Álem • 29 Shilde, 2020

AQSh asqan stýdentter elge qaıtýy kerek

342 ret kórsetildi

Jaqynda Vashıngton bıligi pandemııaǵa baılanysty kúzgi jáne aldaǵy oqý jyly tek onlaın formatta ótkiziletin bolsa, sheteldik stýdentter eline qaıtýy tıis ekenin málimdedi.

Qazirgi ýaqytta AQSh-ta oqıtyn sheteldik stýdentter elden ketýi, ıa zańdy mártebede qalýy úshin jeke kýrstarǵa nemese basqa oqý ornyna aýysý sııaqty sharalardy qolǵa alýy kerek. Jaǵdaı ýshyqsa, onyń sońy deportasııaǵa alyp kelýi múmkin.

Kúndizgi oqý bólimderinde qashyqtan oqıtyn, F-1 jáne M-1 vızasyn alǵan stýdentter onlaın kýrsty tolyǵymen júktep alsa, AQSh-ta qalý múmkindigi kóp. Vızanyń birinshi túri sheteldik stýdentterge elde oqýǵa, ekinshisi – kásibı kýrstardan ótýge beriledi. Sonymen qatar kúndizgi bólimde oqıtyn bilim alýshylar federaldyq erejelerdi saqtaýy mindetti. Al F vızasyna qatysýǵa quqyǵy bar stýdentter bir sabaqtan nemese úsh synaq saǵatynan onlaın túrde óte alady.

Osy tarapta Los-Andjeles qalasyndaǵy University of California-ǵa «extension» baǵdarla­masy­men oqýǵa túsken Muhammed Álimbetten az-kem aqparat alǵan edik. «Kóshi-qon jáne keden polı­sııasy basqa eldiń stýdentterine kúzge deıin elden ketýdi mindettedi. Eger siz oqıtyn joǵary oqý orny tolyqtaı onlaın formatqa ótse, sonda ǵana elden ketýge májbúr bolasyz. Men oqıtyn bilim ordasynda sabaqtardyń 80 paıyzy qashyqtan ótip jatyr. Alaıda qalǵan 20 paıyzyn áli de «gıbrıd» formatta qarastyrýdamyz. Iаǵnı joǵary oqý ornyna áli de barýǵa týra keledi. Eń ókinishtisi, balalyq shaǵymnan bergi armanym AQSh-ta bilim alý bolsa, soǵan qol jetkizgen kezde bul zańnyń shyǵýy sheteldik stýdentter úshin aýyr soqqy boldy», deıdi M.Álimbet.

Ol qashyqtan bilim alýdyń qolaısyz ekenin aıtty.

«Dúkenderge, saýda oryndaryna betper­desiz kirýge bolmaıdy. Adamdar arasyndaǵy araqa­shyqtyq ta saqtalǵan. Negizinde vırýs kishkene báseńdegen sııaqty edi. Biraq osydan 1 aı buryn Djordj Floıdtyń oqıǵasynan keıin elde jaǵdaı kúrt nasharlap, aýrý juqtyrǵandardyń sany lezde arta tústi», deıdi stýdent.

Eske sala keteıik, AQSh prezıdenti Donald Tramp jyl sońyna deıin birqatar vızany berýdi toqtatty jáne Green-karta ustaýshylardyń keıbir jekelegen sanatyna kirýge tyıym salýdy uzartty.

Aq úı basshysy «Ekonomıkalyq quldyraýǵa alyp kelgen koronavırýstyq pandemııaǵa baılanys­ty ımmıgrant emes vıza baǵdarlamalary jumys isteıtin amerıkalyqtarǵa qaýip tóndiredi», degen pikir qaldyrdy. Muny AQSh prezıdenttiginen úmitker Donald Tramptyń saılaýaldy baǵdarlamasy desek te bolady.

 

Sońǵy jańalyqtar

Úsharal garnızony tekserildi

Aımaqtar • Keshe

Jastar saıty iske qosyldy

Aımaqtar • Keshe

Ustaz joly

Rýhanııat • Keshe

Uqsas jańalyqtar