 80%-y úshin saqtalýǵa tıis.

Densaýlyq saqtaý mınıstri áleý­mettik qashyqtyqty saqtaı otyryp, ashyq aýa­da jeke jáne toptyq jattyǵýlar ja­saýǵa ruqsat etiletinin atap ótti. Son­daı-aq ulttyq quramalar úshin 30 adam­nan aspaıtyn qurammen sporttyq jat­ty­ǵýlar jasaýǵa bolady.

Halyqtyń júrip-turýyna qatysty my­na­daı talaptar saqtalady: kóshede júrý, saıabaqqa, skverge jáne jaǵalaýǵa barý – 3 adamnan aspaýy tıis; qoǵamdyq kólik­terde maska taǵý, sanıtarlyq-dezın­feksııalyq rejimdi saqtaý, kondýk­tordyń bolýy mindetteledi. Qoǵamdyq kólikterdiń jumysynda ýaqyt boıynsha shekteý, jolaýshylardyń 50%-dan aspaýy syndy erejeler de saqtalady.

Sonymen qatar: kópshiliktiń qaty­sýymen ótetin is-sharalardyń barlyq túrlerine, oıyn-saýyq mekemeleriniń, kıno­teatrlardyń, fýdkorttardyń, banket zaldarynyń jumysyna; meıramha­nalar, barlar, túngi jáne oıyn klýb­tarynyń jumysyna; mádenıet nysan­da­ry­nyń, mýzeılerdiń jumysyna, konfe­ren­sııalar, kórmeler, forýmdar ót­ki­zýge; sportzaldardyń, fıtnes-ortalyq­tardyń, basseınderdiń, akvapark jaǵajaı­larynyń jumysyna; dinı nysandar jumysyna; qala mańyndaǵy jolaýshylar poıyzdarynyń (jumys poıyzdarynan basqa) qozǵalysyna, ortaq vagondardyń, qalaaralyq avtobýstardyń (shaǵyn avtobýstar) reısterine tyıym salynady.

Almaty qalasynyń ákimi Baqytjan Saǵyntaev 5 shildede kúsheıtilgen shara­lardy engizý durys sheshim bolǵa­nyn atap ótti. Almatydaǵy epıdemııalyq jaǵdaı keshendi túrde turaqtandy. Megapolıstegi koronavırýs juqtyrǵandardyń ósimi 2,2%-ǵa deıin tómendedi. Qazirgi tańda qa­lada COVID-19 juqtyrǵan 10 965 adam tirkelgen. 6 341 adam nemese 60%-y em­delip shyqqan. Koronavırýstan qaı­tys bolǵandar sany – 73 adam (0,68%). Pnev­monııa jáne COVID-19 juqtyrdy degen kúdikpen jedel járdem shaqyrý sany 4 esege azaıdy. Stasıonarlarǵa jat­qy­zyl­ǵan adamdar sany 2 eseden astam tómen­dedi. Sondaı-aq emhanaǵa júgi­nýshiler sany da 2 ese azaıdy.

Pandemııamen kúresý jáne jańa tol­qynnyń bastalýyna daıyndyq jumys­tary kúsheıtildi. Jedel járdem baǵy­tynyń jańa modeli jasaldy. Negizgi klı­nıkalyq-dıagnostıkalyq baǵyttar boıynsha shtattan tys mamandar ınstıtýty quryldy. Jalpy qalalyq zerthana jelisi ortalyqtandyryldy.

Alǵashqy medısınalyq járdem bólim­sheleri COVID-19-ben kúresýge beıim­deldi. Ambýlatorııalyq deńgeıde mobıldi brıgadalar qyzmet etedi. Qaýipti topqa jatqyzylǵan pasıenttermen Monıtorıng ortalyǵynyń jetekshi mamandary jumys isteıdi.

Nur-Sultan qalasynyń ákimi A.Kól­gi­nov, Shymkent qalasynyń ákimi M.Áı­tenov, Mańǵystaý oblysynyń ákimi S.Tru­mov, Qostanaı oblysynyń ákimi A.Mu­ham­betov te óz óńirlerinde epı­demııa­lyq jaǵdaı burynǵyǵa qaraǵanda edáýir jaqsarǵany týraly baıandady. Bul aımaq­tardaǵy ahýal men qoldanylǵan sharalar Almatyǵa uqsas.

Taqyrypty Úkimet basshysy As­qar Mamın qorytyndylady. Onyń aıtýynsha, bıyl 2 tamyzda aıaqtalatyn karantın rejimi kezeńinde Qazaqstanda epıdemııalyq jaǵdaı turaqtandy, medısına uıymdarynyń júktemesi birshama azaıdy. COVID-19-dan saýyǵyp ketkenderdiń sany 63%-dan asty. Aýrý juqtyrýdyń táýliktik ósimi 4%-dan 1,7%-ǵa deıin azaıdy, stasıonarlardaǵy oryndardyń júktemesi 46%-ǵa deıin, jedel járdemdi shaqyrtýlar sany 38%-ǵa tómendedi. О́ńirler dári-dármektiń jetkilikti qory­men qamtamasyz etilgen.

«Epıdemııalyq jaǵdaıdy odan ári jaqsartýymyz qajet. Búgin Densaýlyq saqtaý mınıstrligi karantındik sharalardy birtindep alý josparyn usynyp otyr. Aǵymdaǵy jaǵdaıdy jáne osy aıdyń qorytyndysyn eskere otyryp, Memlekettik komıssııanyń otyrysynda bul jospar qarastyrylyp, tıisti sheshim qabyldanatyn bolady», dep túıindedi sózin A.Mamın.

 

Elektrondy saýda ekpin aldy

Úkimet otyrysynda elektrondy saý­dany damytý máselesi de qaraldy. Bul baǵytta atqarylyp jatqan jumys týraly Saýda jáne ıntegrasııa mınıstri B.Sultanov pen Sıfrlyq damý, ınno­vasııa­lar jáne aeroǵarysh ónerkásibi mınıstri mindetin ýaqytsha atqarýshy B.Mýsın baıandady.

Bıyl birinshi jartyjyldyqta Qazaq­stan­da elektrondy saýdanyń bólshek taýar aınalymyndaǵy kólemi bir jarym eseden asa ósti. «Qazpochta» AQ máli­me­tine súıengen Saýda jáne ıntegrasııa mınıstri Baqyt Sultanovtyń aıtýynsha, alty aıda elektrondy saýda naryǵynyń kólemi 435 mlrd teńgeni qurady. Bul ból­shek saýdanyń jalpy kóleminiń 9,4%-yn quraıdy. Aǵymdaǵy jyldyń sońyna deıin ósim 900 mlrd teńgege jetedi dep boljanýda. 2022 jylǵa qaraı bul kórsetkish ból­shek saýdanyń jalpy kóleminiń shamamen 13%-yn qurap, 1,9 trln teńgege jetedi.

Baǵdat Mýsın pandemııa kezinde ınternet jáne elektrondyq memlekettik qyzmetter birinshi qajettiliktegi qyz­met­terge aınalǵanyn atap ótti. Elektrondyq saýdany damytý qazirgi kúrdeli ýaqytta ózekti másele bolyp otyr. Bıyl ósim qar­qyny joǵarylap, 6 aı ishinde ınternet-dúkenderden satyp alynǵan taýar sany 19,5 mln-ǵa jetti.

Premer-Mınıstr elektrondy saý­da­nyń perspektıvasy zor ekenin, ol eko­no­mıkanyń ilespe sektorlary – logıs­tıkaǵa, konteınerlik tasymaldaýǵa, kýrer­lik qyzmetterge, sıfrlyq servıs­ter men qyzmetterge, qolma-qol aqshasyz aına­lymǵa, eńbek naryǵyna jáne taǵy bas­qa­syna mýltıplıkatıvti áserin tıgize­tinin atap ótti.

«Bizdiń aldymyzda elektrondy saýda rásimderin jeńildetip, qarjylandyrýǵa jol ashatyn, ınternet arqyly mámile jasaýǵa senimdi nyǵaıtatyn, sondaı-aq kı­berqylmystarǵa qarsy áreket etýge múmkindik beretin tıimdi sharalardy qa­lyptastyrý mindeti tur», dedi A.Mamın.

Úkimet basshysy 2025 jylǵa qaraı, elimizde elektrondy saýda sektorynda aralas salalardy eskere otyryp, shamamen 300 myńnan asa jańa jumys orny men mamandyǵy ashylatyny jetkizdi. Ol Saýda mınıstrligine Eńbek mınıstrligimen «Atameken» UKP-men jáne iri ınternet-dúkendermen birge kásipkerlerdi onlaın-saýdany tıimdi júrgizýge oqytý úshin arnaıy baǵdarlama ázirleýdi, osy baǵdarlamaǵa jastardy belsendi tartýdy tapsyrdy.

Saýda logıstıkasyn odan ári tıimdi damytý maqsatynda tıisti mınıstrlikterge fýlfılment-ortalyqtar jelisin jáne qa­zirgi tańda qurylyp jatqan Ult­tyq taýar ótkizý júıesin damytý jos­­paryn úılestirý, Qazaqstannyń Damý ban­­kimen birlesip onlaın-saýda­da jańa ne­sıelendirý ónimderin qaras­tyrý máse­lesin pysyqtaý tapsyryldy. «Innova­sııalyq tehnologııalyq sheshim­derdi qoldaný osy saladaǵy zańnamaǵa ózgerister men tolyqtyrýlar engizýdi talap etedi» degen Premer-Mınıstr Sıfrlyq damý mınıstrligine tıisti zań jobasyn ázirleýdi jedeldetip, Úkimettiń qaraýyna aǵymdaǵy jyly usynýdy júktedi.

Úkimet basshysy «bir tereze» qaǵı­daty boıynsha onlaın saýdadaǵy tuty­ný­shylardyń shaǵymdary men usynystaryn qabyldaýdyń Biryńǵaı platformasyn iske qosý jumysyn jandandyryp, tıimdi keri baılanysty jolǵa qoıýdy mindettedi. Sonymen qatar A.Mamın elektrondy saýdany damytýdyń 2023 jylǵa deıingi Jol kartasyn jandandyrýdy tapsyrdy.

Sońǵy jańalyqtar

Uqsas jańalyqtar