Aımaqtar • 29 Shilde, 2020

Derekter negizinde jedel sheshimder qabyldaý: Almaty tájirıbesi

5 ret kórsetildi

Bul jóninde óńirlik kommýnıkasııalar qyzmetiniń alańynda ótken onlaın brıfıng barysynda Sıfrlandyrý Basqarmasynyń basshysy Baıan Qońyrbaev aıtyp berdi, - dep habarlaıdy Egemen.kz.

2020 jyldyń mamyr aıynan bastap Almaty qalasynyń sıfrlandyrý basqarmasy Tele2/Altel, Beeline, Kazaqtelekom mobıldi operatorlarymen birlesip pandemııa kezinde qalany taldaý júıesiniń jobasyn iske qosqan bolatyn. Júıe kómegimen qala boıynsha adamdar jınalatyn oryndar men ýaqyt baqylanyp otyrdy. Karta koronovırýstyq ınfeksııanyń (KVI) taralýyna qarsy is-qımyl boıynsha jedel sheshimder qabyldaýǵa kómektese otyryp, Almaty qalasynyń Vedomstvoaralyq komıssııasynyń shtabynda jumys isteıdi.

 Bul júıedegi málimetter 'near real time' rejımi arqyly ár saǵatta 500h500 metr geoalańdarda jańartylyp otyrady. Bul adamdardyń úı aımaǵyndaǵy qozǵalysyn tirkeýge jáne eń kóp jınalý oryndaryn anyqtaýǵa múmkindik bermek.

Úı aımaǵynan tys nemese shyǵyp ketetin abonentterdiń sanyn anyqtaý úshin, úı aımaǵynan 1 kılometrden astam qashyqtyqqa alyp tastaý krıterııi qoldanylady. Bul rette agregatta qandaı da bir derbes derekter joq. Derekterdi uıaly baılanys operatorlary ıesin anyqtamaǵan kúıde, derbes derektersiz sektorlar boıynsha statıstıka formatynda usynady.

 "Qala boıynsha Bostandyq, Almaly jáne Medeý aýdandarynda adamdardyń eń kóp shoǵyrlanýy, oryn aýystyrýy baıqalǵan. Al kúndizgi ýaqytta Naýryzbaı aýdany eń tómen belsendilikti kórsetken. Eń kóp belsendilik kúndizgi ýaqytta jumys kúnderi 12:00-den 15:00-ge deıin, jekeleı alǵanda, Arbat jáne "Kók bazar", "Baraholka" bazarlaryna irgeles aýmaqtar men Rozybakıev-Raıymbek, sonymen birge, qalalyq aýrýhanalar aýmaqtarynda baıqalady. Osy málimetter negizinde, vedomstvoaralyq komıssııa neǵurlym belsendi aýdandarda dezınfeksııany kúsheıtti. KVI taralýyna qarsy basqa sharalar qabyldanýda", deıdi Qońyrbaev.

Júıe, sondaı-aq, 103, 1308, 1406 nómirlerine shalynǵan qońyraý jıiligin taldaýmen aınalysady. Qońyraýlardyń eń kóp sany - kúnine eki myńnan alty myńǵa deıin 103 jedel járdem nómirine túsedi. Sonymen qatar, 103 qyzmetine qońyraýdyń jıiligi jáne 4-8 kúnnen keıin KVI aýrýy boıynsha tirkelgen jaǵdaılardyń ósýi baıqalady. Bul KVI-men aýyratyn naýqastar úshin tósekterdiń bólinýi men taratylýyn tııanaqty josparlaýǵa múmkindik beredi.

Shilde aıynyń ortasynan bastap sońǵy taldaýlarǵa KVI juqtyrýdyń belsendi oshaqtary, beınebaqylaý kameralary arqyly kóliktiń kirý-shyǵý, qala mańyndaǵy baǵyttardaǵy jolaýshylar aǵyny boıynsha "Almaty qalasynyń Kólik holdınginiń" derekteri qosyldy. Jınaqtalǵan derekter ótken aptamen salystyrǵanda geoaımaqtaǵy belsendiliktiń ósý/tómendeý paıyzyn anyqtaýǵa; zańdylyqtardy kórý jáne qabyldanǵan karantındik retteý sharalaryn taldaýǵa múmkindik beredi.

Joba áli de damý ústinde. Tamyz aıynda Almaty oblysy turǵyndarynyń qalaǵa kóshý, kelý sanyn anyqtaý, ıaǵnı qaıdan, qandaı kólemde, qala boıynsha qozǵalys baǵyttary jáne shoǵyrlaný oryndary boıynsha uıaly baılanys operatorlarynyń derekterine qosymsha taldaý júrgizý júzege asyrylady. Ýaqyt óte kele basqa da málimetter ıntegrasııalanady, al jınaqtalǵan saraptaý qalanyń tártibin jaqsyraq túsinýge múmkindik berip, pandemııany retteýde qabyldanǵan sharalardan sabaq alyp, málimetter negizinde jańa júıelik sheshimder qabyldaýǵa múmkindik beredi.

Sońǵy jańalyqtar

Uqsas jańalyqtar