О́tken maýsym aıynyń aıaǵynda ótkizilgen keńeste respýblıka Prezıdenti Qasym-Jomart Toqaev Aqtóbe oblysynda indetpen kúrestiń tıimdiligi tómen bolyp otyrǵanyn qatań synǵa alǵany málim. Budan keıin óńirde shuǵyl sharalar qabyldanyp emdeý mekemeleriniń áleýeti eki-úsh esege deıin ósirildi. Dárigerler men orta býyn medısına qyzmetkerleriniń qosymsha korpýsy ázirlendi. Bul iske M.Ospanov atyndaǵy Aqtóbe memlekettik medısına ýnıversıtetiniń barlyq professor-oqytýshylar quramy men bıylǵy jyly osy JOO-ny bitirgen túlekter de tartyldy.
Dertke tap bolǵandardy emdeýge qajetti dári-dármekter qory jasaqtaldy. Buǵan bıýdjetten tys kózder esebinen tabany kúrekteı 500 mıllıon teńge qomaqty qarajat bólindi. Bul is júıeli ári keshendi túrde qolǵa alynyp dári baǵasyna shekteýli normalar qoıyldy. Alypsatarlyqpen aınalysqandardyń joly kesilip, olarǵa tıisti ákimshilik sharalar qoldanyldy. Sondaı Aqtóbe qalasyndaǵy TK Farm kompanııasy vırýsqa qarsy qoldanylatyn grıppover degen ataý berilgen dárini shyǵaryp ony aýrýhanalarǵa shuǵyl jetkizý joldaryn belgiledi. Sóıtip osy arqyly otandyq farmaseptıkanyń taǵy bir jańa óniminiń tusaýy kesildi deýge tolyq negiz bar. Dári-dármek tapshylyǵyn joıýǵa jáne onyń jetkilikti qoryn jasaqtaý isinde oblysta iske asyrylǵan oń sheshimder men taktıkalyq qadamdar Úkimettiń keıingi keńeıtilgen májilisinde arnaıy atalyp ótti. Ári aqtóbelikterdiń bul tájirıbesi ózge óńirlerge úırenetin úrdis retinde usynyldy.
Kelesi kezekte indetti aýyzdyqtaýǵa qarsy júrgizilgen is-sharalar kesheniniń naqty nátıjeleri qandaı degen máselege kelse, atap aıtýǵa turarlyqtaı ózgerister jasalǵany aıqyn baıqalady. Eń bastysy óńirde sanıtarlyq-epıdemııalyq jaǵdaı turaqty syıpat ala bastady. Indettiń báseńdegeni jedel járdemge qońyraý shalǵandardyń edáýir azaıǵanynan da kórinis taba alady.
Sońǵy derekter óńirde emdeý mekemelerine naýqastanyp túsýshilerdiń sanynan aýrýynan aıyǵyp shyqqandardyń sany úsh esege basym túskenin kórsetedi. Osy derekten týyndaıtyn taǵy bir jaǵymdy jáıt búgingi kúni oblysta aýrýhanalar men provızorlyq gospıtaldardaǵy kerýetter sanynyń qyryq paıyzy ǵana paıdalanylyp otyrǵany.
Aqtóbe oblysynyń ákimi Ońdasyn Orazalın oryndy atap kórsetkendeı sońǵy kezde paıda bola bastaǵan epıdemııalyq jaǵdaıdyń oń dınamıkasy bosańsýǵa esh negiz bola almaıdy. Sondyqtan da Aqtóbe aımaǵynda saqtaný men qaýipsizdiń sharalaryna qatysty oblystyń bas sanıtarlyq dárigeriniń qaýlysynda kórsetilgen talaptar men mindetter óz kúshinde qala bermek. Saqtansań saqtarmyn degen halyqtyq qaǵıdaǵa súıengen jaǵdaıda ǵana indettiń betin qaıtarýǵa bolatynyna aqtóbelikter kámil senedi.
AQTО́BE
