Aımaqtar • 29 Shilde, 2020

Elordada karantındi kezeń-kezeńimen jeńildetýge daıyndyq júrgizilýde

18 ret kórsetildi

Búgin Nur-Sultan qalasy ákiminiń orynbasary Baqtııar Makenniń tóraǵalyǵymen tótenshe jaǵdaılardyń aldyn alý jáne joıý jónindegi qalalyq komıssııasynyń qashyqtan otyrysy ótti, dep habarlaıdy Egemen.kz

Elorda ákimdigi janyndaǵy tótenshe jaǵdaılardyń aldyn alý jáne joıý jónindegi komıssııasynyń taldaý jáne monıtorıng tobynyń jetekshisi Shyńǵys Qýatbekov komıssııa otyrysynda berilgen hattamalyq tapsyrmalardyń oryndalýy týraly baıandady.

"5-27 shilde aralyǵynda mobıldi monıtorıng toptary 658 kásipkerlik sýbektilerine sanıtarııa normalaryn saqtaý boıynsha tekserý ótkizip, 364 sýbektide buzýshylyqtar anyqtady. Taýarlar men kórsetilgen qyzmetterdiń sapasy men qaýipsizdigin baqylaý departamentimen karantın sharalary kezeńinde jumys rejımin buzǵany úshin 63 ákimshilik materıal jınaldy", – dedi Sh. Qýatbekov.

Komıssııa otyrysynda qatysýshylar karantındi jeńildetýge daıyndyq máselelerin de talqylady. Qala ákiminiń orynbasary aýrýdyń taralýyna jol bermeý úshin saýda ortalyqtary, saýda úıleri men bıznes ortalyqtar basshylarymen ashylý kezinde karantın sharalaryn saqtaý qajettiligi týraly túsindirme jumystaryn júrgizýdi, karantın kezinde qyzmetti júrgizýge ruqsat alý tártibin ázirleýdi jáne kásipkerlerge keńes berýdi uıymdastyrýdy tapsyrdy.

"Memleket basshysynyń tapsyrmasy boıynsha aýrýdyń taralýyn tómendetý, halyq arasynda belsendi túrde túsindirý jumystaryn júrgizý, karantın jáne aldyn alý sharalaryn saqtaý bizdiń basty mindet. Shekteýler birtindep alynady dep kútilýde. Alaıda, kásiporyndar men mekemelerdiń jumysyn jandandyrý koronavırýsqa deıingi ómir saltyna qaıta oralýdy bildirmeıdi. Mindetti túrde maska taǵý, áleýmettik qashyqtyq pen gıgıena talaptary saqtalady. Halyqqa qyzmet kórsetetin barlyq mekemeler, atap aıtqanda, halyqqa qyzmet kórsetý ortalyqtary, bankter, qyzmet kórsetý ortalyqtary áleýmettik qashyqtyq belgilerin ornatýy kerek. Sýbektilerdiń qyzmeti qaıta bastalǵan kezde, órtke qarsy jumysty kúsheıtý jáne órt qaýipsizdigin qamtamasyz etý qajet. Talaptardy buzǵany úshin jaýapkershilik deńgeıi joǵary bolýy kerek. Sondyqtan, taýarlar men kórsetilgen qyzmetterdiń sapasy men qaýipsizdigin baqylaý departamenti aýdan ákimdikterimen birge barlyq kásipkerlik sýbektileriniń basshylarymen maqsatty túsindirý jumystaryn júrgizýi qajet", – dedi B.Maken.

Sonymen qatar qorshaǵan ortany qorǵaý jáne tabıǵatty paıdalaný basqarmasyna demalys kúnderi qoǵamdyq oryndarda aýqymdy dezınfeksııa júrgizý, qaýipsizdik sharalaryn saqtaý, onyń ishinde maska taǵý, áleýmettik qashyqtyq saqtaý boıynsha polısııa departamentine reıdterdi jalǵastyrý tapsyryldy.

Sońǵy jańalyqtar

Tashkent tragedııasy

Sport • Keshe

Uqsas jańalyqtar