Qazaqstan • 30 Shilde, 2020

Memleket basshysy Qyrǵyzstan prezıdentine kóńil aıtty

1058 ret kórsetildi

Memleket basshysy Qasym-Jomart Toqaev Qyrǵyzstan basshysy Sooronbaı Jeenbekovke jáne qyrǵyz halqynyń "Ulttyq aza tutý kúnine" baılanysty koronavırýs qurbandaryn eske alyp, jaqyndarynan aıyrylǵan otbasylarǵa kóńil aıtty. Bul týraly Qyrǵyzstan Prezıdentiniń baspasóz qyzmeti habarlaıdy, dep jazady Egemen.kz

Memleket basshysy óz habarlamasynda, Qazaqstan halqynyń jáne jeke óz atynan "Ulttyq aza tutý kúnine" baılanysty koronavırýstyq ınfeksııanyń qurbany bolǵan baýyrlas qyrǵyz azamattaryn eske alyp, shynaıy qoldaý bildirdi. Osyndaı qıyn saǵatta orny tolmas qaıǵy-qasiretpen bólise otyryp, mezgilsiz ketkenderdiń týystary men jaqyndaryna kóńil aıtty. Indetke qarsy turyp, kúreskenderdiń barlyǵyna tezirek saýyǵyp ketýlerin tileıtinin atap ótti.

Sondaı-aq Prezıdent Qasym-Jomart Toqaev qabyldanǵan batyl sharalar, qyrǵyz aǵaıyndardyń birligi men tutastyǵynyń arqasynda eldegi epıdemııalyq jaǵdaıdy turaqtandyrýǵa múmkindik beretinine senimin bildirdi. Osy oraıda elimiz kórshiles respýblıkaǵa qoldan kelgenshe kómek kórsetýge daıyn ekenine sendirdi.

Eske sala keteıik, keshe Qyrǵyz respýblıkasynyń prezıdenti Sooronbaı Jeenbekov 30 shilde – "Ulttyq aza tutý kúni" bolatynyn málimdedi.

Sońǵy jańalyqtar

Uqsas jańalyqtar