Jalpy, qalada epıdahýal jaqsaryp keledi. Ásirese, sońǵy aptadaǵy kórsetkish táýir. Aýrýhanalarǵa koronavırýspen túsken naýqastar 2 esege azaıyp, emdelip shyqqandar sany 70 paıyzǵa jýyqtady. Al pnevmonııamen túskender 45% paıyzǵa kemigen.
Bul týraly qala ákimi Altaı Kólginov te: "Aýyr haldegi naýqastar sany 34%-ke azaıdy, ıaǵnı 199-dan 132 adamǵa deıin. Prezıdenttiń tapsyrmasyna sáıkes, qabyldanǵan birqatar sharalar nátıjesinde karantın engizilgen sátten bastap KVI boıynsha jaǵdaıdyń naqty turaqtanýy baıqalady", - degen edi.
Dese de, bul qaýip joq degen sóz emes. Sondyqtan, tıisti sharalar áli de qoldanyla beredi. Máselen, naýqastardy kompıýterlik tomografııa arqyly tekserý táýlik boıy júrip jatyr. Aýrýhanalarda qosymsha oryndar daıyndalyp, ottegi konsentrattary men kompıýterlik tomograftar satyp alyndy. Jaqyn arada olardyń sany taǵy da kóbeıedi.
