Qoǵam • 30 Shilde, 2020

Áleýmettik qyzmetkerler MÁM jumysyn jetildirý jaıyn talqylady

40 ret kórsetildi

Qazaqstannyń áleýmettik qyzmetkerleri MÁM jumysyn jetildirý jaıyn talqylady. Bul týraly EQÁQ mınıstrliginiń baspasóz qyzmetine silteme jasaı otyryp Egemen.kz habarlaıdy.

Medısınalyq-áleýmettik mekemelerde (budan ári – MÁM) kórsetiletin qyzmetterdiń sapasyn arttyrý maqsatynda qoǵamdyq keńester qurylýda, bıýdjet týraly aqparat ashyq túrde jarııalanýda, qyzmet alýshylarǵa ǵalamtor erkin qoljetimdi jáne de qoǵamǵa da ashyqtyq máselesi qamtamasyz etilýde. Sonymen qatar, stasıonarlyq sıpattaǵy MÁM-derde turatyn 18 myńnan astam qyzmet alýshy SOVID-19-ke test tapsyrdy. Stasıonarlyq sıpattaǵy MÁM jumysyn jaqsartý jáne olardyń qyzmet sapasyn kóterý máseleleri alǵash ret onlaın túrde ótken Qazaqstannyń áleýmettik qyzmetkerleriniń II forýmynda talqylandy.

Eńbek jáne halyqty áleýmettik qorǵaý vıse-mınıstri Erlan Áýkenovtiń tóraǵalyǵymen ótken sharaǵa Adam quqyqtary jónindegi ýákili Elvıra Ázimova, MÁM dırektorlary men áleýmettik sala qyzmetkerleri qatysty.

Erlan Áýkenov óz sózinde Eńbek jáne halyqty áleýmettik qorǵaý mınıstrligi (budan ári – Eńbekmıni) arnaıy áleýmettik qyzmetterdiń sapasyn arttyrý boıynsha júıeli jumystar júrgizip jatqandyǵyn atap ótti. MÁM qyzmetin jetildirý maqsatynda mınıstrlik jergilikti atqarýshy organdar men qoǵamdyq birlestikterdiń usynystaryn jınady.

Barlyǵy 174 usynys kelip tústi, olardyń barlyǵy forýmda málimdeldi. Olardyń 150-den astamy Eńbekmıni 7 buıryǵyna ózgeris engizýge, qalǵany – QR Úkimeti qaýlylaryna, 2 kodekske jáne qoldanystaǵy 5 zańǵa qatysty.

Usynystardyń eń kóp sany arnaıy áleýmettik qyzmetter kórsetý standarttarynyń ózgerýine baılanysty. Olardyń ishinde, mysaly, MÁM qyzmetterin alýshylar úshin kıim, aıaqkıim, tósek-oryn jáne jeke gıgıena zattarynyń eń tómengi normasyn arttyrýǵa jáne olardy qoldaný merzimin qysqartýǵa qatysty usynystar bar. Arnaıy áleýmettik qyzmetke júgingen kezde usynylatyn qujattar tizimin ońtaılandyrý, mekemeden shyǵarý erejesin qaıta qaraý, MÁM qyzmetkerleriniń mindetterin naqtylaý jóninde jáne taǵy basqa usynystar tústi. Jınalǵan usynystar muqııat qaralatyn bolady.

Búgingi tańda Qazaqstanda 12 myńǵa jýyq áleýmettik qyzmetker jumys isteıdi, olardyń 10 myńy MÁM aıasynda qyzmet kórsetedi. Forým barysynda áleýmettik qyzmetkerlerdiń kásibı ádebi jónindegi ádistemelik usynystar tanystyryldy. Qujat qyzmet alýshylarǵa, áriptesterge jáne qoǵamǵa qatysty áleýmettik qyzmetkerlerdiń minez-qulqyna qatysty 5 taraýdan turady. Usynystarda áleýmettik qyzmetkerlerdiń ádep qaǵıdalary men negizgi minez-qulyq standarttary kórsetilgen. Jaqyn arada olar is júzinde engiziletin bolady.

Forým barysynda áleýmettik qyzmetker mártebesin kóterý máselesi de aıtyldy.

"Memlekettik deńgeıde olardyń quzireti men mańyzyn arttyrý qajet. Mysaly, Eńbek kodeksine jumyskerlerdiń jekelegen sanattarynyń eńbegin retteý týraly bólim engizýge bolady. Áleýmettik qyzmetkerge eńbek naryǵynda mártebe men kepildik berilýi kerek. Áleýmettik qyzmetkerdi jáne onyń otbasy múshelerin áleýmettik qamtamasyz etý qajet. Biz olardy tıisti áleýmettik qorǵaý arqyly ǵana ádep qaǵıdalarynyń saqtalýyn talap ete alamyz", dedi Prezıdent janyndaǵy Áıelder isi jáne otbasylyq-demografııalyq saıasat jónindegi ulttyq komıssııanyń tóraıymy Lázzat Ramazanova.

Buǵan deıin MÁM jumysyn jaqsartý maqsatynda oblystar men respýblıkalyq mańyzy bar qalalardyń ákimdikterine 22 tarmaqtan turatyn sharalardy qabyldaý usynyldy. Olardyń ishinde:

- qoǵamdyq keńester qurý;

- ashyqtyq qaǵıdatyn engizý;

- qyzmet alýshylardy ǵalamtormen qamtamasyz etý;

- barlyq mekemelerdi beınebaqylaýmen qamtý, kameralardaǵy jazbalarǵa qyzmet alýshylardyń týystaryna qoljetimdilikti qamtamasyz etý;

- qajet bolǵan jaǵdaıda kúrdeli jáne aǵymdaǵy jóndeý jumystaryn júrgizý;

- shalǵaı aýyldarda ornalasqan MÁM-derdi qalalar men aýdan ortalyqtaryna kóshirý jáne mekemeler jumysyn jaqsartý jónindegi basqa da sharalar.

Eńbekmıni Áleýmettik qyzmetter saıasatyn damytý departamentiniń dırektory Dámejan Sádýaqasovanyń aıtýynsha, MÁM jumysynda shaǵymdardy taldaý men keri baılanys ortantýǵa erekshe kóńil bólinedi.

"Shaǵymdar men ótinishter negizinde, onyń ishinde áleýmettik jeliler boıynsha táýekelder kartasyn jasaý kerek. Sizderdiń nazarlaryńyzǵa táýekelder kartasy tek olqylyqtar anyqtalǵan óńirlerde ǵana emes, sondaı-aq aldyn alý maqsatynda basqa óńirlerde de jasalýy qajet ekendigine nazar aýdarǵym keledi", dep atap ótti Dámejan Sádýaqasova.

О́tken kezeń ishinde merzimi aıaqtalýǵa jaqyn usynystardy oryndaýdyń oń úrdisin kórýge bolady. Bul tusta usynystardyń oryndalýynyń eń joǵary paıyzy Aqmola, Aqtóbe, Jambyl, Qostanaı oblystarynda jáne Nur-Sultan qalasynda baıqalady.

Usynystardy iske asyrý nátıjeleri boıynsha arnaıy áleýmettik qyzmetter usynatyn 113 ortalyqtyń 74-i wi-fi bar ǵalamtormen qamtamasyz etilgen. Bul mekemelerdiń barlyǵynda qoǵamdyq keńester quryldy, áleýmettik jelilerde akkaýnttary ashyldy. 95 MÁM bıýdjeti ashyq túrde jarııalandy. MÁM basshylyǵy men qyzmetkerleri qamqorlyqtaǵy jandardyń týǵandarymen jáne jaqyndarymen tyǵyz baılanys ornatqan.

"Bizdiń mindetimiz – ashyqtyqty arttyrý, qyzmet alýshylarmen jumys sıpatyn ózgertý. Ol úshin bıýdjet ashyqtyǵyn qamtamasyz etý, MÁM jaǵdaılaryn egjeı-tegjeıli qaraý jáne ortalyqtar usynatyn qyzmetterdiń sapasyn arttyrý máselelerin kóterý qajet. Barlyq usynystardyń oryndalýyn baqylaý – qazirgi kezde Eńbek, áleýmettik qorǵaý jáne kóshi-qon komıteti, sondaı-aq aýmaqtyq departamentter aldynda turǵan basty mindet", – dep atap ótti Erlan Áýkenov.

Qyzmet alýshylardyń ómir súrý sapasyn jaqsartýǵa baǵyttalǵan usynystardy oryndaý boıynsha jumys jalǵasady.

Esterińizge sala keteıik, búginde elimizde stasıonarlyq tıptegi 113 medısınalyq-áleýmettik mekeme bar, onda 21 myńnan astam qyzmet alýshy turady.

Sońǵy jańalyqtar

Altyn astyq qambaǵa quıyla bastady

Qazaqstan • Búgin, 14:10

Almaty qalasynda jer silkindi

Ekologııa • Keshe

Adasqan balalar aman-esen tabyldy

Aımaqtar • 07 Tamyz, 2020

Prezıdent Ahmetjan Esimovti qabyldady

Prezıdent • 07 Tamyz, 2020

Uqsas jańalyqtar