Aımaqtar • 29 Shilde, 2020

"Arqan" jol erejesin buzǵandardy aıamaıdy

570 ret kórsetildi

Batys Qazaqstan oblystyq polısııa departamenti árqaısysy 17 mln teńge turatyn 6 dana "Arqan" avtomattandyrylǵan júıesine ıe boldy. "Arqan" radary ornatylǵan polısııa kólikteri endi eldimekenderden tysqary jerde jol qozǵalysyn baqylap, zańbuzýshylyq oqıǵalary týraly málimetti birden ortalyqqa jiberip otyrady, - dep habarlaıdy Egemen.kz.

Oral-Atyraý kúre joly boıynda jańa qurylǵyny iske qosyp, jýrnalısterge tanystyrǵan polısııa qyzmetkerleri "Arqannyń" birneshe artyqshylyǵy bar ekenin aıtady.

- О́zderińiz bilesiz, patrýldik polısııa qurylymynda sybaılas jemqorlyqty azaıtý maqsatynda eldi mekenderde jyldamdyq ólsheýish quraldaryn paıdalanýǵa tyıym salynǵan bolatyn. О́ńir basshylyǵynyń qoldaýymen jol qozǵalysyn baqylaıtyn avtomattandyrylǵan júıe jelisi keńeıip keledi. Búgin iske qosylǵan "Arqan" avtomattandyrylǵan júıesi jyldamdyqty baqylaýǵa, nómirlik belgilerdi qadaǵalap, ishki ister organdaryna urlanǵan, qamaýǵa alynǵan jáne izdeýde júrgen kólik quraldaryn tekserýge múmkindik beredi. "Arqan" jibergen beıne aqparat jedel basqarý ortalyǵynyń monıtorynan úzdiksiz kórinip turady. Jyldamdyqty buzý kezinde bul júıeniń basty artyqshylyǵy – ereje buzýshylyqty málimetter bazasynan joıý múmkin emes, polıseı men júrgizýshi arasyndaǵy baılanys bolmaıdy jáne qala mańyndaǵy joldardyń kez-kelgen ýchaskesin basqara alamyz, - deıdi Batys Qazaqstan polısııa departamenti bastyǵynyń birinshi orynbasary Janbolat Janshın.

Sý jańa "Lada-Largus" avtomobıline ornatylǵan "Arqan" qurylǵysy jol qozǵalysyn úzdiksiz túsirip, ondaǵy kólikterdi arnaıy baza arqyly tekserip otyrady. Eger kólik urlanǵan nemese izdeýde júrgen bolsa, kólik ıesi aıyppulyn ýaqytynda tólemegen t.s.s. jaǵdaıda, ınspektorǵa belgi berilip, quqyqbuzýshyǵa sol jerde shara qoldanylady. Al jyldamdyqty arttyrý, beldik taqpaý sııaqty ereje buzýshylardyń málimeti birden ortalyq bazaǵa jiberilip, avtomatty túrde aıyppul jazylady. Bul iske tipti ınspektordyń ózi aralasa almaıdy.

Janbolat Janshınniń aıtýynsha, ótken jylmen salystyrǵanda óńirde jolda qaza tapqan adam sany azaıǵanymen, jol erejesin buzýshylyq, jol-kólik oqıǵalarynyń mólsheri ósip keledi eken. "Arqannyń" arqasynda eldimekenderden tysqary jerde jıi bolatyn aýyr jol apattarynyń aldyn alyp, jol erejesin jıi buzatyn júrgizýshilerge toqtam salynbaq.

 

Batys Qazaqstan

Sońǵy jańalyqtar

Sora ekken turǵyn tergelýde

Aımaqtar • Keshe

Uqsas jańalyqtar