Baıqaýdyń óńirlik kezeńindegi synyna qatysýǵa barlyǵy 12 memlekettik qyzmetshi qujat tapsyrǵan bolatyn. Úmitkerler arasynda "Men nege "Úzdik aýyl ákimi" ataǵyna laıyqpyn" taqyrybyndaǵy essesi, aýyldy damytý boıynsha usynǵan jobalyq jumysy jáne áńgimelesý barysyndaǵy jeke bas qasıetteri úzdik dep tanylǵan Samat Meıirmanov baıqaýdyń óńirlik deńgeıinde jeńiske jetip, respýblıkalyq kezeńge joldama aldy.
"Memlekettik qyzmette men 2014 jyldan beri jumys istep kelemin. Al mundaı baıqaýǵa alǵash ret qatysyp otyrmyn. Aýdandaǵy aýyldardyń kóbinde basseın joq, al bizde ol buryn bolǵan. Men usynǵan joba – basseındi qalpyna keltirý boldy. Sondaı-aq, jergilikti mádenıet úıi ǵımaratynyń bos turǵan ekinshi jartysyn dene shynyqtyrý-saýyqtyrý kesheni etip jabdyqtaý oıda bar. Qazir men respýblıkalyq kezeńge daıyndalyp júrmin. 15 tamyzǵa deıin bárin jasap úlgerý kerek. Al baıqaýdyń nátıjeleri 20 qyrkúıekte belgili bolady", – deıdi top jarǵan ákim.
Eske salar bolsaq, oblystyq jáne respýblıkalyq kezeńnen turatyn "Úzdik aýyl ákimi" baıqaýy 25 mamyrda bastalǵan bolatyn. Endi óńirlik deńgeıde úzdik shyqqan jeńimpazdar aldaǵy tamyz aıynda ótetin sheshýshi týrda baq synaıtyn bolady.
